საქართველოს განათლების სისტემა არ დააფინანსებს უხარისხო საერთაშორისო კვლევებს

ინტერვიუ დიმიტრი შაშკინთან

24 საათი 30.12.11

ინტერვიუ დიმიტრი შაშკინთან

- ბატონო დიმიტრი, "პრაიმ-თაიმში" მასმედიის წარმომადგენლებთან შეხვედრისას თქვენ განაცხადეთ, რომ არ ეთანხმებით საქართველოში ჩატარებული საერთაშორისო კვლევების შედეგებს, რომლებითაც განათლების სისტემაში მოსწავლეთა ცოდნა შეფასდა. თუ შეიძლება, აგვიხსენით, რა გახდა ასეთი გადაწყვეტილების მიზეზი?

- ერთ-ერთმა საერთაშორისო არასამთავრობო ორგანიზაციამ მსოფლიოს ბევრ ქვეყანაში, მათ შორის საქართველოშიც, განათლების სისტემაში საერთაშორისო კვლევა ჩაატარა, რომლის შედეგებს კვლევაში მონაწილე ქვეყნების უმრავლესობა არ დაეთახმა - მათ შორის საქართველოც.

- რამ განაპირობა ასეთი დამოკიდებულება?

- საერთაშორისო არასამთავრობო ორგანიზაციის მიერ განათლების სისტემაში ჩატარებულ კვლევაზე ასობით ათასი დოლარი იხარჯება. კვლევის შედეგები 2-3 წლის წინანდელ მოვლენებს აფასებს, რაც საქართველოს განათლების სისტემას და მოსწავლეებს არაფერს აძლევს. მინდა, პირდაპირ გითხრათ, რომ მე, როგორც საქართველოს განათლებისა და მეცნიერების მინისტრს, ამგვარი კვლევები რელევანტურად არ მიმაჩნია.

- რა გაძლევთ ასეთი განცხადების საფუძველს?

- კვლევაში მონაწილეობის სურვილს ყველა ქვეყანა ნებაყოფლობით გამოთქვამს. მსოფლიოს წამყვანი ქვეყნების აბსოლუტური უმრავლესობა ამ კვლევაში არ მონაწილეობს. ისინი ყოველთვის შიდა, ეროვნულ კვლევებს ატარებენ. განათლების სისტემაში საერთაშორისო არასამთავრობო ორგანიზაციის მიერ განხორციელებული ეს კვლევა, ჩემი აზრით, ნონსენსია - ის აფასებს სისტემაში 2-3 წლის წინ მომხდარ მოვლენებს, ანუ 2011 წელს გამოქვეყნებული კვლევა 2008 წლის შედეგებს აჩვენებს. მე, მინისტრს, რომელიც პასუხისმგებელი ვარ საკუთარი უწყების ბიუჯეტსა და სამინისტროს პოლიტიკაზე, მიჩნდება ძალიან მარტივი შეკითხვა - რა საჭიროა, 2011 წელს ვიკვლიოთ ის, თუ რა ხდებოდა განათლების სისტემაში 2008 წელს, რა სარგებელი შეიძლება მოიტანოს კვლევამ, რომელიც 2-3 წლის წინათ მომხდარ მოვლენებს აფასებს?

საქართველოს განათლებისა და მეცნიერების სამინისტრო უამრავ პროექტს ახორციელებს და თითოეულს თავისი დანიშნულება და მიზანი აქვს. მაგალითად, ვარემონტებთ და ვაშენებთ სკოლებს, რათა ბავშვებმა უკეთეს გარემოში ისწავლონ, მასწავლებლებს ვუზრდით ხელფასს, რათა მათ მეტი მოტივაცია ჰქონდეთ. პირველკლასელებს ვურიგებთ ნეტბუქებს და მოსწავლეებს კომპიუტერებით ვაჯილდოებთ მათთვის მოტივაციის ასამაღლებლად; სკოლებში სწავლების ხარისხის გასაუმჯობესებლად შევცვალეთ ეროვნული სასწავლო გეგმა. შევცვალეთ სახელმძღვანელოები, რათა ისინი ხარისხიანი და იაფი გაგვეხადა. ჩვენი ყოველი ნაბიჯი გარკვეული მიზნის მიღწევას ემსახურება. მაგრამ არ მესმის და ვერავინ მისაბუთებს, თუ რატომ უნდა გადავიხადოთ ასობით ათასი დოლარი 2011 წელს, იმისათვის, რომ შევაფასოთ განათლების სისტემაში 2008 წელს არსებული მდგომარეობა? შეიცვალა ეროვნული სასწავლო გეგმა, შეიცვალა პოლიტიკა და ქვეყანა წინ მიიწევს.

