ლევან ვეფხვაძე პარლამენტში პრემიერისა და ფინანსთა მინისტრის დაბარებას ითხოვს

ოპოზიცონერი ვიცე-სპიკერი ლევან ვეფხვაძე საზოგადოებრივ რადიოზე შექმნილ ვითარებასთან დაკავშირებით პარლამენტში პრემიერისა და ფინანსთა მინისტრის დაბარებას ითხოვს.

24 საათი 16.01.10

როგორც გუშინდელ რიგგარეშე სხდომაზე ლევან ვეფხვაძემ განაცხადა, რადიოებს პრობლემა იმიტომ შეექმნათ, რომ თავის დროზე მთავრობამ არაადეკვატურად დაგეგმა საზოგადოებრივი მაუწყებლის ბიუჯეტი. მისი თქმით, საზოგადოებრივ მაუწყებელს პოლიტიკური არხისა და მესამე არხის გაკეთება დაევალა, თუმცა არავინ იცის, რა ხარჯებით. "გამოსავლის ძებნისას ხელმძღვანელობას რაც თავში მოუვიდა, რადიოების გაუქმებაა," - განაცხადა ვეფხვაძემ. “ინტერპრესნიუსის” ინფორმაციით, დეპუტატმა უმრავლესობას განსაკუთრებული ყურადღების გამახვილება ამ რადიოების მნიშვნელობაზე ურჩია. მისი თქმით, საზოგადოებრივი მაუწყებლის რადიო, შესაძლოა, ერთადერთი საინფორმაციო წყაროა რეგიონებში მცხოვრები სოციალურად გაჭირვებული მოქალაქეებისთვის, თუნდაც იმიტომ, რომ გაჭირვებულთა სიაში ტელევიზორის უქონლობის გამო მოხვდნენ. ამასთან, ეს რადიო, ვეფხვაძის განცხადებით, აფხაზეთსა და სამაჩაბლოშიც მაუწყებლობს, რაც უმნიშვნელოვანესია.

სტატიის მისამართი: http://24saati.ge/index.php/category/news/politics/2010-01-16/2773.html