უძრავი ქონების ბაზარზე სარეგისტრაციო ტრანზაქციათა რაოდენობა გაიზარდა

საჯარო რეესტრის ეროვნული სააგენტოს ინფორმაციით, 2012 წლის იანვრის თვეში უძრავი ქონების ბაზარზე სარეგისტრაციო ტრანზაქციათა რაოდენობამ ქვეყნის მასშტაბით 32 450 ერთეული შეადგინა.

24 საათი 04.02.12

იანვრის თვე, 2007-2011 წლების იმავე თვესთან შედარებით, აშკარა ზრდით გამოირჩევა - 2007 წლის იანვართან (19 350 ერთეული სარეგისტრაციო ტრანზაქცია) შედარებით - 67.7%-ით, 2008 წლის იანვართან (21 798 ერთეული სარეგისტრაციო ტრანზაქცია) შედარებით - 48.9%-ით, 2009 წლის იანვართან (15 839 ერთეული სარეგისტრაციო ტრანზაქცია) შედარებით - 104.9%-ით, 2010 წლის იანვართან (20 946 ერთეუ ლი სარეგისტრაციო ტრანზაქცია) შედარებით - 54.9%-ით და 2011 წლის იანვართან (27 864 ერთეული სარეგისტრაციო ტრანზაქცია) შედარებით - 16.5%-ით.

საჯარო რეესტრის ეროვნული სააგენტოს ცნობით, გასულ თვესთან შედარებით სარეგისტრაციო ტრანზაქციების რაოდენობის კლება (32.9%-ით) უჩვეულო არ არის. სეზონური ფაქტორის გათვალისწინებით, თვეებს შორის დეკემბერი უძრავი ქონების ბაზარზე მაქსიმალური აქტიურობით გამოირჩევა, ხოლო იანვარი - მინიმალურით.

2012 წლის იანვრის თვეში სარეგისტრაციო ტრანზაქციების თვის ინდექსიც გაიზარდა და დაფიქსირდა 1.046 დონეზე, რაც წინა წლის იმავე თვის ინდექსს (0.898) მნიშვნელოვნად აღემატება.

აღსანიშნავია, რომ უძრავი ქონების პირველადი და მეორადი ბაზრები შემცირდა წინა თვესთან შედარებით (შესაბამისად, 35.4%-ით და 32.3%-ით), ხოლო გაიზარდა წინა წლის იმავე თვესთან შედარებით (შესაბამისად, 10.9%-ით და 17.7%-ით). 2012 წლის იანვრის თვეში პირველადი სარეგისტრაციო ტრანზაქციების რაოდენობამ 5 747, ხოლო მეორადი სარეგისტრაციო ტრანზაქციების რაოდენობამ 26 703 ერთეული შეადგინა, სარეგისტრაციო ტრანზაქციების თვის ინდექსი კი პირველადი და მეორადი სარეგისტრაციო ტრანზაქციების მიხედვით, შესაბამისად, 0.618 და 1.230 დონეებზე დაფიქსირდა.

რაც შეეხება პირველად და მეორად სარეგისტრაციო ტრანზაქციებს შორის თანაფარდობას, უმნიშვნელოდ გაიზარდა მეორადი სარეგისტრაციო ტრანზაქციების წილი - 2012 წლის იანვარში განხორციელებული სარეგისტრაციო ტრანზაქციების 82.3%-ს მეორადი, ხოლო 17.7%-ს - პირველადი სარეგისტრაციო ტრანზაქციები შეადგენდნენ (2011 წლის იანვარში კი - შესაბამისად 81.4% და 18.6%).

შედარებისათვის - 2011 წლის განმავლობაში ქვეყანაში უძრავ ქონებაზე 510 794 სარეგისტრაციო ტრანზაქცია (საშუალოდ თვეში 42 566 ერთეული) განხორციელდა. მსგავსი აქტიურობა უძრავი ქონების ბაზარზე წინა წლებში არ დაფიქსირებულა: აქამდე პიკურად მიჩნეულ 2010 წელთან შედარებით სარეგისტრაციო ტრანზაქციების რაოდენობა 25.8%-ით, 2009 წელთან შედარებით - 53.5%-ით, 2008 წელთან შედარებით - 47.4%-ით, ხოლო 2007 წელთან შედარებით - 28.5%-ით გაიზარდა.

გასული წლის ბოლოს საერთაშორისო კვლევების კომპანია Knight Frank-მა უძრავი ქონების საერთაშორისო ბაზრის კვლევის საკმაოდ საინტერესო შედეგები გამოაქვეყნა. 2010-2011 წლებში რუსეთში ბინებზე ფასმა 12.1 პროცენტით დაიკლო. ეს ერთ-ერთი ყველაზე დიდი მაჩვენებელია მსოფლიოს მასშტაბით. ამ მხრივ, რუსეთი მხოლოდ ირლანდიის ბაზარს ჩამორჩება, სადაც უძრავი ქონება 12.9 პროცენტით არის გაიაფებული. ანალიტიკოსთა ცნობით, კვლევაში მონაწილე მსოფლიოს 50 ქვეყნიდან, რუსეთისა და ირლანდიის გარდა, რეიტინგში უკრაინა ( -7.8%), კვიპროსი (-7,7%) და ბულგარეთი (-6.4%) მოხვდნენ. კომპანიამ იმ ქვეყნების რეიტინგიც გამოაქვეყნა, სადაც ბინებზე ფასმა ბოლო ერთი წლის განმავლობაში საგრძნობლად მოიმატა. ყველაზე დიდი მაჩვენებელი დაფიქსირდა ჩინეთში (+26.5%), ინდოეთში (+21.3%), ტაივანში (+12.7%), ესტონეთსა (+10.6%) და ისრაელში (+9.7%). აზიაში უძრავ ქონებაზე ფასების ზრდის პარალელურად, შესაბამისმა სამსახურებმა დაიწყეს ზრუნვა ამ პროცესის შესაჩერებლად. ზემოთ აღნიშნული კომპანიის ექსპერტების მოსაზრებით, მიღებული ზომები ეფექტური აღმოჩნდა. ოფისების ფართის გაიაფების მხრივ ლონდონი ლიდერობს, მას ტოკიო მოჰყვება, სამეულს მოსკოვი ასრულებს.

სტატიის მისამართი: http://24saati.ge/index.php/category/business/2012-02-04/24998.html