თბილისში, თაბუკაშვილის ქუჩაზე მდებარე საბავშვო ბაღის ეზოში, საბავშვო ბაღის თანამშრომლებმა მიტოვებული დიდი ზომის ჩემოდანი აღმოაჩინეს.
24 საათი 04.02.12
თბილისში, თაბუკაშვილის ქუჩაზე მდებარე საბავშვო ბაღის ეზოში, საბავშვო ბაღის თანამშრომლებმა მიტოვებული დიდი ზომის ჩემოდანი აღმოაჩინეს.
როგორც ბაგა-ბაღის დირექტორმა ნაირა ბახიამ სააგენტო "ინტერპრესნიუსს" განუცხადა, სამსახურში მისვლისას, ეზოში საეჭვო ჩანთა აღმოაჩინეს, რის შემდეგაც პოლიცია გამოიძახეს. ბაგა-ბაღის დირექტორის თქმით, პოლიცია შემთხვევის ადგილზე რამდენიმე წუთში მივიდა, თუმცა საშიში არაფერი აღმოჩნდა.
"თაბუკაშვილის ქუჩაზე მიტოვებული ჩანთა იპოვეს, რომელიც საეჭვოდ იქნა მიჩნეული. ადგილზე გამნაღმველები მივიდნენ, თუმცა განაღმვითი სამუშაოების შემდეგ გაირკვა, რომ ჩანთა ცარიელი იყო," - აღნიშნა შს სამინისტროს პრესსამსახურის ხელმძღვანელმა ზურაბ გვენეტაძემ.
ბაგა-ბაღის დირექტორის ინფორმაციით, შემთხვევასთან დაკავშირებით, დაიკითხნენ ბაგა-ბაღის თანამშრომლები.
სააგენტო "პირველმა" კი თვითმხილველების ინფორმაცია გაავრცელა. მათი თქმით, საბავშვო ბაღის ეზოში დილით ორი აფეთქების ხმა გაისმა.
"ჩემი სამსახური ბაღთან ახლოსაა. პოლიციის თანამშრომელი შემოვიდა და გაგვაფრთხილა, ბაღის ეზოს არ მივახლოებოდით, რადგან იქ აღმოჩენილ ჩემოდნებში, სავარაუდოდ, ასაფეთქებელი მოწყობილობები იყო. მან გვთხოვა, აფეთქების ხმის გაგონების შემთხვევაში, პანიკაში არ ჩავვარდნილიყავით. ადგილზე სამართლადამცველები და გამნაღმველები მუშაობდნენ. ცოტა ხანში 2 აფეთქების ხმა გაისმა," - განაცხადა თვითმხილველმა და დასძინა, რომ საბავშვო ბაღიდან ბავშვები პოლიციის შენობაში ჰყავთ გადაყვანილი.
"პირველის" მტკიცებით, ეს ფაქტი ძველი თბილისის პოლიციის მთავარ სამმართველოშიც დაადასტურეს და აღნიშნეს, რომ ასაფეთქებელი მოწყობილობა უკვე გაუვნებელყოფილია, ამდენად, საფრთხე აღარ არსებობს.
ამ დროისთვის, შემთხვევის ადგილი შემოღობილია. ადგილზე კი პოლიციის სპეციალური ჯგუფები რჩებიან.
ინფორმაცია გადავამოწმეთ შსს-ს პრესსამსახური უფროსთან ზურაბ გვენეტაძესთან, რომელმაც განაცხადა, რომ თაბუკაშვილის ქუჩაზე მდებარე საბავშვო ბაღში ნაპოვნი ჩანთა მეეზოვემ დააგდო და მასში არანაირი ასაფეთქებელი ნივთიერება არ იყო.