კათალიკოს-პატრიარქმა პაატა ბურჭულაძე დააჯილდოვა

სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ქართველი საოპერო მომღერალი და საზოგადო მოღვაწე, პაატა ბურჭულაძე დააჯილდოვა.

24 საათი 01.03.10

საქველმოქმედო საქმიანობაში შეტანილი წვლილისათვის ბურჭულაძეს მართლმადიდებლური ეკლესიის უმაღლესი ჯილდო, - წმინდა გიორგის ოქროს ორდენი გუშინ, 28 თებერვალს, სამების საკათედრო ტაძარში გადაეცა. ცერემონია ტაძარში საკვირაო წირვის დასრულების შემდეგ გაიმართა, მას მრევლთან ერთად სინოდის წევრებიც ესწრებოდნენ.

ქართველი საოპერო მომღერლის განცხადებით, მისთვის ეს ჯილდო დიდი პატივია, რისთვისაც მან პატრიარქსა და ქართულ საზოგადოებას მადლობა გადაუხადა.

"უბედნიერესი ადამიანი ვარ და ეს არც არის გასაკვირი. მინდა პატრიარქს და სრულიად საქართველოს დიდი მადლობა გადავუხადო. ვეცდები ეს ჯილდო გავამართლო", - განუცხადა ბურჭულაძემ ჟურნალისტებს.

შეგახსენებთ, რომ მომღერლის წმინდა გიორგის ოქროს ორდენით დაჯილდოების შესახებ ილია მეორემ, 25 თებერვალს, ფონდ "იავნანას" საქველმოქმედო კონცერტზე განაცხადა.

სტატიის მისამართი: http://24saati.ge/index.php/category/culture/2010-03-01/4010.html