"პოლიტიკა პოლიტიკოსების საქმეა და არა სამეგობროების"

ჭადრაკის სასახლეში, "საზოგადოების დარბაზის" ინიციატივით გამართული შეხვედრის მთავარი მიზანი თბილისის მერის არჩევნებისთვის ოპოზიციის საერთო კანდიდატის დასახელება იყო.

დათო გამისონია

24 საათი 25.02.10

მართალია კონკრეტული გადაწყვეტილების მიღება ვერ მოხერხდა, მაგრამ საერთო კანდიდატის გამოსავლენად კიდევ ერთი შეხვედრის გამართვა დაგეგმეს, სახელწოდებით - "თბილისის დიდი კრება." გუშინდელ შეხვედრაში "რესპუბლიკური პარტიისა" და "ახალი მემარჯვენეების" წევრებს მონაწილეობა არ მიუღიათ. "ალიანსში" და დანარჩენ ოპოზიციაში მიმდინარე პროცესებზე "24 საათი" "რესპუბლიკელ" დავით ზურაბიშვილსა და "მემარჯვენე" მამუკა კაციტაძეს ესაუბრა.

- ბატონო დავით, "ალიანსში" უკმაყოფილება ოპოზიციურ პარტიებს შორის მოლაპარაკებებში ყოფილ პრემიერ-მინისტრ ზურაბ ნოღაიდელის მონაწილეობის საკითხმა გამოიწვია. "რესპუბლიკური პარტიისთვის" ასევე მიუღებელია საერთო ოპოზიციური კანდიდატის გამოსავლენად პრაიმერის ჩატარება.

დავით ზურაბიშვილი: ამ პროცესში ჩვენთვის ორივე საკითხი მნიშვნელოვანია. ნოღაიდელის ფაქტორი ნამდვილად არ არის ტექნიკური საკითხი. აქ წინა პლანზე მსოფლმხედველობრივი და მორალური პოზიციები იწევს. ადამიანი, რომელიც "ედინაია როსიას" ფილიალის წარმომადგენელია და ამას თვითონაც არ მალავს, არ შეიძლება ჩვენი პოლიტიკურ პარტნიორი იყოს.

რაც შეეხება პრაიმერს, ჩვენ თავისთავად ფორმის საწინააღმდეგო არაფერი გვაქვს, მაგრამ მიგვაჩნია, რომ პრაიმერში ის გაიმარჯვებს, ვინც ხელისუფლებას სურს, რადგან ხელისუფლებას პრაიმერის შედეგზე ზემოქმედების საშუალება აქვს.

- როგორ ვარაუდობდით მოვლენების განვითარებას იმ შემთხვევაში, თუ ირაკლი ალასანია თქვენს პოზიციას დაეთანხმებოდა?

- ჩვენ წინასაარჩევნო კამპანიაზე უნდა დაგვეწყო ფიქრი. როდესაც ირაკლი ალასანია და "ალიანსი საქართველოსთვის" ოპოზიციურ ფლანგზე ერთობლივად იყვნენ, ვფიქრობ, ალასანია გამოკვეთილი ლიდერი იყო. თუკი ოპოზიციური პარტიებიც შემოგვიერთდებოდნენ, ხომ კარგი. მაგრამ, ჩვენ მექანიკურ გაერთიანებას მხარს არ ვუჭერთ. უნდა გაერთიანდე იმასთან, ვინც მთავარ საკითხებში შენს პრინციპებს იზიარებს. ძალიან მნიშვნელოვანია თუნდაც რუსეთთან ურთიერთობის თემა.

თუ ბატონი ირაკლი სხვა პოზიციაზე იქნება და სხვა მიმართულებით გადადგამს ნაბიჯებს, ამით ის თვითონ დააყენებს თავს "ალიანსის" გარეთ.

- რატომ ვერ მოახერხეთ ირაკლი ალასანიას დარწმუნება, რომ "რესპუბლიკელების" და "მემარჯვენეების" პოზიცია უფრო სწორი იყო?

- თავის დროზე ალასანიამ თვითონვე განაცხადა, რომ პრაიმერის თემა დახურულია. ჯერ კიდევ სამი დღის წინათ ნოღაიდელის მიმართ ისეთივე პოზიცია ჰქონდა, როგორიც ჩვენ. შემდეგ რა შეიცვალა, ვერ გეტყვით. შესაძლოა, მიიჩნია, რომ ლევან გაჩეჩილაძესთან, ზურაბ ნოღაიდელთან და "კონსერვატორებთან" კონფიგურაციაში თბილისის მერის არჩევნებში მისი გამარჯვების შანსი მეტია. ჩემი აზრით, ეს შეცდომაა. სამწუხაროდ, მას თავად არ ჰქონდა რწმენა, რომ უკვე არის რეალური ლიდერი, თორემ არ დასჭირდებოდა იმ შეხვედრაზე წასვლა, სადაც იმყოფებოდა. ირაკლი ალასანიას თვითონ უნდა დაეწყო მოქმედება და მერე გამოჩნდებოდა, ვინ შეუერთდებოდა და ვინ არა. თუ ოპოზიციური პრაიმერი გაიმართება, გაიმარჯვებს ის, ვინც ხელისუფლებას უნდა. პრაიმერის ინიციატორმა პარტიებმა ჩვენი არგუმენტები იციან. მართალი გითხრათ, მათგან ძალიან ემოციური პასუხების გარდა - "ეს თუ ვერ გავაკონტროლეთ, აბა, ჩვენ ვინა ვართ" - სხვა, რაციონალური, დასაბუთებული არგუმენტი არ მომისმენია.

