რიგისა და ტალინის უძრავი ქონების ბაზართან ფინელების რიგი დგას

"ფინეთიდან 25 ფიზიკური და იურიდიული პირი ჩვენი სააგენტოს 1Partner Kinnisvar-ის მეშვეობით აპირებს, ტალინის ცენტრში, საერთო ჯამში, 100 ბინაში ჩადოს ინვესტიცია და შემდეგში იჯარის გაცემით შემოსავალი მიიღოს," - ამის შესახებ სააგენტოს კონსულტანტმა კრისტიან აირერმა ლატვიურ გამოცემა Dienas Bizness-ს განუცხადა.

თინა შავაძე

24 საათი 31.01.12

აირერის თქმით, ფინეთში უძრავი ქონების ყიდვა შემდეგში იჯარით გაცემის მიზნით, მეწარმეობის ტრადიციული და გავრცელებული ფორმაა, თუმცა ცოტა ხნის წინ იმაზე ალაპარაკდნენ, რომ ფინეთში უძრავ ქონებაში კაპიტალის ჩადება უკვე მიმზიდველი აღარ არის.

უძრავი ქონების მესაკუთრეები ჩადებული კაპიტალიდან, მაქსიმუმ, 3-4%-ის მოგებას იღებენ. გასათვალისწინებელია ის ფაქტიც, რომ ქონების ღირებულება მცირდება, ვიდრე იზრდება. რაც შეეხება უძრავი ქონების ბაზარს ბალტისპირეთის ქვეყნებში, ტალინში შესაძლებელია 5-7% მოგების მიღება და ამავე დროს ქონების ღირებულება იზრდება. ხალხი ტალინში ბინებს ეძებს, რათა კაპიტალი დააბანდოს.

უძრავი ქონების სააგენტოს ინფორმაციით, ფინელ კლიენტებს შორის ერთ-ერთი უმსხვილესი საინვესტიციო ფონდია, რომელმაც ტალინში 4 საცხოვრებელი ბინა უკვე იყიდა და 16 კიდევ ეძებს. აირერის თქმით: "ბინები, რომლებიც ფინელი კლიენტების მოთხოვნებს დააკმაყოფილებს, ცოტაა, ეს არც არის გასაკვირი და მათ მოძებნას სერიოზული მუშაობა სჭირდება. ამიტომ, 25 ფინელი ახლა რიგში დგას, რათა ტალინის ცენტრში ბინა შეიძინოს."

უძრავი ქონების კომპანია Arco Real Estate გამგეობის წევრ მარისა ლაუკალეისის აღიარებით, 2011 წელს ლატვიის უძრავი ქონების ბაზარი არათანაბრად ვითარდებოდა: საცხოვრებელ ბინებზე ფასები ზრდა ახლად აშენებულ სახლებში და რიგის ცენტრში აღინიშნებოდა, ხოლო რიგისა და იურმალას გარეუბნებში, ასევე რეგიონებში გაყიდვების დინამიკა აშკარად უარყოფითი იყო.

ბინებზე ფასების სპექტრი ძალიან მაღალია, - აღნიშნავს ლაუკალეისი. რიგის მასივებში საცხოვრებელი ბინის ღირებულება კვ.მ-ზე, საშუალოდ, 583 ევროს შეადგენს. მსგავს ბინებში რეგიონებში ერთ კვ.მ-ში 120 ევროს იხდიან. ექსკლუზიური ბინის ერთი კვ.მ-ის საშუალო ღირებულება იურმალაში 4,5 ათას ევროს შეადგენს.

რეალტორების მტკიცებით, მოსახლეობის ის ნაწილი, რომელსაც გასულ წელს ხელფასი გაუზარდეს და ახლა ფინანსური მდგომარეობა სტაბილური აქვს, საცხოვრებელი ფართის გაუმჯობესებას ცდილობს. ამის გამო პრესტიჟულ უბნებში უძრავ ქონებაზე მოთხოვნა გაიზარდა. ამასთან, ინდუსტრიული ქალაქების მასივებში უძრავ ქონებაზე მოთხოვნა შემცირდა. ამის მიზეზად რეალტორები ამ სეგმეტში ქირიდან მიღებული შემოსავლის შემცირებას ასახელებენ.

2011 წელს, იურმალას უძრავი ქონების ბაზარი ძალიან აქტიური იყო და ის გაყიდვების მოცულობით 2006 და 2007 წლებში არსებულ მდომარეობას გაუთანაბრდა, რასაც ადასტურებს იურმალას საკრებულოს ფინანსთა დეპარტამენტი. საკრებულოს წარმომადგენელ ინგა ბრაჩას განცხადებით, "იურმალას უძრავი ქონების ბაზარი ლატვიის საერთო ბაზრისგან განსხვავდება - იურმალას ბაზარი დეპრესიიდან დიდი ხანია, გამოვიდა, გასულ წელს უძრავ ქონებაზე ფასები, საშუალოდ, 20-45%-ით გაიზარდა.

კომპანია Latio-ს მონაცემებით, 1990 წლის შემდეგ, ბალტიის ზღვის სანაპიროზე ლიელუპედან მელლუჟამდე აშენებული სახლების ფასები 20%-ით გაიზარდა. გასული წლის წარმატებული საზაფხულო საკურორტო სეზონისა და ახალ პროექტებზე გაზრდილი მოთხოვნის შედეგად იომას და ბულდურის ქუჩებზე ქირისა და კომერციული ფართების საფასური მოიმატებს, - აცხადებენ იურმალას საკრებულოში. ოფისების ბაზარი, პირიქით, არააქტიურია, რასაც იურმალას სპეციფიკა და რიგის სიახლოვე განაპირობებს.

სტატიის მისამართი: http://24saati.ge/index.php/category/business/2012-01-31/24743.html