ID ბარათის ახალი სერვისი - ციფრული ხელმოწერა

საქართველოში ქაღალდზე არსებული ხელმოწერის ალტერნატივა ციფრული ხელმოწერა ამოქმედდა, რომელიც მოქალაქეებს საშუალებას მისცემს სახლიდან გაუსვლელად და მსოფლიოს ნებისმიერი წერტილიდან დოკუმენტს ხელი მოაწერონ.

24 საათი 05.05.12

მოქალაქეებს დოკუმენტზე ციფრული ხელმოწერის გაკეთება, მხოლოდ ID ბარათის საშუალებით შეეძლებათ.

ციფრულად ხელმოწერილი დოკუმენტის დანიშნულების ადგილამდე მისატანად, ორგანიზაციაში ფიზიკურად გამოცხადება აღარ იქნება საჭირო და საბუთის გადაგზავნა შესაძლებელი იქნება სახლიდან გაუსვლელად, სხვადასხვა ელექტრონული საშუალებებით, მათ შორის ელექტრონული ფოსტითაც.

იგივე შესაძლებლობა ექნებათ უცხო ქვეყნებში მყოფ საქართველოს მოქალაქეებსაც, რომელთაც ID ბარათი გააჩნიათ. თუ ადამიანი იმყოფება საზღვარგარეთ და მას დასჭირდება, საქართველოში კონკრეტულ დოკუმენტზე ხელის მოწერა, მას შეეძლება მსოფლიოს ნებისმიერი ადგილიდან, დოკუმენტს ხელი მოაწეროს და გამოუგზავნოს ადრესატს.

თუ ქაღალდზე განხორციელებული ხელმოწერის მიმსგავსება და გაყალბება სხვა ადამიანსაც შეუძლია, ID ბარათით განხორცილელებული ხელმოწერის გაყალბება უამრავი დამცავი მექანიზმის არსებობის გამო ფაქტიურად შეუძლებელია.

აიდი ბარათის მფლობელ მოქალაქეს ციფრული ხელმოწერის განხორციელებისთვის საჭირო სერთიფიკატის განახლება ყოველ ორწელიწადნახევარში მოუწევს, რაც მოქალაქეს ხელმოწერის გაყალბებისგან მაქსიმალურად იცავს.

ტექნიკურად ციფრული ხელმოწერისათვის საჭიროა ორი ერთმანეთთან მათემატიკურად დაკავშირებული, შემთხვევითობის პრინციპით შერჩეული რიცხვი. მათგან ერთი წერია მხოლოდ მომხმარებლის ID ბარათზე და მას ეწოდება მომხმარებლის დახურული გასაღები (Private Key). მეორეა ე.წ ღია გასაღები (Public Key), რომლის მიღებაც შეუძლია ნებისმიერ პირს, ვისაც მოქალაქის მიერ განხორციელებული ხელმოწერის ნამდვილობის შემოწმება უნდა. იმისათვის, რომ შემოწმებისას დადასტურდეს ღია გასაღების მფლობელის ვინაობა, სამოქალაქო რეესტრი გასცემს მოქალაქეზე ე.წ. ციფრულ სერტიფიკატს. ეს უკანასკნელი შეიცავს მოქალაქის სახელს, გვარს, პირად ნომერს, ღია გასაღებს და ტექნიკურ ინფორმაციას.

დახურული გასაღები წერია მხოლოდ მომხმარებლის ID ბარათზე და არსად სხვაგან. მათ შორის, არც სამოქალაქო რეესტრის სააგენტოში. გარდა ამისა, ციფრული ხელმოწერის განხორციელებისათვის საჭიროა ID ბარათის PIN კოდი, რომელიც ასევე მხოლოდ მომხმარებელმა იცის.

ID ბარათის მფლობელი უნდა გაუფრთხილდეს საკუთარ პირადობის მოწმობას და კოდებს. ბარათი PIN კოდებთან ერთად სხვა ადამიანის ხელში არ უნდა მოხვდეს, რადგან შესაძლო შედეგებზე პასუხისმგებლობა ეკისრება მხოლოდ ID ბარათის მფლობელ მოქალაქეს.

თუ გაჩნდება იმის ალბათობა, რომ ბარათი და პინკოდი სავარაუდოდ სხვას ჩაუვარდა ხელში, ამის შესახებ დაუყონებლივ უნდა ეცნობოს სამოქალაქო რეესტრს, ამ შემთხვევაში, მოქალაქის ხელმოწერის სერტიფიკატი დაიბლოკება.

ციფრული ხელმოწერის პრაქტიკა მსოფლიოს სხვადასხვა ქვეყანაში არსებობს და ეს წარმატებულად გამოიყენება მათ შორის ესტონეთში, აშშ-ში, კანადაში, გერმანიაში, უკრაინაში, რუსეთსა და ევროპის სხვა ქვეყნებში.

სტატიის მისამართი: http://24saati.ge/index.php/category/news/2012-05-05/28346.html

ID ბა­რა­თის ახა­ლი სერ­ვი­სი - ციფ­რუ­ლი ხელ­მო­წე­რა

ID ბარათის ახალი სერვისი - ციფრული ხელმოწერა