ცესკო-მ მედიას საქმიანობის შესახებ ყოველკვირეული ანგარიში წარუდგინა

ცენტრალურმა საარჩევნო კომისიამ საქმიანობის შესახებ მედიის წარმომადგენლებს ყოველკვირეული ანგარიში წარუდგინა.

24 საათი 03.03.10

ამ ინფორმაციას სააგენტო "ინტერპრესნიუსი" ავრცელებს.

როგორც ცესკო-ს პრესსპიკერმა ჯული გიორგაძემ გუშინდელ ბრიფინგზე განაცხადა, კომისია მაქსიმალურად ეხმარება სიების მონიტორინგის პროცესში მონაწილე პოლიტიკურ პარტიებს. ასევე, თანახმაა, მონიტორინგის პროცესი, ამ პარტიების მოთხოვნის შესაბამისად, 10 დღის ვადით გახანგრძლივდეს.

ამასთან, გიორგაძის განცხადებით, თანამედროვე საკომუნიკაციო საშუალებების დანერგვისა და განვითარებისთვის ცესკო-ში საარჩევნო ადმინისტრაციის წევრებით დაკომპლექტებული სამუშაო ჯგუფი შეიქმნა. ჯგუფის წევრები მუშაობენ საარჩევნო უბნების ვიდეოთვალით აღჭურვის საკითხზე, ცესკო-ს ვებსერვერების გაძლიერებასა და საარჩევნო ადმინისტრაციის შიდა საკომუნიკაციო ქსელით აღჭურვაზე.

მისივე თქმით, ადგილობრივი თვითმმართველობის არჩევნების გამჭვირვალედ წარმართვისა და ამომრჩეველთა ერთიანი სიების მონიტორინგის სრულყოფისთვის ცენტრალურ საარჩევნო კომისიაში კიდევ ერთი სამუშაო ჯგუფი შეიქმნა. ჯგუფმა სამუშაო შეხვედრებზე ამომრჩეველთა ერთიან სიაში არსებული პრობლემები და წარმოდგენილი შენიშვნები განიხილა.

"საარჩევნო პროცესებში ასევე ჩართულია ტექნიკურ სამუშაო ჯგუფი, რომელიც საერთაშორისო და ადგილობრივ არასამთავრობო ორგანიზაციებს მოიცავს", - განაცხადა მან და დასძინა, რომ ამ კვირაში დაგეგმილია მუშაობა ცესკოს 2010-2011 წლის სამოქმედო სტრატეგიაზე.

სტატიის მისამართი: http://24saati.ge/index.php/category/news/2010-03-03/4093.html