მეოთხედფინალების დროც მოვიდა

დღეს ჩემპიონთა ლიგის ორი მეოთხედფინალური მატჩი გაიმართება. ლიონში, "სტად ჟერნალზე", წმინდა ფრანგულ დაპირისპირებაში "ოლიმპიკი" "ბორდოს" უმასპინძლებს.

24 საათი 30.03.10

რობენმა შესაძლოა "მანჩესტერის" წინააღმდეგ ვერ ითამაშოს

მიუნხენში კი, "ალიანც არენაზე", ევროპული ფეხბურთის ორი გრანდი, "ბაიერნი" და "მანჩესტერი" დაუპირისპირდებიან ერთმანეთს.

ტურნირის ამ ეტაპზე პროგნოზის გაკეთება უმადური საქმეა და ჩვენც თავს შევიკავებთ. გეტყვით, რომ ფრანგულ დაპირისპირებაში ორივე გუნდი საბრძოლო შემადგენლობით იქნება. რაც შეეხება მიუნხენში გასამართ მატჩს, ლუი ვან გალს შესაძლოა ჰოლანდიელი არიენ რობენი ვერ დაეხმაროს, ბასტიან შვაინშტაიგერი კი დისკავლიფიკაციის გამო ვერ ითამაშებს. ამ ორი ფეხბურთელის არყოფნა მიუნხენელთათვის სერიოზული დანაკლისია. "მანჩესტერს" ამ მნიშვნელოვანი თამაშის წინ რიო ფერდინანდი უბრუნდება. მცირე ტრავმა მოიშუშა რუნიმაც და "ალიანც არენაზე" სერ ალექსი საბრძოლო შემადგენლობით ითამაშებს.

"ჩვენი მეტოქე "ბორდო" არ არის. ჩვენ საკუთარი თავის წინააღმდეგ ვითამაშებთ და თუ ჩვენს თავს არ შევუქმნით პრობლემებს, ნახევარფინალშიც გავალთ. სამშაბათის მატჩში, სულ მცირე, ერთი გოლი მაინც უნდა გავიტანოთ და საკუთარი კარი მშრალად შევინახოთ", - აცხადებს "ლიონის" მეკარე უგო ლორისი.

"კარგია, რომ პირველი თამაში სტუმრად გვაქვს. მიმაჩნია, რომ ეს ჩვენს შანსს ზრდის", - ამბობს "ბორდოს" მთავარი მწვრთნელი ლორან ბლანი.

"უმნიშვნელოვანესი მატჩი გველის. რაც შეეხება დანაკლისს, სეზონის ამ პერიოდს უდანაკარგოდ ვერც ერთი გუნდი ვერ შეხვდებოდა. ასე რომ, განსაკუთრებული არაფერი მომხდარა. "მანჩესტერი" დიდი გუნდია და, წესით, საინტერესო მატჩი უნდა ვნახოთ", - თქვა "ბაიერნის" მთავარმა მწვრთნელმა ლუი ვან გალმა.

"მიხარია, რომ სამშაბათს რუნი და ფერდინანდი თამაშს შეძლებენ. თუ წარმატებაზე ფიქრობ, ამ დონის მატჩში ყველა ფეხუბრთელი მწყობრში უნდა გყავდეს", - ამბობს სერ ალექს ფერგიუსონი.

სტატიის მისამართი: http://24saati.ge/index.php/category/business/finances/2010-03-30/4902.html