ევროსაბჭოს საპარლამენტო ასამბლეა რუსეთის წინააღმდეგ

პოლიტიკური ექსპერტები ერთხმად აღნიშნავენ, რომ ევროპის საბჭოს საპარლამენტო ასამბლეაში რუსეთის საქმე ცუდად მიდის.

24 საათი 28.04.12

ცოტა ხნის წინ რუსეთის დელეგაციამ სირიის შესახებ საკუთარი პოზიციის დაფიქსირება ვერ შეძლო. რეზოლუცია, რომელიც რუსეთის უკმაყოფილების მიუხედავად, შეიცავდა გაეროსადმი მოწოდებას სირიისათვის იარაღის მიწოდებაზე ემბარგოს დაწესების შესახებ, თითქმის ერთხმად მიიღეს.

რუსეთს, სავარაუდოდ, კიდევ ერთი უსიამოვნება ელის: საპარლამენტო ასამბლეამ სერგეი მაგნიტსკის საქმესთან დაკავშირებით, შესაძლოა, საერთაშორისო გამოძიების სანქცია გასცეს.

სირიის შესახებ მიღებული რეზოლუციის შესარბილებლად რუსმა დელეგატებმა ერთიანად 11 შესწორება წარმოადგინეს, თუმცა ასამბლეამ ყველა მათგანი უარყო. დოკუმენტი, ფაქტობრივად, ერთხმად მიიღეს. წინააღმდეგ ხმა მხოლოდ რუსეთის დელეგაციის სამმა წარმომადგენელმა მისცა.

როგორც "კომერსანტი" აღნიშნავს, რუსეთმა მნიშვნელოვანი მარცხი განიცადა - სირიის რეზოლუციის პროექტი საკმაოდ მკაცრი აღმოჩნდა: "საპარლამენტო ასამბლეა შეშფოთებულია სირიაში არსებული სიტუაციით, სადაც სირიის ავტორიტარული ხელისუფლების ხელით 11 000 ადამიანია დაღუპული" - საუბარია დოკუმენტის პირველივე სტროფებში, სადაც დაგმობილია "ადამიანის უფლებების სისტემატური რღვევა და კაცობრიობის წინააღმდეგ მიმართული დანაშუალი, რომელსაც ქვეყნის არმია და უსაფრთხოების ძალები ახორციელებენ". ასამბლეა კაცობრიობის წინააღმდეგ ჩადენილი ყველა დანაშაულის გამოძიებასა და დამნაშავეების საერთაშორისო სასამართლოსათვის გადაცემას ითხოვს.

რეზოლუციის მეხუთე პუნქტში, ფაქტობრივად, ბაშარ ალ-ასადის რეჟიმისთვის განაჩენია გამოტანილი: "დიქტატორის რეჟიმს მომავალი არ აქვს. ნათელია, რომ ასადის რეჟიმის დასასრული დგება."

დოკუმენტის მეშვიდე პუნქტში აღნიშნულია, რომ სირიაში გაეროს სპეციალური წარმომადგენლის კოფი ანანის სამშვიდობო გეგმა ფაქტობრივად არ სრულდება. ამასთან დაკავშირებით ასამბლეა სირიისათვის იარაღით ვაჭრობაზე ემბარგოს დაწესებას ითხოვს. რუსეთის დელეგაციის ხელმძღვანელმა ალექსეი პუშკოვმა ამ თავის საერთოდ ამოშლის წინადადება წამოაყენა, იქიდან გამომდინარე, რომ გაეროსადმი ასამბლეის მოთხოვნა რუსეთის ინტერესებს შეეხება, რომელსაც დამასკოსთან ფართო სამხედრო კონტაქტები აქვს. მთლიანობაში რუსეთის მიერ შემოთავაზებული 11 შესწორებიდან არც ერთი არ გაითვალისწინეს. რუსეთის დელეგაციამ ეს მცდელობა იმით ახსნა, რომ "სირიის რეჟიმის ტრანსფორმაცია მშვიდობიან ფორმებში მოხდეს."

მიღებულ რეზოლუციაზე რუსეთის მხარეს ჯერ კომენტარი არ გაუკეთებია, თუმცა განაცხადეს, რომ სირიის წინააღმდეგ სანქციების დაწესება "კონტრპროდუქტიულია".

ამ დროისათვის სირიის საკითხის მოგვარების ერთადერთ იმედად რუსეთი ქვეყანაში საერთაშორისო დამკვირვებლების გაგზავნას ასახელებს. "მინდა აღვნიშნო, რომ სირიაში გაგზავნილმა დამკვირვებლების პირველივე ჯგუფმა უკვე გარკვეულ შედეგს მიაღწია." - საუბარია რუსეთის დიპლომატიური უწყების წარმომადგენლის ალექსანდრე ლუკაშევიჩის განცხადებაში.

გუშინ რუსეთს საპარლამენტო ასამბლეისაგან კიდევ ერთი უსიამოვნება ელოდა. ცნობილი გახდა, რომ ჰოლანდიელმა პიტერ ომტზიგტმა ასამბლეაში ახალი მოხსენების მომზადების საკითხი შეიტანა, რომელიც მაგნიტსკის საქმეს შეეხება. მოთხოვნის ავტორი სერგეი მაგნიტსკის სიკვდილს "მკვლელობას" უწოდებს და რუსეთის ხელისუფლებას ამ საქმის გამოძიებაში თანამშრომლობისაკენ მოუწოდებს.

"ასამბლეამ მაგნიტსკის საქმეს ყურადღება პირველად ჯერ კიდევ 2009 წლის ოქტომბერში მიაქცია, როდესაც ის ცოცხალი იყო. ასამბლეამ ახლა რუსეთის ხელისუფლებასთან ერთად უნდა შეძლოს მოხსენების მომზადება, სადაც მომხდარი ინციდენტის ყველა დეტალი გაირკვევა." - საუბარია ომტზიგტის მოთხოვნაში, რომელსაც ასამბლეის 69 დელეგატი აწერს ხელს. მოთხოვნისთვის გუშინდელ სხდომაზე კენჭი აღარ უყრიათ და ამ თემაზე ცალკე რეზოლუციის მომზადების საკითხის განხილვა მაისის ბოლოსთვის გადაიდო.