"დასავლეთიდან აღმოსავლეთამდე" ქარვასლაში

საქართველოს ეროვნული მუზეუმი, თბილისის ისტორიის მუზეუმი დღეს, 8 მაისს, 17:00 საათზე წარმოგიდგენთ ფოტოგამოფენას "დასავლეთიდან აღმოსავლეთამდე".

24 საათი 08.05.12

ფოტოგამოფენის ავტორია მარიუს ვიდერინსკი. გამოფენა ასახავს პოლონური მართლმადიდებლური ეკლესიის ყოველდღიურობას, რომელიც მოიცავს თორმეტი მოციქულის ქრონოლოგიურად წარმოსახულ მოღვაწეობას ფოტოების სახით.

მარიუს ვიდერინსკი გახლავთ ვარშავის ხელოვნების აკადემიის ფოტოგრაფიის ფაკულტეტის ლექტორი, ალტერნატიული ტექნიკის ფოტოგრაფიის ლაბორატორიის გამგე, ვარშავის კინოსკოლის პროფესორი, "პოლონელ ფოტოგრაფთა გაერთიანების" პრეზიდენტი. პოლონეთში და მის საზღვრებს გარეთ გამართული ოთხმოცდაათზე მეტი ფოტოგამოფენის ინიციატორი და კურატორი, პლენერებისა და ფოტოგრაფიული ვორკშოპების ორგანიზატორი, საერთაშორისო ფოტოკონკურსების ჟიურის წევრი, ასევე კონცერტების სერიის ინიციატორი, სახელწოდებით "ფოტოგრაფიული შედეგები".

მისი ნამუშევრები დაიბეჭდა დაახლოებით ოცდაათამდე ალბომში.

გამოფენის კურატორია მიხაი ბოგუცკი - ვარშავის მართლმადიდებლური ხატების მუზეუმის დირექტორი. 2007 წლიდან თანამშრომლობს საქართველოს ეროვნულ მუზეუმთან; თბილისის ისტორიის მუზეუმთან ერთად განახორციელა პროექტები: "პოლონური ფოლკლორის გამოფენა", "პოლონური არქიტექტურის გამოფენა".

რელიგიურ თემაზე შექმნილ ფოტოგამოფენას დაესწრება ავტორი მარიუს ვიდერინსკა და პოლონეთის მართლმადიდებლური მუზეუმის დირექტორი მიხაი ბოგუცკი.

სტატიის მისამართი: http://24saati.ge/index.php/category/culture/2012-05-08/28404.html