სელინჯერის ახალი პორტრეტები

ჟურნალმა The New Yorker არაერთი გააკვირვა, გამოაქვეყნა რა ჯერომ სელინჯერის აქამდე უცნობი ფოტოები.

24 საათი 04.02.10

ფოტოები 1960 წელს არის გადაღებული. მათი მნიშვნელობა მაშინ ხდება გასაგები, თუკი კიდევ ერთხელ მოვიგონებთ იმას, რომ 1965 წლიდან გარდაცვალებამდე, ანუ 2010 წლის 27 იანვრამდე მწერალი კარჩაკეტილ ცხოვრებას ეწეოდა და ჟურნალისტებთან ყოველგვარ კავშირს გაურბოდა. ამიტომაც იყო, რომ სელინჯერის ხატებად 1951 წელს გადაღებული ოფიციალური ფოტოპორტრეტი გახდა და კიდევ ერთი, გვიანი, ოდნავ სასაცილო, - მუშტმოღერებული მწერალი შევერცხლილი თმით.

აქამდე უცნობი ფოტოები ჟურნალის რედაქციამ 91 წლის ჟურნალისტის, ლილიან როსსის არქივიდან ამოიღო. როსსი სწორედ The New Yorker-თან თანამშრომლობდა წლების განმავლობაში და საკუთარი იშვიათი "ქონება" სწორედ მშობლიურ ჟურნალს უსახსოვრა. რაც შეეხება ფოტოების წარმომავლობას, ლილიან როსსი თურმე წლების განმავლობაში მეგობრობდა სელინჯერთან. ფოტოებზე სელინჯერი შვილთან და თავად ჟურნალისტ ქალბატონთან ერთად ჩანს. ამას გარდა The New Yorker აქვეყნებს როსსის მოგონებებს სელინჯერზე.

აღსანიშნავია ისიც, რომ 1 თებერვალს სმიტსონიანის ინსტიტუტის მუზეუმთან არსებული პორტრეტის ეროვნულ მუზეუმში გამოფინეს რობერტ ვიკერის მიერ 1961 წელს შესრულებული ფერწერული სურათი - ჯერომ სელინჯერის პორტრეტი, რომელიც მხატვარმა სპეციალურად ჟურნალ Time- ის გარეკანისთვის შექმნა. პორტრეტის ფონად გამოყენებულია სელინჯერის ცნობილი რომანის "თამაში ჭვავის ყანაშის" მოტივები.

სტატიის მისამართი: http://24saati.ge/index.php/category/culture/2010-02-04/3268.html