დაძაბული კვირა საპრეზიდენტო არჩევნებამდე

საფრანგეთის საპრეზიდენტო არჩევნების პირველ ტურში გამარჯვებული კანდიდატები - მოქმედი პრეზიდენტი ნიკოლა სარკოზი და სოციალისტების ლიდერი ფრანსუა ოლანდი მეორე და გადამწყვეტი ტურისთვის ემზადებიან.

ხათუნა გაბიევი

24 საათი 28.04.12

ნიკოლა სარკოზიმ 9 პოლიტიკურ მეტოქესთან ბრძოლაში სულ 27.1 პროცენტის მოპოვება შეძლო, მაშინ როდესაც მისმა უმთავრესმა მოწინააღმდეგემ მხარდამჭერთა პროცენტული რაოდენობით სულ რაღაც 1.5-ით აჯობა და 28.6 პროცენტი მოიპოვა. მეორე ტურამდე კი მხოლოდ ერთი კვირა რჩება და, შესაბამისად, მათ ძალების სრული მობილიზება უწევთ ამომრჩეველთა სულ უფრო მეტი რაოდენობის გადასაბირებლად. გადამწყვეტ რაუნდამდე სატელევიზიო არხის პირდაპირ ეთერში დებატებიც გაიმართა, სადაც საპრეზიდენტო კანდიდატებმა როგორც საკუთარ პროგრამებზე, ასევე ერთმანეთის პოლიტიკურ თუ ეკონომიკურ მიდგომებზე ისაუბრეს.

"ექვსმა მილიონმა ფრანგმა მხარი ქალბატონ ლე პენს დაუჭირა. თუმცა, ეს ამომრჩევლები რადიკალურ მემარჯვენე ფრთას არ წარმოადგენენ. ეს მათი მხრიდან არა პროტესტის, არამედ კრიზისი გამო გამოთქმული მხარდაჭერა იყო, რადგან მათ "ნაციონალური ფრონტის" მხრიდან კონკრეტული იდეები მოისმინეს. რატომ გადაწყვიტა ექვსმა მილიონმა ამომრჩეველმა ქალბატონი ლე პენის მინდობა? ეს უმთავრესი კითხვაა დემოკრატიისთვის. მსურს ვუთხრა ამომრჩეველთა ამ ნაწილს, რომ მე მათ განსჯას და, მით უფრო, ჭკუის დარიგებას არ ვაპირებ," - განაცხადა მოქმედმა პრეზიდენტმა. "ნაციონალური ფრონტის" ლიდერი მარინ ლე პენი კი, რომელმაც მხოლოდ 18 პროცენტის მოპოვებით მეორე ტურში გადასვლა ვერ მოახერხა, ამჯერად უკვე ნიკოლა სარკოზისგან ელის წინადადებს თავისი პარტიიდან მომავალ მინისტრთა კაბინეტში რამდენიმე წევრის შეყვანაზე. მარინ ლე პენის თქმით, მხოლოდ ამ შემთხვევაში მოუწოდებს თავის მომხრეებს, მეორე ტურში ხმა ნიკოლა სარკოზის მისცენ. გადაინაცვლებს თუ არა ლე პენის მომხრეთა ნაწილი სარკოზის მხარდამჭერთა რიგებში, სავარაუდოდ, 1 მაისს გაირკვევა. ყოველი შემთხვევისთვის, ჯერჯერობით რაც სოციოლოგიური გამოკითხვის შედეგებითაა ცნობილი ისაა, რომ მარინ ლე პენის მომხრეთა შორის მხოლოდ 48 პროცენტია მზად, მხარი მოქმედ პრეზიდენტს დაუჭიროს. ანალიტიკოსთა თქმით კი, იმ დროს, როდესაც მემარცხენეების მხარდაჭერა ნიკოლა სარკოზის აბსოლუტურად დაკარგული აქვს, გამარჯვების ერთადერთ შანსს მას რადიკალ მემარჯვენეთა სიმპათიების მოპოვებაღა უტოვებს.

