ყველაზე დიდი მარში

საქართველოს პრეზიდენტი აშშ-ში ვიზიტს აგრძელებს.

მარი ახსიაშვილი

24 საათი 04.02.12

საქართველოს პრეზიდენტი აშშ-ში ვიზიტს აგრძელებს.

მიხეილ სააკაშვილმა მერილენდის შტატის ქალაქ ბეთეზდაში, სამხედრო ძალების ჰოსპიტალში, ვიცე-პოლკოვნიკი ალექსანდრე ტუღუში მოინახულა და მამაცობისთვის ვახტანგ გორგასლის სახელობის პირველი ხარისხის ორდენი გადასცა. საქართველოს პრეზიდენტის განცხადებით, საქართველოსა და ამერიკის სამხედრო თანამშრომლობა სრულიად ახალ ეტაპზე გადადის, რაც იმას გულისხმობს, რომ საქართველო საკუთარ თავს უკეთ დაიცავს.

"უნდა გვესმოდეს - ახლა მიღებულია გადაწყვეტილება, რომ სამხედრო თანამშრომლობა გადავიდეს საერთოდ ახალ, სხვა ეტაპზე და საკუთარი თავის დაცვით რეალურად დავკავდეთ. ეს იმის გაგრძელებაა, რაც აქამდე ავღანეთში ხდებოდა. ტყუილად არაფერს ჩაუვლია. ჩვენი მთავარი დასაცავი და საზრუნავი საქართველოა. ეს ბიჭები ავღანეთში, პირველ რიგში, საქართველოსთვის არიან. მე ამაყი ვარ, რომ საუკუნეებმა და ჩვენი მტრების მცდელობამ ვერ ჩაკლა მებრძოლი სული, მეომრის სული და ეს, საბოლოო ჯამში, არის ის, რაც გადაარჩენს საქართველოს გრძელვადიანად და რაც აქცევს მას წარმატებულ და ძლიერ ქვეყნად," - განაცხადა მიხეილ სააკაშვილმა.

მისივე თქმით, რამდენად წარმოუდგენლად დიდი ტრაგედიაც არ უნდა იყოს ავღანეთის ოპერაციაში ქართველი ჯარისკაცებისა და ოფიცრების სიცოცხლის დანაკარგი, ეს ფასდაუდებელი გამოცდილებაა საქართველოს შეიარაღებული ძალებისთვის. "ავღანეთის ოპერაციაში მონაწილეობით საქართველოს არმია ძლიერდება," - დასძინა სააკაშვილმა.

საქართველოს პრეზიდენტი ჯორჯთაუნის უნივერსიტეტშიც გამოვიდა სიტყვით. მან საქართველოს ისტორიაზე, ქვეყნის ადგილმდებარეობაზე, მსოფლიო მნიშვნელობასა და ქვეყანაში გატარებულ რეფორმებზე ისაუბრა.

პრეზიდენტის თქმით, საქართველო პატარა ქვეყანაა, ზოგისთვის - ყველაფრისგან მოწყვეტილი ადგილი. 90-იან წლებში ჩვენი ქვეყნის შესახებ არავინ არაფერი იცოდა და მისი სახელის ხსენებისას ყოველთვის საჭირო ხდებოდა იმის ახსნა, რომ ეს არის არა ამერიკის შტატი ჯორჯია, არამედ სხვა ქვეყანა - საქართველო.

"ყველაზე დიდი მარში, რომელიც უკანასკნელი 15 წლის განმავლობაში მოვაწყვეთ, ის არის, რომ მსოფლიო რუკაზე საკუთარი ადგილი დავიმკვიდრეთ," - განაცხადა მიხეილ სააკაშვილმა. მანვე დასძინა, რომ რეფორმების საკითხში დათმობაზე წასვლა ყოველთვის ინანა.

"მე იღბლიანი ვარ, რადგან რეფორმების შანსი რამდენჯერმე მომეცა. აქედან ერთი რამ ვისწავლე - არ გადადო საქმე და ნუ იფიქრებ, რომ პოპულარული ხარ. ასე რომ, ჩემი რჩევა იქნება, თუ გაქვს შანსი რაღაცის შესაცვლელად, გამოიყენე, რათა მოგვიანებით აღარ მოგიწიოს მასთან დაბრუნება," - განაცხადა საქართველოს პრეზიდენტმა და შენიშნა, რომ მან რეფორმების გატარებისას შესაძლოა, შეცდომებიც დაუშვა, მაგრამ საქართველო რეფორმების შემდეგ რადიკალურად შეიცვალა.