- "საზოგადოების დარბაზის" ინიციატივით გამართულ შეხვედრაზე "თბილისის დიდი კრების" მოწვევა დაიგეგმა, სადაც, შესაძლოა, თბილისის მერის არჩევნებისთვის ოპოზიციის საერთო კანდიდატი დაასახელონ. ოპოზიციის შიდა პოლიტიკურ პროცესებში სხვა პროფესიის ადამიანებიც აპირებენ მონაწილეობას.

- არ ვიცი, ეს როგორ უნდა მოხერხდეს და რას ნიშნავს საზოგადოების მიერ გამოვლენილი კანდიდატი. რომელი საზოგადოების? რამდენი არიან? საიდან მოვიდნენ? არსებობს თუ არა რაიმე კვოტები? ეს ყველაფერი ჩემთვის სრულიად გაუგებარია. პოლიტიკა პოლიტიკოსების საქმეა და არა რაღაც სამეგობროების და საძმაკაცოების. თუ გარკვეულ მექანიზმს გვთავაზობენ და საზოგადოების მონაწილეობაზეა საუბარი, ეს ძალიან მკაფიოდ უნდა იყოს განსაზღვრული. კერძოდ, როგორ ხდება, ვინ რომელ ფენას წარმოადგენს და სხვა. ამის ნაცვლად იმის თქმა, რომ ახლა შევიკრიბეთ და ერთ დარბაზში საკითხის გადაწყვეტა მოვისურვეთ, ეს საზოგადოება არ არის, ეს საზოგადოების ერთი ნაწილია. ისინი ოპოზიციას გაერთიანებისკენ მოუწოდებენ. როცა ამაზეა ლაპარაკი, ჩვენ ყოველთვის ვსვამთ კითხვას - როგორ უნდა მოხდეს ეს? ჩვენ ჩვენი ფორმულა შევთავაზეთ და თუ ამაზე არ დათანხმდებიან, ცხადია, ჩვენ მათ მიერ ორგანიზებულ პროცესებში მონაწილეობას არ მივიღებთ და საქმიანობას "ალიანსის" ფარგლებში გავაგრძელებთ.

- თუ ოპოზიციურმა პარტიებმა საერთო კანდიდატი თქვენი მონაწილეობის გარეშე დაასახელეს, რა ფორმით ჩაერთვება "რესპუბლიკური პარტია" საარჩევნო პროცესში?

- ეს არ იქნება ოპოზიციის ერთიანი კანდიდატი. ვინმესთვის გაუგებარია, რომ "ახალი მემარჯვენეებიც" და "რესპუბლიკელებიც" ოპოზიცია ვართ? თუნდაც იმიტომ, რომ ჯერჯერობით ხელისუფლებაში არ მოვსულვართ. სოზარ სუბარიც ოპოზიციაა, ისევე როგორც "ეროვნული ფორუმი" და "ლეიბორისტული პარტია", მიუხედავად იმისა, რომ ეს პარტიები ადგილობრივ არჩევნებში მონაწილეობას არ აპირებენ. ამიტომ, სწორი არ არის, რომ ამას ოპოზიციის ერთიანი კანდიდატი ეწოდოს. ეს პრაიმერის ჩატარების მომხრე ჯგუფის ერთიანი კანდიდატი იქნება.

- ბატონო მამუკა, ჭადრაკის სასახლეში შეხვედრაზე დამსწრე საზოგადოების ნაწილმა "ახალ მემარჯვენეებსა" და "რესპუბლიკელებს" თბილისის მერის არჩევნებისთვის ოპოზიციის საერთო კანდიდატის შესარჩევ პროცესებში აქტიური ჩართვისკენ მოუწოდა. მათ შორის, "ხალხის პარტიის" ლიდერმა კობა დავითაშვილმა განაცხადა, რომ საერთო კანდიდატის შერჩევაში მონაწილეობას ორივე პარტიას მუხლმოდრეკილი სთხოვს.

