მსჯავრდებულის გარდაცვალების სხვადასხვა ვერსია

პატიმართა და მსჯავრდებულთა სამკურნალო დაწესებულებაში გარდაცვლილი 39 წლის მსჯავრდებულის, ზურაბ დელიანიძის ოჯახის მოთხოვნით, გარდაცვლილის ცხედარს დამოუკიდებელი ექსპერტიზა უკვე ჩაუტარდა.

24 საათი 05.05.12

პატიმრის გარდაცვალების შესახებ ინფორმაცია ორი დღის წინ გავრცელდა, ასევე, გავრცელდა გარდაცვლილის ფოტოები, სადაც მას სხეულზე დაზიანებები აღენიშნება. ორი დღის განმავლობაში ამ საკითხთან დაკავშირებით ბევრი კომენტარი გაკეთდა, სხვადასხვა ადგილას რამდენიმე აქცია და ბრიფინგი ჩატარდა და პატიმრის გარდაცვალების სხვადასხვა ვერსიაც გამოიკვეთა.

სხვა შემთხვევებისგან განსხვავებით, სასჯელაღსრულების, პრობაციისა და იურიდიულ დახმარების საკითხთა სამინისტრომ, პატიმრის წამების ვერსიის საპასუხოდ, საკმაოდ ვრცელი ახსნა-განმარტებითი პასუხი გამოაქვეყნა.

ახსნა-განმარტების მიხედვითაც, მსჯავრდებული ავადმყოფობდა ვენერიული დაავადების მწვავე ფორმით და მას სამედიცინო დეპარტამენტის მედპერსონალის მიერ ყოველგვარი შესაძლებელი მკურნალობა უტარდებოდა.

“მსჯავრდებულის გარდაცვალებასთან დაკავშირებით, საგამოძიებო დეპარტამენტში, ისევე, როგორც ნებისმიერი პატიმრის გარდაცვალების შემთხვევაში, მყისიერად დაიწყო გამოძიება და დაინიშნა სასამართლო-სამედიცინო ექსპერტიზა,”» - ნათქვამია სამინისტროს განცხადებაში.

სახალხო დამცველმა დელიანიძის გარდაცვალების საქმესთან დაკავშირებით საგამოძიებო ორგანოებს ჯერ მომხდარის დეტალურად შესწავლის მოთხოვნით მიმართა, შემდეგ კი სასჯელაღსრულების სამინისტრო გარდაცვლილი პატიმრისა და მისი ოჯახის უფლებების დარღვევაში დაადანაშაულა.

ომბუდსმენის განმარტებით, სამინისტრომ გაავრცელა მსჯავრდებულის პირად საიდუმლოებას მიკუთვნებული ინფორმაცია, რაც ხელყოფს როგორც გარდაცვლილი მსჯავრდებულის, ასევე სხვა პირთა უფლებებს და რომლის დაცვაც, ომბუდსმენის მტკიცებით, სამინისტროს, კონსტიტუციით ევალება. სახალხო დამცველი აცხადებს, რომ სქესობრივი გზით გადამდები დაავადებების შესახებ ინფორმაციის გამჟღავნება და საჯაროდ გამოტანა წარმოადგენს განსაკუთრებულ შემთხვევას, იმის გამო, რომ ამით ილახება არა მარტო გარდაცვლილი პირის კანონიერი ინტერესები, არამედ ჩრდილი ადგება პაციენტის ოჯახის წევრებს, ნათესავებს, ასევე პირთა სხვა წრეს.

“სამინისტროს არგუმენტი იმასთან დაკავშირებით, რომ საკითხისადმი “საზოგადეობის მაღალი ინტერესი” არსებობდა, არ წარმოადგენს პირადი საიდუმლოების გამჟღავნების საფუძველს, რაც კარგად უნდა ესმოდეთ სამინისტროს უფლებამოსილ პირებს,” - აცხადებს გიორგი ტუღუში. ომბუდსმენი, იმ პასუხისმგებელი პირების მიმართ ითხოვს სისხლის სამართლის საქმის აღძვრას, რომლებმაც, კანონით დაცული საიდუმლო ინფორმაციის გასაჯაროების გადაწყვეტილება მიიღეს.

გარდაცვლილი პატიმრის ოჯახის წევრები და ახლობლები კი კვლავ ირწმუნებიან, რომ ის სასტიკად არის ნაწამები. გარდაცვლილის მეუღლის განმარტებით, ის 17 აპრილს არ შეუშვეს მეუღლის მოსანახულებლად და არც ის გააგებინეს, რა მდგომარეობაში იყო პატიმარი. 1 მაისს კი მეუღლის გარდაცვალება მის მოსანახულებლად მისვლისას, შემთხვევით შეიტყო. გარდაცვლილის მეუღლის მტკიცებითვე, მას მანამდე პატიმრის ბათუმიდან თბილისში გადმოყვანაც არ შეატყობინეს.

რაც შეეხება ცხედრისთვის ჩატარებულ დამოუკიდებელ ექსპერტიზას. ექსპერტ ალექსანდრე გეჯაძის განცხადებით, დელიანიძის გვამს, გარეგნული დათვალიერების შედეგად, ცემის კვალი არ ჰქონდა. ის დაზიანებები, რაც აღენიშნებოდა, იყო ნაწოლები, რაც ვითარდება ავადმყოფის ხანგრძლივი წოლით, უმოძრაობით და არასათანდო მოვლით ციხის საავადმყოფოში. ექსპერტის მტკიცებით, ის ნაწოლები, რომელიც ცხედარს აღენიშნება და რაც კარგად ჩანს გავრცელებულ ფოტოებზეც, თავისი მორფოლოგიური სურათით იმდენად ღრმაა, რომ ორ დღეში ვერ განვითარდებოდა.

“აქ საუბარია იმაზე, რამდენად ადეკვატურად ჩაუტარდა პატიმარს მკურნალობა. ამ კუთხით შეიძლება მსჯელობა და არა იმით ნაცემი იყო თუ არა პატიმარი,» - აცხადებს ექსპერტი და გარდაცვლილის მეუღლის ეჭვს იმასთან დაკავშირებით, რომ მისი ქმარი ადრე იყო გარდაცვლილი და არა იმ დილას, როცა მან შემთხვევით გაიგო, საფუძვლიანად თვლის.

გუშინ საღამოს, იმ დროს, როდესაც სასჯელაღსრულების, პრობაციისა და იურიდულ დახმარების საკითხთა სამინისტროსთან საპროტესტო აქცია მიმდინარეობდა, ცნობილი გახდა, რომ გარდაცვლილი პატიმრის საქმე გამოძიებისთვის მთავარ პროკურატურას გადაეცა.

“ჩვენთვის ძალიან მნიშვნელოვანია, რომ ყველა დეტალი გახდეს ცნობილი, რაც შეიძლება, უფრო სწრაფად. აქედან გამომდინარე, თითოეული ჩვენი თანამშრომელი მაქსიმალურად ითანამშრომლებს გამოძიებასთან. ჩვენ რა თქმა უნდა, ვითანამშრომლებთ სახალხო დამცველთან და მივესალმებით დამოუკიდებელი ექსპერტების ჩართულობას”, - განაცხადა სასჯელაღრულების პრობაციისა და იურიდულ დახმარების საკითხთა მინისტრმა.

სტატიის მისამართი: http://24saati.ge/index.php/category/news/2012-05-05/28341.html