აშშ-ს ეროვნული დაზვერვის ხელმძღვანელი გადადგა

აშშ-ს ეროვნული დაზვერვის ხელმძღვანელმა დენის ბლერმა, ამ პოსტზე 16-თვიანი საქმიანობის შემდეგ, თანამდებობა დატოვა.

24 საათი 22.05.10

ამერიკის პრეზიდენტმა სპეცსამსახური, რომელსაც აქამდე ბლერი ხელმძღვანელობდა, ცოტა ხნის წინ მკაცრად გააკრიტიკა, ტერორიზმის წინააღმდეგ არადამაკმაყოფილებელი მუშაობისთვის. დაზვერვის სამსახური პრეზიდენტის კრიტიკის ობიექტი დეტროიტის ტერაქტის გამო გახდა. უფრო ზუსტად, იმიტომ, რომ მათ ტერაქტი დროულად ვერ აღკვეთეს. ამერიკის ეროვნული დაზვერვის სამსახური კრიტიკის ქარცეცხლში ტაიმს-სკვერსა და ნიუ-იორკის ცენტრში მომხდარი აფეთქებების გამოც გაატარეს.

ბლერისა და მისი უწყების საქმიანობის მიმართ სერიოზული უკმაყოფილება, რამდენიმე დღის წინ სენატმაც გამოთქვა. სენატის დაზვერვის კომიტეტის მიერ გაკეთებულ ანგარიშში საუბარია სპეცსამსახურების "სისტემურ ჩავარდნაზე"..

დენის ბლერმა მის მიერ მიღებული გადაწყვეტილების შესახებ პრეზიდენტ ბარაქ ობამას უკვე შეატყობინა, ადმირალისა და მისი უწყების მისამართით გამოთქმული არა ერთი მკაცრი კრიტიკის მიუხედავად, პრეზიდენტმა მას მადლობა გადაუხადა.

"იმ დროს, როცა მას ეროვნული დაზვერვის სამსახურის დირექტორის თანამდებობა ეკავა, ჩვენი სპეცსამსახურები შესამჩნევად ეფექტურად მოქმედებდნენ. მაშინ, ქვეყნის უსაფრთხოებამ სიმტკიცეზე გამოცდა ჩააბარა," - ნათქვამია ობამას განცხადებაში.

ამერიკის სამხედრო-საზღვაო ფლოტის ადმირალი დენის ბლერი, ამერიკის ეროვნული დაზვერვის დირექტორის თანამდებობაზე 2009 წელს იანვარში დაინიშნა. ეს თანამდებობა 11 სექტემბრის ტერაქტის შემდეგ შეიქმნა, რათა ამერიკის სპეცსამსახურების საქმიანობა გაერთიანებულიყო და გაუმჯობესებულიყო მათ შორის კოორდინაცია.

ამერიკული მედიის ინფორმაციით, ამერიკის პრეზიდენტის ადმინისტრაცია უკვე ესაუბრა რამდენიმე ძლიერ კანდიდატს და რომელიმე მათგანი რამდენიმე დღეში ამერიკის ევროვნული დაზვერვის სამსახურის დირექტორის თანამდებობაზე დაინიშნება.

სტატიის მისამართი: http://24saati.ge/index.php/category/news/justice/2010-05-22/6866.html