ქართველი დიპლომატებისა და მთავრობის წარმომადგენელთა შეხვედრა

სასტუმრო "ქორთიარდ მარიოტში" საქართველოს მთავრობისა და უცხოეთში აკრედიტებულ ქართული დიპლომატიური კორპუსის წარმომადგენელთა შეხვედრა გუშინ საგარეო საქმეთა მინისტრმა გრიგოლ ვაშაძემ გახსნა. შეხვედრაზე ყურადღება გამახვილდა საქართველოს საგარეო პოლიტიკურ კურსზე, საქართველო-რუსეთის ურთიერთობათა პრობლემატიკაზე და დაისახა ერთწლიანი სამოქმედო გეგმა.

24 საათი 08.09.09

აგვისტოს ომის შემდეგ ქართველ დიპლომატთა პირველი შეხვედრა გუშინ სასტუმრო "ქორთიარდ მარიოტში" გაიმართა.

უცხოეთში აკრედიტებულ ქართველ ელჩებთან შეხვედრიდან გამოსულმა საქართველოს საგარეო საქმეთა მინისტრმა გრიგოლ ვაშაძემ განაცხადა, რომ დღეს საქართველოსთვის მთავარი პრიორიტეტებია უსაფრთხოება, სტაბილურობა, უშიშროება და მშვიდობიანი გზით ტერიტორიული მთლიანობის აღდგენა. "ამ კონტექსტში ელჩებთან შეხვედრაზე ის საკითხები განვიხილეთ, რომლებზეც რუსეთთან "ფრონტის ხაზი" გადის. ჩვენ არავითარ შემთხევაში არ უნდა დავუშვათ საქართველოს საერთაშირისო სტატუსის შერყევა. უნდა ვიმუშაოთ იმისთვის, რომ ქვეყანა დემოკრატიულ, ლიბერალური რეფორმების გამტარებელ სახელმწიფოდ წარმოვაჩინოთ. ჩვენ ვიუსაუბრეთ იმაზეც, თუ რა არის სასწრაფოდ გასაკეთებელი რუსეთთან მიმართებაში. განვიხილეთ ამ საკითხის საერთაშორისო სამართლებრივი ასპექტები. საჭიროა მუშაობა საერთაშორისო არასამთავრობო, საზოგადოებრივ ორგანიზაციებთან და საპარლამენტო ასამბლეებთან, რათა საქართველოს თემა ყოველთვის ყურადღების ცენტში იყოს და რუსეთს ძვირად დაუჯდეს ის, რაც შარშან აგვისტოში ჩაიდინა," - განაცხადა გრიგოლ ვაშაძემ.

სასტუმრო "ქორთიარდ მარიოტში" ქართველი დიპლომატებისა და მთავრობის წარმომადგენელთა შეხვედრაზე გუშინ რეინტეგრაციის საკითხებში სახელმწიფო მინისტრიც მივიდა. იაკობაშვილმა დიპლომატებთან შეხვედრაზე ოკუპირებული ტერიტორიების შესახებ ისაუბრა. "დღევანდელი საგარეო პოლიტიკის პრიორიტეტი ქვეყნის დეოკუპაციაა. ამას ჩვენ დამოუკიდებლად ვერ მოვახერხებთ და საჭიროა საერთაშორისო მხარდაჭერა. ბრძოლა, რომელიც რუსეთს საქართველოს წინააღმდეგ აქვს გაჩაღებული, კვლავ გრძელდება და ამიტომ მნიშვნელოვანია, რომ ქართველ ელჩებს სათანდო ინფორმაცია ჰქონდეთ," - განაცხადა იაკობაშვილმა.

საზღვარგარეთ აკრედიტებული ქართველი დიპლომატები დღეს საქართველოს პრეზიდენტ მიხეილ სააკაშვილს შეხვდებიან.

საქართველოს საგარეო საქმეთა სამინისტროს ინფორმაციით, ქართველი ელჩები დღეს 10:00 საათზე საქართველოს საგარეო საქმეთა სამინისტროს საგარეო დაზვერვის სპეციალური სამსახურის ანალიტიკური დირექტორატის უფროს გიორგი მანჯგალაძეს, შემდგომ ეკონომიკური განვითარების მინისტრ ზურაბ პოლოლიკაშვილს, ფინანსთა მინისტრის მოადგილე დიმიტრი გვილდაძეს, სახელმწიფო მინისტრს დიასპორის საკითხებში იულონ გაგოშიძეს შეხვდებიან.

მოგვიანებით ქართველ ელჩებთან შემაჯამებელ შეხვედრას საგარეო საქმეთა მინისტრი გრიგოლ ვაშაძე გამართავს, ამის შემდგომ კი ელჩებს პრემიერ-მინისტრი ნიკა გილაური შეხვდება.

სტატიის მისამართი: http://24saati.ge/index.php/category/news/politics/2009-09-08/472.html