- ცნობილია, რომ აღნიშნულ კვლევაში მონაწილეობაზე უარი მრავალმა ქვეყანამ განაცხადა…

- წელს შემოდგომაზე, ბერლინში, მსოფლიო ბანკის ეგიდით ორგანიზებულ საერთაშორისო კონფერენციაში «მოსწავლეთა შეფასების შედეგების გამოყენება განათლების ხარისხის ასამაღლებლად», მონაწილეობდნენ განათლების სისტემის სპეციალისტები და ექსპერტები მსოფლიოს წამყვანი ქვეყნებიდან, მათ შორის გერმანიიდან და სინგაპურიდან. ამ კონფერენციაზე ბევრმა ქვეყანამ და მათ შორის სინგაპურმაც ღიად გამოთქვა პრეტენზიები აღნიშნული კვლევის ჩატარების მეთოდოლოგიის მიმართ. ყველა ქვეყანას ერთმანეთისგან სრულიად განსხვავებული ეროვნული სასწავლო გეგმები აქვს, ყოველი მათგანი გარკვეულ შედეგზე გარკვეულ პერიოდში გადის. მაგალითად, ზოგ ქვეყანაში განათლების სისტემის მიხედვით მოსწავლეები ბოლო სამ კლასში კონკრეტულ სპეციალობებს სწავლობენ, უკრაიანასა და ბელარუსს 11-წლიანი სწავლება აქვთ, აშშ-ში ყველა შტატს ერთმანეთისგან აბსოლუტურად განსხვავებული სასწავლო გეგმა აქვს და სწორედ ამ მიზეზით შტატების უმეტესობა არ მონაწილოებს ზემოთ აღნიშნულ კვლევაში.

- საქართველოს განათლების სისტემა სრულყოფილი რომ არ არის, სწორედ ამიტომ ვატარებთ რეფორმას 47 მიმართულებით. მაგრამ როდესაც საერთაშორისო არასამთავრობო ორგანიზაცია მოგვმართავს კვლევის ჩატარების წინადადებით და ამბობს, რომ საქართველოს განათლების სისტემას იგივე პრობლემები აქვს, როგორიც ვატაულუს და ამ პრობლემების გამოსწორებაში იმავე მეთოდებით უნდა დამეხმაროს, როგორც იმ ქვეყანას, სადაც ძალიან მწვავედ დგას განათლების პრობლემა, ეს, უბრალოდ, მკრეხელობა და პირდად ჩემი და ჩემი ქვეყნის შეურაცხყოფაა. ჩვენს ქვეყანაში არ დგას განათლების მიღების პრობლემა.

- მესმის, რომ ძალიან ბევრი არასამთავრობო ორგანიზაცია ცდილობს გრანტების მოპოვებას გარკვეულ პრობლემებზე სამუშაოდ. მაგრამ არსეობობს UNICEF-ის - გაერო-ს ბავშვთა ფონდის, ერთ-ერთი ყველაზე ავტორიტეტული საერთაშორისო ორგანიზაციის დასკვნა, რომლის მიხედვითაც საქართველოში განათლების ხელმისაწვდომობა ძალიან მაღალია. სწორედ ამიტომ, საქართველოს განათლებისა და მეცნიერების სამინისტრო გაურკვეველ არასამთავრობო ორგანიზაციას არ გადაურიცხავს ასობით ათას დოლარს სრულიად უშედეგო კვლევის ჩასატარებლად. ასეთი კვლევა საქართველოს არ სჭირდება და ამაში ფულს არ დავხარჯავთ.

- რას გეგმავს საქართველოს განათლებისა და მეცნიერების სამინიტრო? მიიღებს თუ არა საერთაშორისო კვლევებში მონაწილეობას?

- ვიდრე აღნიშნულ კვლევებში არ აღმოიფხვრება ზემოთ ჩამოთვლილი შეცდომები, რაზეც ბერილინის საერთაშორისო კონფერენციაზე ისაუბრეს, საქართველო არანაირ საერთაშორისო კვლევაში არ მიიღებს მონაწილეობას. ჩვენ არ დავხარჯავთ თანხებს ცუდ პროდუქტში. საქართველოს განათლებისა და მეცნიერების სამინისტროში შეიქმნა სსიპ განათლების ხარისხის განვითარების და შეფასების ეროვნული ცენტრი, რომელიც საქართველოში ეროვნულ შეფასებებს ჩაატარებს.

სტატიის მისამართი: http://24saati.ge/index.php/category/news/politics/2011-12-30/23769.html