დღეს საოპერო ფესტივალი იწყება

9-25 ივლისს კონსერვატორიის დიდ დარბაზში პირველად გაიმართება საერთაშორისო ფონდის "თბილისის ოპერისა და ბალეტის თეატრის" მიერ დაფუძნებული "თბილისის საოპერო ფესტივალი". ფესტივალი დღეს საღამოს იწყება.

24 საათი 09.07.12

"თბილისის საოპერო ფესტივალი" ოთხ ღონისძიებას მოიცავს. დღეს საღამოს გაიმართება კონცერტი, რომლის პროგრამაშია პეტრე ჩაიკოვსკის "სერენადა" სიმებიანი ორკესტრისთვის და კონცერტი ვიოლინოსა და სიმფონიური ორკესტრისთვის. შემდგომი სამი საღამო დაეთმობა ჯუზეპე ვერდის ოპერებს - 15 ივლისს შესრულდება "ნაბუქო", 20 ივლისს "ატილა", 25 ივლისს "ტრუბადური" (წარმოდგენილი იქნება ოპერების საკონცერტო ვერსიები).

"თბილისის საოპერო ფესტივალის" საბაზო კოლექტივია ზაქარია ფალიაშვილის სახელობის ოპერისა და ბალეტის სახელმწიფო თეატრი, მისი სოლისტები, გუნდი (მთავარი ქორმაისტერი - ავთანდილ ჩხენკელი, ქორმაისტერი - შალვა შაორშაძე), სიმფონიური ორკესტრი (კონცერტმაისტერი - ლელა მჭედლიძე). ფესტივალის სპეციალური სტუმრები არიან - სახელგანთქმული ახალგაზრდა მევიოლინე ვალერი სოკოლოვი, ანტონინის უნივერსიტეტის გუნდი (ბეირუთი, ლიბანი), საზღვარგარეთ წარმატებით მოღვაწე ახალგაზრდა ქართველი მომღერალი რამაზ ჩიკვილაძე, რომელიც ატილას პარტიას შეასრულებს ვერდის "ატილაში", სადაც თბილისის ოპერის თეატრის გუნდთან ერთად იმღერებს ანტონინის უნივერსიტეტის გუნდიც. "თბილისის საოპერო ფესტივალის" აუდიტორია შეხვდება ოპერის თეატრის სოლისტებს: გია ასათიანს, მაყვალა ასპანიძეს, სულხან გველესიანს, გოჩა დათუსანი-ჯიღაურს, არმაზ დარაშვილს, თეა დემურიშვილს, ლეგი იმედაშვილს, მანანა იორდანიშვილს, ნიკოლოზ ლაგვილავას, გიორგი მახარაძეს, ირაკლი მურჯიკნელს, ელენა პუტილოვას, ირინე რატიანს, თამაზ საგინაძეს, მიშელინა ქობალიანს, ტარიელ ჭიჭინაძეს, ზაალ ხელაიას, ანზორ ხიდაშელს. საფესტივალო საღამოებს წარუძღვება იტალიელი დირიჟორი, თბილისის ოპერისა და ბალეტის სახელმწიფო თეატრის მუსიკალური ხელმძღვანელი ჯანლუკა მარჩანო.

- "საუკუნეების მანძილზე თბილისს საოპერო ხელოვნების ჭეშმარიტ კერად მიიჩნევდნენ. ქართული ვოკალური სკოლის წარმომადგენლები დღესაც ბრწყინავენ მსოფლიო საოპერო სცენებზე და აღაფრთოვანებენ ოპერის მოყვარულებს.

საოცარია "ოპერის სამყარო" ათასგვარი ამბებით - კომპოზიტორთა, დირიჟორთა, მომღერალთა "თავგადასავლებით" აღსავსე...

ამ ხელოვნების მიმართ უზომო სიყვარულმა მაფიქრებინა საოპერო ფესტივალის შექმნა. თუმცა, ეს ჩემი ან ჩვენი თეატრის პირდაპირი მოვალეობა არ გახლავთ. ვოცნებობდით გამოჩენილიყო ვინმე, ვინც დააფუძნებდა ფესტივალს, სადაც სხვებთან ერთად, ჩვენ ერთ-ერთ მონაწილედ მოგვიწვევდა ყოფნა. მოგეხსენებათ, მაღალი რანგის ფესტივალის ჩატარებას ძალიან დიდი შრომა, ბევრი ადამიანი და თავდადება სჭირდება. ამ საქმის ხორცშესხმას ახალი ორგანიზაცია და სტრუქტურა სჭირდება. დიდხანს ველოდე იმ ადამიანს, რომელიც შექმნიდა საქართველოში, - სადაც სამი საოპერო თეატრია, - საერთაშორისო ფესტივალს, მაგრამ მიუხედავად ბევრი ლაპარაკისა, ასეთი მაინც არავინ გამოჩნდა...

და აი, მე და ჩემმა მეგობრებმა: ჩვენი ოპერის სოლისტებმა, ორკესტრის მუსიკოსებმა, ადმინისტრაციის წევრებმა, გადავწყვიტეთ დამოუკიდებლად დაგვეარსებინა "თბილისის საოპერო ფესტივალი", - ჯერჯერობით მოკრძალებული მასშტაბით, მაგრამ ჩვენი თეატრისთვის ისტორიულად უმნიშვნელოვანეს პერიოდში!ვიმედოვნებ, რომ ამ ფესტივალს საუკუნეების მანძილზე ეყოლება ერთგული მაყურებელი.

თქვენ კი, ძვირფასო სტუმრებო, გისურვებთ, რომ არსად წასვლა და ხეტიალი არ მოგიწიოთ ნამდვილი, ჭეშმარიტი საოპერო თავგადასავლების საძიებლად და ეს ყველაფერი ჩვენს "თბილისის საოპერო ფესტივალზე" გეპოვოთ!", - ამბობს ფესტივალის დამფუძნებელი დავით საყვარელიძე. «

24 საათი»

სტატიის მისამართი: http://24saati.ge/index.php/category/culture/2012-07-09/30470.html