"ჩვენი ეკონომიკა გაოთხმაგებულია. დანაშაული ხუთჯერ შემცირდა. სიღარიბის მაჩვენებელი 17%-მდე შემცირდა. მიმდინარეობს მთელი ჯანდაცვისა და განათლების სისტემის მოდერნიზება. ავაშენეთ ახალი გზები, გაიზარდა შობადობის მაჩვენებელი. არ მეგულება არც ერთი ქვეყანა, რომელიც დიდ პროგრესს ასეთ მოკლე დროში მიაღწევდა," - განაცხადა სააკაშვილმა.

მან "ვარდების რევოლუციამდელი" პერიოდი და რეფორმების პირველი ნაბიჯებიც გაიხსენა. პროცესი საკმაოდ რთული იყო, რადგან არ გვქონდა ელექტროენერგია, გათბობა, ხელფასები და სუფევდა კორუფცია, - შენიშნა პრეზიდენტმა.

"თუკი ამის ნახვა გსურთ, რუსეთში წადით, ასეთი რამ იქ ახლაც ხდება. ამის სანახავად დროში მოგზაურობა არ დაგჭირდებათ. არავინ იხდიდა გადასახადებს. "ვარდების რევოლუციის" შედეგად, რომელმაც ჩვენ გადაგვარჩინა, ხელისუფლებაში ახალი გუნდი მოვიდა. კარგი იქნება, თუ ეს გუნდი კვლავაც ახალგაზრდა დარჩება," - აღნიშნა სააკაშვილმა და დასძინა, რომ მუდმივად ცდილობს ახალგაზრდა კადრების შემოერთებას.

მანვე განაცხადა, რომ მისი პირველი საპრეზიდენტო ხელფასი 40 დოლარს შეადგენდა. სააკაშვილმა აღნიშნა, რომ მისი ხელისუფლებაში მოსვლის დროს ქვეყნის ხაზინა ცარიელი იყო.

გარდა ამისა, საქართველოს პრეზიდენტმა პოლიციასა და სხვა უწყებებში გატარებულ რეფორმებზეც ისაუბრა და დასძინა, რომ ხელისუფლებამ საზოგადოებისთვის მიცემული პირობა შეასრულა.

"ახლა პოლიციას მოსახლეობის ნდობის 86% აქვს, მაშინ როცა ძველ პოლიციას ნდობის მხოლოდ 5% ჰქონდა," - განაცხადა პრეზიდენტმა და შენიშნა, რომ ეს ევროპის მასშტაბით უმაღლესი მაჩვენებელია და საქართველო ზოგჯერ ფინეთსა და დანიასაც კი უწევს კონკურენციას.

მიხეილ სააკაშვილის თქმით, დღესაც კი, რუსეთის მაფიის ხელმძღვანელების 70% საქართველოდანაა, მაშინ როდესაც დანაშაულის მაჩვენებელი საქართველოში 5-ჯერ უფრო დაბალია, ვიდრე რუსეთში.

"ევროკავშირის სანდო კვლევების თანახმად, ჩვენი ქვეყანა ევროპაში ყველაზე უსაფრთხოა და აქ დანაშაულის მაჩვენებელი ყველაზე დაბალია. ბოლო სამი წლის განმავლობაში ჩვენი კონკურენტი ისლანდია იყო, რომელიც რეალურად კუნძულია. მაგრამ ჩვენ ახლა მათაც გავუსწარით - ეს ისე შევძელით, რომ არ შეგვიქმნია ოკეანე ჩვენს ქვეყანასა და დანარჩენ მსოფლიოს შორის. ჩვენ ბევრი სხვა ცვლილებაც განვახორციელეთ," - განაცხადა საქართველოს პრეზიდენტმა.

ჯორჯთაუნის უნივერსიტეტში გამოსვლისას სააკაშვილს რუსეთ-საქართველოს ურთიერთობების შესახებაც ჰკითხეს.

მისი თქმით, საქართველოს ეკონომიკის მინისტრი ვერა ქობალია, რომელიც სოხუმში დაიბადა, ვერ ბრუნდება საკუთარ ქალაქში, რადგან რუსეთის პრეზიდენტმა გადაწყვიტა, რომ მისი სახლი მისი საკუთრება აღარ არის.

