ზურაბ ნოღაიდელის განცხადებით, ხელისუფლებას არჩევნების გაყალბება უკვე დაწყებული აქვს

როგორც "ჯი-ეიჩ-ენ"-ს მოძრაობა "სამართლიანი საქართველოსთვის" პრეს-ცენტრიდან აცნობეს, ნოღაიდელი მოუწოდებს ქართველ საზოგადოებას, სიფრთხილით მიუდგნენ ადგილობრივი თვითმმართველობის არჩევნებს.

24 საათი 16.02.10

"ხელისუფლება ინტენსიურად იყენებს ძალოვან და ადმინისტრაციულ სტრუქტურებს ქვეყანაში შიშისა და მორჩილების ატმოსფეროს შესაქმნელად. სააკაშვილის რეჟიმი არ ერიდება ამ პროცესში ქურდული სამყაროს ჩართვას, აგრეთვე საკუთარი ნარკოქსელის გამოყენებას. მასობრივი ხასიათი მიიღო როგორც სახელმწიფო, ასევე კერძო სექტორში მომუშავე ადამიანების დაშინებამ, უკანონო პატიმართა ოჯახების წევრების შევიწროვებამ. ადამიანებს ემუქრებიან სამსახურიდან დათხოვნით ან მათთვის ეკონომიკური პრობლემების შექმნით. ხელისუფლება არც პირდაპირ მოსყიდვას ერიდება," - აცხადებს ზურაბ ნოღაიდელი.

მისი თქმით, თითოეული ასეთი კონკრეტული ფაქტის შესახებ საზოგადოებას სრული ინფორმაცია უნდა ჰქონდეს. ამიტომ, მოძრაობა ასეთ ფაქტებს დოკუმენტურად აღნუსხავს და საჯაროს გახდის.

მოძრაობის ლიდერი მოუწოდებს საჯარო მოხელეებს, ემსახურონ საქართველოს და არა "ნაცმოძრაობას", დაიცვან კანონი და იბრძოლონ იმისთვის, რომ მთელ საქართველოში სამართლიანობა და კანონის უზენაესობა დამყარდეს. იგი მომავალში კატეგორიულად გამორიცხავს რაიმე ნიშნით პოლიტიკურ ანგარიშსწორებას.

პრესკონფერენციაზე ზურაბ ნოღაიდელმა ყველა ოპოზიციურ ძალას მოუწოდა, საერთო ძალისხმევით აღკვეთონ არჩევნების გაყალბების ყველა მცდელობა

სტატიის მისამართი: http://24saati.ge/index.php/category/news/politics/2010-02-16/3579.html