ნოღაიდელს კონფერენცია ჩაუვარდა

სასტუმრო "ბეტსიში" ჩატარდა "მოძრაობა სამართლიანი საქართველოსთვის" მიერ ორგანიზებული კონფერენცია "საქართველო ხვალ - საგარეო პოლიტიკა".

24 საათი 27.01.10

კონფერენციის მთავარი მიზანი იყო საქართველოს საგარეო პოლიტიკის "ხვალინდელ დღეზე" ექსპერტებისა და პოლიტიკოსების შეხედულებების გაცნობა. განსახილველ თემებს შორის კი პირველ ადგილზე რუსეთ-საქართველოს შორის არსებული ურთიერთობები იყო.

"ქვეყნის გაერთიანების საკითხზე, რა თქმა უნდა, უშუალო დიალოგი უნდა ვაწარმოოთ აფხაზ და ოს ხალხთან, მაგრამ ამ დიალოგში აუცილებლად უნდა გავითვალისწინოთ რუსეთის ფაქტორიც", - განაცხადა ექს-პრემიერმა.

აღსანიშნავია, რომ "მოძრაობის სამართლიანი საქართველოსთვის" ლიდერი ზურაბ ნოღაიდელი "ედინაია როსიასთან" ურთიერთთანამშრომლობის ხელშეკრულებას თებერვალში, რუსეთში მორიგი ვიზიტის დროს გააფორმებს. პარტიის ლიდერს მიაჩნია, რომ სწორედ ამ თანამშრომლობის ფორმატის შედეგია გასულ წელს ოსური მხარის მიერ ტირძნისში დაკავებული ოთხი ქართველი მოზარდის გათავისუფლება და ახალი წლის დღეებში რუსეთთან საჰაერო მიმოსვლის აღდგენა.

"როგორც დავინახეთ, რუსეთთან დიალოგის ფორმატმა გაამართლა. აღნიშნული მიღწევები ძალიან ცოტაა, მაგრამ ყველაფერი წინ არის. რუსეთთან ურთიერთობა საქართველოს გამთლიანების წინაპირობაა," - განმარტა ნოღაიდელმა.

"საქართველოს გზისთვის" მიუღებელია ხალხისგან უმანდატო ოპოზიციის უდროო დიალოგი რუსეთთან. მიგვაჩნია, რომ მოლაპარაკება უნდა გაიმართოს მხოლოდ დღევანდელი ხელისუფლების შეცვლის შემდეგ," - ნათქვამია მემორანდუმის თანმხლებ განცხადებაში.

კონფერენციის დასრულების შემდეგ ექსპერტმა მამუკა არეშიძემ ჟურნალისტებთან საუბრისას განმარტა, რომ რუსეთთან დიალოგის გზების გამონახვა შესაძლებელია. როგორც არეშიძე შენიშნავს, ვინაიდან ქვეყნის მართვის ბერკეტი ოპოზიციის ხელში არ არის, აუცილებელია ამ პროცესში ხელისუფლების ჩართვა.

"მთელმა პოლიტიკურმა სპექტმა უნდა მოილაპარკოს, რა გაკეთდეს საქართველოსთვის ხვალ. ამაზე არა მხოლოდ უმრავლესობა, არამედ ყველა ერთად უნდა შეჯერდეს," - განმარტა არეშიძემ.

ოპოზიციური პარტიების შეხვედრას არ დასწრებიან მოძრაობა "ალიანსი საქართველოსთვის" წარმომადგენლები. ამ ნაბიჯით მათ აღნიშნეს, რომ ზურაბ ნოღაიდელის პარტიის საგარეო კურსს არ ეთანხმებიან. პარტიის წევრ ზურაბ აბაშიძის თქმით, ალიანსი მზად არის, ყველა პოლიტიკურ ძალასთან მხოლოდ შიდაპოლიტიკურ საკითხებზე აწარმოოს კონსულტაციები.

კონფერენციაზე სამ ათეულზე მეტი პოლიტიკოსი და ექსპერტი იყო მიწვეული. მათგან ნოღაიდელის “ხვალინდელ დღეზე” მსჯელობა მხოლოდ ორმა არ ითაკილა.

მაგდა ლეკიაშვილი

სტატიის მისამართი: http://24saati.ge/index.php/category/news/politics/2010-01-27/3018.html