სერგეი შამბა აფხაზეთში ტურიზმის განვითარების გეგმებზე საუბრობს

აფხაზეთის სეპარატისტული ხელისუფლება აფხაზეთის ტურისტული ინფრასტრუქტურის განვითარებას უცხოელი ინვესტორების, მათ შორის თურქეთის ხარჯზე აპირებს.

24 საათი 12.01.10

აფხაზეთის ე. წ. საგარეო საქმეთა მინისტრ სერგეი შამბას განცხადებით, სახელმწიფო სახსრები მხოლოდ და მხოლოდ აეროპორტისა და რუსეთთან საზღვარზე საკონტროლო-გამშვები პუქნტების რაოდენობის გაზრდისთვისაა საკმარისი.

2010 წლის აფხაზეთის საკურორტო გეგმებზე საუბრისას შამბა აცხადებს, რომ აფხაზეთის ბიუჯეტის შემოსავლის ძირითადი ნაწილი ტურიზმია და ამიტომაც აფხაზეთი მის განვითარებას მომავალი ძალიან სერიოზულად აპირებს.

შამბას თქმით, პირველი, რაც 2010 წელს გაკეთდება, "რუსეთ-აფხაზეთის საზღვარზე ტურისტების გატარების გასაზრდელად ახალი ხიდი აიგება ". სოხუმის რეჟიმი კიდევ ერთი ხიდის აგებას მდინარე ფსოუზე გეგმავს. ამის შესახებ სოხუმის რეჟიმის ე.წ. საგარეო საქმეთა მინისტრი "ინფოქს.რუ"-სთან საუბრისას განმარტავს, რომ აფხაზეთში შესვლისას ტურისტებისთვის მთავარი დაბრკოლება გამშვები პუნქტების ნაკლებობაა. ამასთან, საბჭოთა დროიდან მდინარე ფსოუზე მხოლოდ ერთი პატარა ხიდი ფუნქციონირებდა. რამდენიმე წლის წინ იქვე დამატებითი ხიდი ააშენეს და საკონტროლო-გამშვები პუნქტი გახსნეს.

"აფხაზეთს თავის დროზე მრავალი დასასვენებელი ობიექტი ჰქონდა, მაგრამ ომმა ისინი დააზიანა. ახალი ობიექტების ასაშენებლად და ტურისტული ინფრასტრუქტურის გასავითარებლად საჭიროა ინვესტიციები", - აცხადებს შამბა და დასძენს, რომ მართალია აფხაზეთში არის ახალი სასტუმროები, მაგრამ მათ კერძო ბიზნესი აშენებს და სახელმწიფო ამ მშენებლობებში ფულს არ დებს.

"2010 წელს გვაქვს გეგმები სოხუმთან ახლოს აეროპორტის აღდგენის შესახებ. ადრე აეროპორტი პოლიტიკური მიზეზების გამო არ მუშაობდა. ჩვენი დამოუკიდებლობის აღიარების შემდეგ კი ამ საკითხზე აქტიური მუშაობა შეიძლება", - აღნიშნავს შამბა. მისსივე ინფორმაციით, ამ საკითხის შესახებ რუსულ და თურქულ კომპანიებს უკვე წარმოდგენილი აქვთ წინადადებები და აფხაზეთში ამ წინადადებების განხილვა მიმდინარეობს.

სტატიის მისამართი: http://24saati.ge/index.php/category/news/politics/2010-01-12/2606.html