ჯოზეფ ბაიდენი ახლო აღმოსავლეთში ჩავიდა

გუშინ ამერიკის ვიცე-პრეზიდენტი ჯოზეფ ბაიდენი ისრაელში ჩაფრინდა. იგი ამ ქვეყნის პრემიერ-მინისტრ ბენიამინ ნეთანიაჰუს, პრეზიდენტ შიმონ პერესსა და ოპოზიციის ლიდერ ციპი ლივნის შეხვდა.

24 საათი 10.03.10

დღეს ბაიდენი პალესტინის ავტონომიის ადმინისტრაციის ხელმძღვანელ მაჰმუდ აბასს შეხვდება. ბაიდენი ამერიკის ყველაზე მაღალი რანგის წარმომადგენელია, რომელიც ახლო აღმოსავლეთში ბარაკ ობამას გაპრეზიდენტების შემდეგ ჩადის. ვიზიტის მთავარი მიზანია სამშვიდობო პროცესის გამოცოცხლება, რომლის პერსპექტივაც ამ ეტაპზე საკმაოდ ბუნდოვანია. ისრაელ-პალესტინის სამშვიდობო მოლაპრაკებები, მართალია, განსაკუთრებული წარმატების გარეშე, მაგრამ მაინც უკვე 16 წელიწადია, მიმდინარეობს. ის ერთ წლის წინ შეწყდა ღაზას სექტორში პალესტინელთა ინიციატივით დაწყებული სამხედრო ოპერაციის გამო. დღეს პალესტინელების მთავარი მოთხოვნაა მშენებლობის შეჩერება ებრაულ დასახლებებში მდინარე იორდანეს დასავლეთ სანაპიროზე და აღმოსავლეთ იერუსალიმში. ისრაელი დათანხმდა მშენებლობების დროებით - 10 თვით გაყინვას ყველგან, აღმოსვლეთ იერუსალიმის გარდა. პალესტინელები დათანხმდნენ მოლაპარაკებების განახლების 4-თვიან რაუნდს, ოღონდ არა პირდაპირ ისრაელთან, არამედ რეგიონში ამერიკის სპეციალურ წარმომადგენელ ჯორჯ მიტჩელის შუამავლობით. ასეთი სქემა თავის დროზე ყოფილ სახელმწიფო მდივან ჰენრი კისინჯერის დროს გამოიყენებოდა. ამ ეტაპზე ესეც მიღწევად მიიჩნევა. პალესტინელები ღიად აცხადებენ, რომ მოლაპარაკებების წარმატების არ სჯერათ და მათ გამართვას ამერიკის პატივისცემის ნიშნად დათანხმდნენ. პრემიერმა ნეთანიაჰუმ ორშაბათს განაცხადა, რომ ისრაელს, პირველ რიგში, სურს მიიღოს იმის გარანტია, რომ პალესტინის მხრიდან სარაკეტო დარტყმები ან სხვა ფორმით ძალადობა არ განახლდება. ნეთანიაჰუს აზრით, ამ პირობის დაცვის შემთხვევაში, "ჩვენ შევძლებთ ისეთი შეთანხმების მიღწევას, რომელიც არაერთ თაობას მოემსახურება". ნეთანიაჰუსთან ბაიდენის საუბრის კიდევ ერთი მნიშვნელოვანი თემა ირანის ბირთვული პროგრამა და ზოგადად ირანისგან მომდინარე საფრთხე იქნება.

სტატიის მისამართი: http://24saati.ge/index.php/category/news/world/2010-03-10/4172.html