"გამოდის, რომ მედვედევი ხელმძღვანელობს საჯარო რეესტრებს ამგვარი საკითხების გადასაწყვეტად. რა თქმა უნდა, მჯერა სამართლიანი საჯარო რეესტრების, მაგრამ არა ისეთების, რომლებსაც მედვედევი და პუტინი მართავენ," - აღნიშნა სააკაშვილმა.

პრეზიდენტის განცხადებით, რუსეთის ხელისუფლებას მისი ლიკვიდაცია სურდა და რამდენჯერმე დაფიქსირდა კიდეც, რომ მის პირად თვითმფრინავს უმიზნებდა მზადყოფნაში მოყვანილი რუსეთის საჰაერო თავდაცვის სისტემა.

"ერთხელ აეროპორტში მივდიოდი და ჩემმა მეგობარმა, რომელიც ჩემი პირადი მცველიც არის, მითხრა, რომ რადარზე ნახეს, როგორ იყო დამიზნებული ჩემს თვითმფრინავზე სრულ მზადყოფნაში მოყვანილი რუსეთის საჰაერო თავდაცვის სისტემა. ღილაკზე მხოლოდ თითის დაჭერა უნდოდა და თვითმფრინავი ჩამოვარდებოდა. ჩემმა მეგობარმა მკითხა, როგორ მოვქცეულიყავით. მე ვუთხარი - მაინც უნდა გავფრინდეთ-მეთქი. ერთხელაც ჩემი პრესმდივანი მოვიდა და ანერვიულებულმა მითხრა, რომ ჩემს თვითმფრინავს ჩამოაგდებდნენ, რადგან ყველა რუსული ვებგვერდი იუწყებოდა, რომ 40 წუთში გაფრენას ვაპირებდი. მე ჩემს პრესმდივანს ვუთხარი, საჯარო განცხადება გაეკეთებინა და ეთქვა - ვიცით, რომ გვიმიზნებთ, ნუ ნერვიულობთ, არ გვჭირდება ვებსაიტებზე ამ ინფორმაციის გავრცელება. ჩვენ გხედავთ, მაგრამ არ გვადარდებს, რადგან ჩვენი თვითმფრინავი მაინც გაფრინდება, ეს ხომ ჩვენი ქვეყანაა," - განაცხადა მიხეილ სააკაშვილმა.

მისი თქმით, საქართველოს ისტორიული თავსებადობა აქვს თითოეულ მეზობელთან, სხვაგვარად ქვეყანა ასეთ გარემოში ვერ გადარჩებოდა. პრეზიდენტის თქმით, ქართველები ბუნებით გახსნილი, დრეკადი და ბევრის ამტანი ხალხია, მაგრამ არასდროს შეგუებია თავისუფლების დაკარგვას.

"ეს მხოლოდ ჩემი მოსაზრება არ არის. თუ მოისმენთ, რას ამბობენ მოსკოვში, დღეს იქ ყველა ლიდერი აცხადებს, რომ ქართული ტიპის რეფორმების გატარება სურთ, - აღნიშნა სააკაშვილმა, - სხვათა შორის, მედვედევმაც რამდენჯერმე საჯაროდ აღიარა, რომ საქართველომ კორუფცია დაამარცხა, ჩვენ ვინც არ მოგვწონს და გვძულს, ეს სააკაშვილიაო."

პრეზიდენტის თქმით, რუსეთის მოქმედმა ლიდერებმა საქართველოს პოლიციის რეფორმა გადაიღეს, თუმცა შანსი ხელიდან გაუშვეს, რადგან მისი განხორციელების ნება არ გააჩნიათ.

"თუ ეს ნება არ არსებობს, არაფერი გამოვა. 21-ე საუკუნეში ვცხოვრობთ, მაგრამ გვესმის მოძველებული რიტორიკა. მათი მთავარი პრობლემა ის არის, რომ რეფორმები დასავლეთის ტროას ცხენი ჰგონიათ. ნაცვლად იმისა, მიხვდნენ, რომ რასაც საზოგადოების რეფორმირებისთვის გააკეთებენ, მხოლოდ მათთვის იქნება კარგი. მიაჩნიათ, რომ მსოფლიოს მათთვის მხოლოდ ცუდი სურს. მსოფლიოს კი პირიქით - მათთვის კარგი უნდა," - დასძინა სააკაშვილმა.

სტატიის მისამართი: http://24saati.ge/index.php/category/news/2012-02-04/24983.html