ოთხწლიანი პატიმრობა თაღლითობის გამო

გუშინ თბილისის საქალაქო სასამართლომ დაასრულა სისხლის სამართლის საქმის განხილვა განსასჯელ მელორ ვაჩნაძის მიმართ, რომელსაც თაღლითობის რამდენიმე ეპიზოდში ედებოდა ბრალი.

24 საათი 17.03.10

საქმის მასალების მიხედვით, მელორ ვაჩნაძემ მეგობარს გიორგი გზირიშვილს თავისი მეუღლის თამარ ბჟალავას მანქანა 5100 აშშ დოლარად მიჰყიდა, თუმცა ცოლისთვის არაფერი უთქვამს. ვინაიდან გზირიშვილს არ ჰქონდა მართვის მოწმობა, მანქანა დროებით სარგებლობაში ვაჩნაძემ დაიტოვა. მიუხედავად იმისა, რომ გზირიშვილი მანქანის გადაფორმებას და გადაცემას ითხოვდა, ცოტა ხანში ვაჩნაძემ გზირიშვილის მანქანა ხელმეორედ სხვა პირზე გაასხვისა.

ამასთან, ბრალდების მიხედვით, მელორ ვაჩნაძემ გიორგი გზირიშვილს და მის მეუღლეს ბანკის მეშვეობით განვადებით გამოატანინა სამი, ნანული ჯღამაძეს კი ერთი მობილური ტელეფონი, რომლებიც გაყიდა, თუმცა ბანკის დავალიანება არ გადაიხადა, რაც შეთანხმებისამებრ, მის მოვალეობაში შედიოდა. მელორ ვაჩნაძის თაღლითური ქმედებებით დაზარალებულებს მიადგათ მნიშვნელოვანი მატერიალური ზიანი.

მელორ ვაჩნაძის მიმართ წარდგენილი ბრალდება ავტომანქანის თაღლითურად დაუფლების ნაწილში სრულად დადასტურდა დაზარალებულის, მოწმეთა ჩვენებებით და საქმეში არსებული სხვა მტკიცებულებების ერთობლიობით. შესაბამისად, სასამართლომ მას სასჯელად განუსაზღვრა ოთხი წლით თავისუფლების აღკვეთა. ხოლო რაც შეეხება მობილური ტელეფონების თაღლითური დაუფლების ფაქტებს, სასამართლომ ამ ნაწილში მელორ ვაჩნაძე გაამართლა მტკიცებულებათა არასაკმარისობის გამო.

სტატიის მისამართი: http://24saati.ge/index.php/category/news/justice/2010-03-17/4396.html