იტალიის მართლმსაჯულება ქვეყნის პრემიერ-მინისტრის წინააღმდეგ

მილანის ტრიბუნალის მოსამართლემ გადაწყვიტა არ შეწყვიტოს იტალიის პრემიერ-მინისტრის სილვიო ბერლუსკონის წინააღმდეგ აღძრული საქმის გამოძიება.

24 საათი 02.03.10

ბერლუსკონი 1999-2000 წლებში თავის ბრიტანელი ადვოკატის დევიდ მილსისთვის 60 ათასი დოლარის ოდენობის ქრთამის მიცემაშია ეჭვმიტანილი, რომლის სანაცვლოდაც, ადვოკატს არასწორი ჩვენება უნდა მიეცა გამოძიებისთვის. გამოძიება ბერლუსკონის მფლობელობაში მყოფი კომპანიის Fininvest-ის კორუფციულ გარიგებებსა და თაღლითურ საქმიანობას იძიებდა.

გასული კვირას იტალიის საკასაციო სასამართლომ მილსისთვის გამოტანილი სასჯელი - ოთხწელიწადნახევრიანი პატიმრობა დანაშაულის ხანდაზმულობის გამო გააუქმა. 26 თებერვალს გამართულ სასამართლო სხდომაზე მოსამართლემ არ მიიღო ბერლუსკონის პირადი ადვოკატის ნიკოლა გედინის შუამდგომლობა საქმის მოსმენის გადადების შესახებ.

მიუხედავად იმისა, რომ მილსისთვის საკასაციო სასამართლოს ბრალდება ჯერ არ მოუხსნია, ბერლუსკონის მომხრეები აცხადებენ, რომ პრემიერ-მინისტრის ყოფილ ადვოკატს სასჯელის მოხდა, დანაშაულის ხანდაზმულობის გამო აღარ მოუწევს. მათ საკასაციო სასამართლოს მიერ მიღებულ დადგენილებას უკვე უწოდეს ბერლუსკონის გამარჯვება. პრემიერ-მინისტრის მოწინააღმდეგეები კი აცხადებენ, რომ საკასაციო სასამართლოს გადაწყვეტილებები საქმის დახურვისკენ მიდის და ამ გადაწყვეტილებას მკაცრად აკრიტიკებენ კიდეც.

პრემიერისა და მისი ადვოკატის მიმართ დაწყებული გამოძიების პროცესი მას მერე განაცალკევეს, რაც ქვეყანის საკანონმდებლო ორგანომ მიიღო კანონი იტალიის მთავრობის წევრის მიმართ სასამართლოს წინაშე იმუნიტეტის არსებობის თაობაზე. ამის შემდეგ, ბერლუსკონის წინააღმდეგ აღძრული სისხლის სამართლის საქმე შეაჩერეს, ხოლო მილსი წარსდგა მართლმსაჯულების წინაშე.

როგორც ცოტა ხნის წინ იტალიის პრემიერმა განაცხადა, იმედი აქვს, რომ მილსს გაამართლებენ. მან დადასტურა, რომ მის საწინააღმდეგოდ გამართული სასამართლო პროცესები არანაირად არ აისახება ქვეყნის ხელისუფლების გეგმებზე, რაც იტალიის სასამართლო სისტემის რეფორმას ითვალისწინებს. ამის შემდეგ კი იტალიის მართლმსაჯულების წარმომადგენლებს "თალიბები" უწოდა, რითაც დამოუკიდებელი სასამართლო-საგამოძიებო ორგანოს წარმომადგენლების განრისხება გამოიწვია.

სტატიის მისამართი: http://24saati.ge/index.php/category/news/world/2010-03-02/4034.html