მამუკა კაციტაძე: არც "მემარჯვენეებისთვის," არც "რესპუბლიკელებისთვის," არც სოზარ სუბარისთვის და მთლიანად "ალიანსისთვის" ერთიანი კანდიდატის საკითხზე ხვეწნა არ არის საჭირო. პირიქით, ჩვენ მოწოდებულნი ვართ, რომ ერთობა შედგეს. ამ ერთიანობისთვის კონკრეტული ნაბიჯები გვაქვს გადადგმული. მათ შორის, კონკრეტული პოზიციები დავთმეთ და "ალიანსის" შექმნა ამის გამოხატულებაა. რაც შეეხება ამ პროცესში ჩვენს ჩართულობას, მას შემდეგ, რაც რიგი პოლიტიკური პარტიებისა და საზოგადოების წარმომადგენლები გადაწყვეტენ, რომ პრაიმერი მიუღებელი ფორმაა და გვეტყვიან, მოდით, ერთიანი კანდიდატის გამოსაკვეთად სხვა ფორმებზე ვიმსჯელოთ, ბუნებრივია, ამ პროცესში ჩავერთვებით.

მიგვაჩნია, რომ უკეთესი ფორმა და მეთოდია სოციოლოგიური კვლევებით კანდიდატის შერჩევა. აქედან გამომდინარე, რაიმე ტიპის თხოვნა, მით უმეტეს, ჩვენ მიმართ მუხლმოდრეკილობა საჭირო არ არის. ჩვენივე მიზანია, რომ ერთობა შედგეს და ერთიანი კანდიდატი დასახელდეს, ოღონდ არა პრაიმერით, რაც ხელისუფლებას მანიპულირების საშუალებას მისცემს.

- ჭადრაკის სასახლეში გამართულ შეხვედრაზე ოპოზიციის საერთო კანდიდატი არ დასახელებულა. თქვენი აზრით, რა მიზნით დაგეგმეს შეკრება, რომელშიც, პოლიტიკურ ოპოზიციასთან ერთად, სხვა ადამიანებიც მონაწილეობდნენ?

- უპირველეს ყოვლისა, საზოგადოება და მათი წადილი, რომ ოპოზიციური ერთობა შედგეს, უაღრესად პატივსაცემია. იქ შეკრებილი საზოგადოება პირადად ჩემს მოკრძალებას და მოწიწებას იმსახურებს. მაგრამ, სამწუხაროდ, მთლიანად პროცესი ემსახურება ნოღაიდელის პოლიტიკაში შემოყვანას, მისი ძველი ხინჯებისა და ნაკლოვანებების ჩამორეცხვას და ა.შ. გამოვიდა, რომ პოლიტიკურად ამ შინაარსს იძენს ის პროცესი, რომელშიც საზოგადოება აბსოლუტურად გულწრფელია. დაგეგმილი "კრების" შესახებ კი უნდა ითქვას, რომ მისი ორგანიზატორები კანდიდატის გამოვლენის ფორმაზე მკაფიოდ უნდა ჩამოყალიბდნენ.

- რაც შეეხება "ალიანსში" შექმნილ ვითარებას, რა იყო ირაკლი ალასანიასთან პოზიციების შეუთანხმებლობის თავდაპირველი მიზეზი?

- ჩვენ შორის სხვადასხვა პოლიტიკურ საკითხებზე სტრატეგიული ხასიათის განსხვავებები ნამდვილად არ არსებობს. ირაკლისთან საუბარი გვქონდა იმაზე, რომ პრაიმერის თემა ხიფათს შეიცავს და სახელისუფლებო ხაფანგად იქცა. ამიტომ ჩვენ მას ვუთხარით, რომ მეთოდის შერჩევის პროცესებში ის თავისუფლად მიიღებს მონაწილეობას. მას შემდეგ, რაც მეთოდები ცნობილი გახდება, ბუნებრივია, ჩვენთვის სასურველი იქნება საუბარი სხვა საშუალებებზე - მოლაპარაკებებსა თუ კვლევებზე. ჩვენ ამ საკითხის გარდა ირაკლი ალასანიასთან და "თავისუფალ დემოკრატებთან" სხვა განსხვავებები არ გვაქვს. თუ ეს დაიძლევა, ამით "ალინსში" რღვევების დაწყებაზე შექმნილი მითი გაქარწყლდება.

- რა გეგმები აქვთ "ახალ მემარჯვენეებს" შექმნილ სიტუაციაში?

- მშურს ხოლმე ჟურნალისტების და პოლიტოლოგების, რომლებიც დაშვებებით მსჯელობენ. სამწუხაროდ, პოლიტიკოსებს ეს თავისუფლება არ გვაქვს. ოპოზიციიდან ჩვენმა კოლეგებმა იციან ჩვენი პოზიცია, თუ ამის გაუთვალისწინებლად მიიღებენ გადაწყვეტილებას, ჩვენც ამის მიხედვით შევიმუშავებთ ადეკვატური მოქმედების გეგმას.

სტატიის მისამართი: http://24saati.ge/index.php/category/news/politics/2010-02-25/3895.html