"სალვადორ დალის კიდევ ერთი შოუ

ჟან-კლოდ ვალეტი:

24 საათი 05.03.10

ჟან-კლოდ ვალეტი:

გასული საუკუნის 60-იან წლებში ახალგაზრდა და ჯერ კიდევ უცნობი ფრანგი ფოტოგრაფი ჟან-კლოდ ვალეტი ესპანეთში, ალმერიაში მიემგზავრება ცნობილი ესპანელი სურეალისტი მხატვრის სალვადორ დალის პორტრეტების სერიის გადასაღებად. ცნობილი მხატვრის სახლში გატარებული რამდენიმე საათის შედეგად შეიქმნა დალის პორტრეტების მორიგი საინტერესო სერია, რომელშიც ექსტრავაგანტური სურეალისტი უცნობი ფოტოგრაფის ობიექტივის წინ კიდევ ერთი, მისთვის ჩვეული ექსცენტრიკული წარმოდგენის მთავარი და ერთადერთი მოქმედი პირი გახდა. დალის შოუ შედგა. შედგა ფოტოსესიაც, რომელსაც ჟან-კლოდ ვალეტი იხსნებს...

“60-იან წლებში პარიზში რამდენიმე კუბელი მოცეკვავე მეგობარი მყავდა. ერთხელ საუაბრში წამომცდა, რომ ესპანეთში, ალმერიაში ვაპირებდი წასვლას. მათ შემომთავაზეს, რომ ალმერიაში ჩასვლისთანავე მათი სახელით მივსულიყავი სალვადორ დალისთან, რომელიც იმ დროს ალმერიაში ცხოვრობდა.

ერთ მშვენიერ დღეს მართლაც გავემგზავრე ალმერიაში. ეს მოხდა 1964 წლის ივლისში. მივედი დალისთან, ვუთხარი, ვინც ვიყავი. ისიც ვუთხარი, რომ ჩემმა კუბელმა მეგობრებმა შემაგულიანეს, მასთან სტუმრად მივსულიყავი და ფოტოსესია ჩამეტარებინა.

არაჩვეულებრივად მიმიღო. არც დაფიქრებულა, ისე დამთანხმდა გადაღებაზე, მიუხედავად იმისა, რომ ახალგაზრდა და მისთვის სრულიად უცნობი ფოტოგრაფი ვიყავი.

ფოტოსესია სამ საათს გაგრძელდა. დალი სიამოვნებით პოზირებდა, რადგან ძალიან უყვარდა კამერის წინ პოზირება. ბევრს ხუმრობდა, თამაშობდა თავისი გარეგნობით, მიმიკით და ჟესტებით. ძალიან თავისუფლად და ბუნებრივად გრძნობდა თავს. მის ბუნებრიობაში დიდი ექსტრავაგანტურობაც იყო, რომელსაც ის ყოველთვის სიამოვნებით ამძაფრებდა ობიექტივის წინ.

ეს სესიაც, ისევე როგორც ყველა სხვა გადაღება, მისთვის შოუდ იქცა, ჩემთვის კი, ახალგაზრდა და დამწყები ფოტოგრაფისთვის - დაუვიწყარ შთაბეჭდილებად.”

სტატიის მისამართი: http://24saati.ge/index.php/category/culture/art/2010-03-05/4136.html