მძიმე ბრალდება რამზან კადიროვს

გაზეთ "L'Express"-ის ინფორმაციით, ავსტრიის პროკურატურა, გასულ წელს, ვენაში, 26 წლის ჩეჩენი ოპოზიციონერის, უმარ ისრაილოვის მკვლელობის ფაქტს იძიებს.

24 საათი 04.09.10

მკვლელობა კი შესაძლოა, ჩეჩნეთის პრეზიდენტს რამზან კადიროვს უკავშირდებოდება. "L'Express"-ის ინფორმაციით, უმარ ისმაილოვის მკვლელობაში მონაწილეობაში ეჭვმიტანილები არიან რუსი დიპლომატები.

"გამოძიება დარწმუნებულია, რომ მკვლელობა კადიროვის ხალხმა ჩაიდინა მისივე ბრძანებით, ავსტრიაში რუსეთის დიპკორპუსის წარმომადგენელთა დახმარებით", - წერს გაზეთი "L'Express"-.ი

ისრაილოვი 2009 წლის 13 იანვარს, გატაცების მცდელობისას მოკლეს. ორმა ადამიანმა მას რამდენჯერმე ესროლა, თავდამსხმელები ავტომანქანაში ჩასხდნენ და მიიმალნენ. მკვლელობის საქმესთან დაკავშირებით, დაკავებულია სამი ეჭვმიტანილი: ოტტო კალტენბრუნნერი, რომელიც გატაცების ორგანიზატორად მოიაზრება, მუსლიმ დადაევი, რომელსაც სამართალდამცველები ისრაილოვის მოთვალთვალედ მოიაზრებენ და ტურპალ ალი ეშერკაევი, რომელიც თანამზრახველთან ერთად თავს დაესხა ისრაილოვს.

სამივე მათგანს, რამდენიმე დღის წინ, ბრალი წარუდგინეს. რაც შეეხება მკვლელობაში მონაწილე მეოთხე ეჭვმიტანილს, ლეჩა ბოგატიროვს, ავსტრიის პოლიციის ინფორმაციით, მკვლელობის შემდეგ ის ავსტრიიდან გაუჩინარდა და გავრცელებული ინფორმაციით, ამჟამად რუსეთში იმყოფება. გამოძიება თითქმის დარწმუნებულია, რომ უმარ ისრაილოვი, ცეცხლსასროლი იარაღიდან სამჯერ გასროლით, სწორედ მან მოკლა.

გაზეთ "L'Express"-ის ინფორმაციით, კადიროვისა და რუსი დიპლომატების მონაწილეობის შესახებ გახმაურებულ მკვლელობებში წარმოებულმა გამოძიებამ, შესაძლოა, საერთაშორისო სკანდალი გამოიწვიოს, რომელიც გაურკვეველია, თუ რით დასრულდება მოსკოვისა და ევროკავშირის ურთიერთობებისათვის. თავად რამზან კადიროვვი კატეგორიულად უარყოფს მის წინააღმდეგ გამოთქმულ ბრალდებებს და ისრაილოვის გატაცებასა და მკვლელობაში თანამონაწილეობას. კადიროვი ამ ბრალდებას პროვოკაციას უწოდებს და მკვლელობის საკუთარ ვერსიას ახმაურებს. . მისი თქმით, ისრაილოვს ჩეჩნეთში მრავალი მოსისხლე მტერი ჰყავდა და შესაძლოა, ის შურისძიების მიზნით მოკლეს.

გაზეთი "L'Express"-ი აქვეყნებს ინტერვიუს მოკლული ისრაილოვის მამასთან - ალი ისრაილოვთან. "ვლადიმერ პუტინსა და რამზან კადიროვს იმდენად დიდი ძალაუფლება აქვთ, რომ მათ შეუძლიათ თავისუფლად ჩაიდინონ მკვლელობები", - აცხადებს მოკლული ისრაილოვის მამა.

როგორც გარდაცვლილის მამა ირწმუნება, მისი ვაჟი მოიცილეს იმიტომ, რომ იგი კადიროვის დანაშაულებრივი მოღვაწეობის არასასურველი მოწმე იყო. "ჩემს ვაჟს არა მხოლოდ ესმოდა, თუ როგორ იძლეოდა რამზან კადიროვი მოკვლელობისა და წამების ბრძანებას, არამედ საკუთარი თვალით ხედავდა, როგორ ახორციელებდა პირადად კადიროვი ამ სისასტიკეს," - განმარტავს მოკლულის მამა.

სტატიის მისამართი: http://24saati.ge/index.php/category/news/justice/2010-09-04/9261.html