ჟურნალისტიკა - პოლიტიკის "სამჭედლო"

"ქრისტიან-დემოკრატიული" მოძრაობა თბილისის საკრებულოს თავმჯდომარედ ინგა გრიგოლიას კანდიდატურას წარადგენს.

24 საათი 11.03.10

ორთვიანი მოლაპარაკებების შემდეგ ინგა გრიგოლიამ დიდუბე-ჩუღურეთის შუალედურ არჩევნებში მაჟორიტარ კანდიდატობაზე უარი განაცხადა, თუმცა ის "ქრისტიან-დემოკრატების" სიაში პირველ ადგილს დაიკავებს.

"ქრისტიან-დემოკრატების" ლიდერ გიორგი თარგამაძის აზრით, გრიგოლია არის ის კადრი, რომელიც პოლიტიკას სჭირდება, მისი რესურსი და უცხოეთში მიღებული ცოდნა სახელმწიფოს სამსახურში უნდა იყოს გამოყენებული. "ქრისტიან-დემოკრატების" აზრით, გაბედულება, ცოტა აგრესიულობა, რადიკალურობა ის თვისებებია, რომელიც გრიგოლიას ახასიათებს და ქართულ პოლიტიკას აკლია. პრესკონფერენციას ესწრებოდა "ქრისტიან დემოკრატების" მერობის კანდიდატი გია ჭანტურია, რომელმაც საკრებულოს თავმჯდომარის თანამდებობაზე ინგა გრიგოლიას წარდგენის შესახებ აზრი გამოთქვა და განაცხადა, რომ ქალი, დედა ყველაზე კარგად გაიგებს საზოგადოების გასაჭირს და დაუდგება ხალხს გვერდში, მით უმეტეს, როდესაც ინგა გრიგოლიაზეა საუბარი. ჭანტურიამ აგრეთვე განაცხადა, რომ იმ შემთხვევაში, თუ არჩევნებში გაიმარჯვებს, ტარიფების დაწევის და დარეგულირების ხარჯზე შეეცდება, ჩვენი ქვეყანა ეკონომიკური კრიზისიდან გამოიყვანოს.

ინგა გრიგოლია ამჟამად ინგლისში იმყოფება და დღესდღეობით უშუალოდ ვერ მონაწილეობს პოლიტიკურ პროცესებში, თუმცა როგორც გუშინ შევიტყვეთ, მას თანამედროვე ტექნიკის დამსახურებით აუცილებლად ვიხილავთ სხვადასხვა დებატებსა თუ გადაცემებში. "ქრისტიან-დემოკრატების" კანდიდატი საქართველოში 30 მარტს დაბრუნდება.

სტატიის მისამართი: http://24saati.ge/index.php/category/news/2010-03-11/4208.html