საქართველომ და ბრუნეიმ დიპლომატიური ურთიერთობები დაამყარეს

საქართველომ და ბრუნეიმ ხელი მოაწერეს ერთობლივ კომუნიკეს დიპლომატიური და საკონსულო ურთიერთობების შესახებ.

24 საათი 03.03.10

ერთობლივი კომუნიკეს თანახმად, საქართველო და ბრუნეი დარუსალამი ორმხრივ ურთიერთობებს განავითარებენ ტერიტორიული მთლიანობის, საზღვრების ურღვევობისა და სუვერენული თანასწორობის პრინციპების შესაბამისად. საქართველოს საგარეო უწყების ინფორმაციით, 2010 წელს ეს უკვე მე-7 სახელმწიფოა, რომელთანაც საქართველომ დიპლომატიური ურთიერთობები დაამყარა. მანამდე დიპლომატიური ურთიერთობები დამყარდა ბოტსვანასთან, დომინიკის რესპუბლიკასთან, კაბო-ვერდესთან, მარშალის კუნძულებთან, პერუსთან და სენტ ლუჩიასთან.

ორ სახელმწიფოს შორის დიპლომატიური ურთიერთობების დამყარების შესახებ მხარეებმა ერთობლივი წერილით აცნობეს გაერო-ს გენერალურ მდივან ბან კი მუნს. "ინტერპრესნიუსის" მიმართულებით, დიპლომატიური ურთიერთობების დამყარების შესახებ ერთობლივ კომუნიკეზე ხელმოწერის ცერემონიალი გაიმართა ნიუ იორკში, გაერთიანებული ერების ორგანიზაციასთან საქართველოს მუდმივ წარმომადგენლობაში. ბრუნეის მხრიდან დოკუმენტს ხელი მოაწერა მუდმივმა წარმომადგენელმა გაერთიანებული ერების ორგანიზაციასთან ლატიფ ტუახმა, ხოლო, საქართველოს მხრიდან - საქართველოს მუდმივმა წარმომადგენელმა გაერთიანებული ერების ორგანიზაციაში ალექსანდრე ლომაიამ.

სტატიის მისამართი: http://24saati.ge/index.php/category/news/2010-03-03/4114.html