ევრომოულოდნელობები

ევრო 2012 დასრულებულია, მაგრამ მასზე საუბარი ალბათ კიდევ გაგრძელდება. ახლა ერთად გადავხედოთ უკრაინა-პოლონეთში გამართული კონტინენტის პირველობის მოულოდნელობათა ტოპ ათეულს.

24 საათი 07.07.12

ტორესს "ოქროს ბუცის" მოსაგებად 189 წუთი ეყო

1. ევროპის ჩემპიონატზე "ოქროს ბუცი" (ჩემპიონატის საუკეთესო ბომბარდირისთვის განკუთვნილი ჯილდო) ფერნანდო ტორესმა მოიგო... თუ გავითვალისწინებთ, რომ ვისენტე დელ ბოსკემ "ელ ნინიო" მხოლოდ ბოლო წუთს ჩართო ესპანელთა განაცხადში და ტურნირზე ტორესი უფრო დიდხანს სათადარიგოთა სკამზე იყო, ვიდრე მონდორზე, ეს, ცხადია, მოულოდნელობაა. ესპანელმა ფორვარდმა ევროპის ჩემპიონატზე სულ 189 წუთი გაატარა მინდორზე და არც ერთ მატჩში არ უთამაშია მთელი 90 წუთი.

2. არანაკლებ ორიგინალური და მოულოდნელი გამოდგა ყველაზე შედეგიანი ასისტენტების კონკურსი. სამი საგოლე გადაცემით ტურნირის ყველაზე შედეგიანი მეპასის ტიტული მოიგო ანდრეი არშავინმა, რომელმაც საგოლე გადაცემები რუსეთის ნაკრების პირველ ორ მატჩში გააკეთა. დავიდ სილვამ და მესუთ იოზილმა ასევე სამ-სამი შედეგიანი გადაცემა მიითვალეს. პირველმა ტურნირზე ექვსი მატჩი გამართა, მეორემ - ხუთი. არშავინის ანაგრიშზე კი სამი შეხვედრაა.

3. ესპანეთის ნაკრებმა ტურნირის წინ დაცვის ლიდერი კარლეს პუიოლი დაკარგა. მიუხედავად ამისა, "ფურია როხამ" ჩემპიონის ტიტული მოიგო. ამასთან, ესპანელთა დაცვა ტურნირზე ყველაზე საიმედო იყო. ვისენტე დელ ბოსკეს შეგირდებმა ევროპის პირველობაზე ერთადერთი გოლი გაუშვეს. იკერ კასილასის კარში გოლის გატანის პატივი ვეტერან იტალიელ ფორვარდს ანტონიო დი ნატალეს ერგო. ეს ტურნირის პირველივე მატჩში მოხდა. მაშინ ალბათ ვერავინ წარმოიდგენდა, რომ სერხიო რამოსის, პიკეს, ალბიოლის და ალბას კვარტეტი ტურნირს ისე დაასრულბდა, რომ კასილასს თავისი კარიდან ბურთის გამოტანა აღარ დასჭირდებოდა.

4. ტურნირის საუკეთესო ფეხბურთელად დასახელებულმა ანდრეს ინიესტამ გოლი პლუს პასის სისტემით მთელ ჩემპიონატზე ერთადერთი ქულა დააგროვა. მისივე თანაგუნდელმა დავიდ სილვამ ტურნირი 5 ქულით დაასრულა.

5. მთელი ტურნირის განმავლობაში პირდაპირ საჯარიმო დარტყმით ერთადერთი გოლი გავიდა. ხორვატებთან მატჩში თავი გამოიჩინა ანდრეა პირლომ. თუ გავითვალისწინებთ, რომ ევროპის პირველობაზე ჯარიმებიც ბლომად ინიშნებოდა და საჯარიმოების შესრულების ოსტატებიც მრავლად იყვნენ, ერთი გოლი, ცხადია, მოულოდნელობაა.

6. უეფას მიერ გავრცელებული ოფიციალური ინოფორმაციით, ევროპის ჩემპიონატზე არც ერთ მატჩში არ ყოფილა სრული ანშლაგი. ტურნირის ყველა მატჩზე ტრიბუნებზე იყო თავისუფალი ადგილები. კიევის ოლიმპიურ სტადიონზე კი 65 ათას მაყურებელზე მეტი არც ერთ თამაშზე არ მივიდა. არადა, სტადიონი 70 050 გულშემატკივარს იტევს. ფინალს 63 170 გულშემატკივარი დაესწრო. ამ სტადიონზე ამაზე ნაკლები მაყურებელი მხოლოდ შვედეთ-საფრანგეთის მატჩზე მივიდა.

7. ევროპის ჩემპიონატის მსვლელობისას ფეხბურთელებს სულ სამჯერ უჩვენს წითელი ბარათი. ტურნირის სასტარტო მატჩში ესპანელმა არბიტრმა ველასკო კარბალიომ ბერძენი სოკრატის პაპასტოპულოსი და პოლონელი ვიოცეხ შჩესნი გააძევა. დარჩენილ 30 მატჩში კი მხოლოდ ერთი ფეხბურთელი იქნა გაძევებული. ეს იყო ირლანდიელი ჯუნეიტ ჩიკირი, რომელიც ირლანდია-იტალიის მატჩში "გააწითლეს".

8. ჰოლანდიის ნაკრებმა ყველა დროის ანტირეკორდი დაამყარა. "ნარინჯისფერები" ყველაზე ძვირად ღირებული ნაკრებია ფეხბურთის ისტორიაში, რომელმაც ევროპის ჩემპიონატის ფინალურ ეტაპზე ერთი ქულაც კი ვერ აიღო. ჰოლანდიის ნაკრების ფეხბურთელთა საერთო ღირებულება ტურნირის დაწყებამდე 277 მილიონ ევროს უტოლდებოდა.

9. ამავე ნაკრების მცველმა ჯეტრო უილიამსმა ბელგიელი ენცო შიფოს რეკორდი მოხსნა. შიფოს დებიუტი ევროპის ჩემპიონატების ფინალურ ეტაპზე 18 წლისა და 115 დღის ასაკში შედგა. ჯეტრო კი ტურნირის პირველ მატჩში ჰოლანდია-დანიას შორის 18 წლის და 93 დღის იყო.

10. კოკისპირული წვიმის გამო უკრიანა-საფრანგეთის მატჩი, რომელიც "დონბას არენაზე" იმართებოდა, დაწყებიდან ოთხ წუთში შეწყდა და 58 წუთის შემდეგ განახლდა. მანამდე ევროპის ჩემპიონატების ფინალურ ეტაპებზე თამაშები არასდროს შეწყვეტილა.

სტატიის მისამართი: http://24saati.ge/index.php/category/business/real_capital/2012-07-07/30453.html