რაც შეეხება საპრეზიდენტო კანდიდატებს შორის შეთანხმებულ ერთადერთ ტელედებატებში გამოთქმულ სხვა მოსაზრებებს, მოქმედმა პრეზიდენტმა ქვეყანაში და, ზოგადად, ევროპაში შექმნილ ეკონომიკურ კრიზისზეც ისაუბრა და ფრანსუა ოლანდის მემარცხენე ტენდენციის პროგრამაც დაიწუნა. "საფრანგეთის ეკონომიკის გადარჩენის ერთადერთი გზა სახელმწიფო ხარჯების მკაცრი კონტროლია. არ შეიძლება ვილაპარაკოთ იმაზე, რომ ეკონომიკის ზრდა სახელმწიფო ხარჯებზე კონტროლის დაკარგვით იქნება შესაძლებელი. ამდენად, ოპონენტთა ეკონომიკური პროგრამა რეალობას არის მოკლებული," - განაცხადა ნიკოლა სარკოზიმ. მას საპირწონე განცხადება შეაგება ფრანსუა ოლანდმა და ნიკოლა სარკოზის პოლიტიკურ მოკავშირეს ევროკავშირში გერმანიის კანცლერ ანგელა მერკელსაც გადაწვდა. "ჩვენ ეკონომიკის მაჩვენებლის ზრდის გარეშე ბალანსს ვერ შევინარჩუნებთ, ევროკავშირმა კი ფასიანი ქაღალდები იმ ქვეყნების დასახმარებლად უნდა გამოიყენოს, რომლებსაც დიდი რაოდენობით დავალიანება აქვთ. ვიცით, რომ გერმანია და ქალბატონი მერკელი ამის წინააღმდეგი არიან, მაგრამ ეს მოლაპარაკების საგნად არ უნდა იქცეს. გერმანია გადაწყვეტილებებს მთელი ევროპის ნაცვლად არ უნდა იღებდეს," - აღნიშნა სოციალისტების ლიდერმა.

საპრეზიდენტო კანდიდატები პირველი ტურის შემდეგ გულხელდაკრეფილნი არც ტელედებატებამდე ისხდნენ. ორშაბათს ნიკოლა სარკოზიმ გეზი საფრანგეთის ცენტრალური ნაწილისკენ, ლუარის ველისკენ აიღო, ფრანსუა ოლანდი კი ქვეყნის დასავლეთით, ბრეტანში გაემგზავრა ქალაქ კემპერსა და ლორიანში ამომრჩევლებთან შესახვედრად. სოციალისტების ლიდერის თქმით, საფრანგეთის მოქალაქეებმა სარკოზი უქმად გახარჯული ნდობის გამო დასაჯეს და თავად მას ელისეს სასახლის მომავალი ბინადრის ადგილის დაკავების შანსი მიეცა. იმ ფაქტს, რომ სარკოზის მხარდამჭერები მმართველობის პერიოდში თვალსა და ხელს შუა შემოეცალა, ბოლო სტატისტიკური მონაცემებიც მოწმობს - საფრანგეთში უმუშევართა რაოდენობამ 2 მილიონ 900 000 ადამიანს მიაღწია, რაც 1999 წლის შემდეგ ყველაზე მაღალი მაჩვენებელია.

ფრანგულ მედიაში უკვე გაჩნდა ინფორმაცია იმის შესახებაც, რომ თუ ნიკოლა სარკოზიმ მეორე ტურში გამარჯვება ვერ მოიპოვა, სამართლებრივ იმუნიტეტს დაკარგავს და მთელ რიგ სასამართლო გარჩევებშიც აღმოჩნდება. ჟურნალ "Le nouvel Observateur"-ის თანახმად, მოქმედი პრეზიდენტის სახელი "კარაჩის საქმეს" უკავშირდება. გამოძიების ვერსიით, 1994-1995 წლებში ედუარ ბალადიური, რომელიც მინისტრთა კაბინეტს ხელმძღვანელობდა და ფინანსთა მინისტრი ნიკოლა სარკოზი საუდის არაბეთისა და პაკისტანისთვის ფრანგული წყალქვეშა ნავების მიყიდვისათვის რამდენიმე შუამავალს საკომისიოს უხდიდნენ, რათა გარიგებებიდან უკანონოდ მიეღოთ სარგებელი. გარდა ამისა, ნიკოლა სარკოზის, შესაძლოა, თავისი პარტია "სახალხო მოძრაობის კავშირისთვის" უკანონო დაფინანსების გამო პასუხისგება მოუხდეს. მოქმედი პრეზიდენტი, რასაკვირველია, ბრალდებებს უარყოფს. როგორც ცნობილია, ანალოგიურ მდგომარეობაში ნიკოლა სარკოზის წინამორბედი ჟაკ შირაკიც აღმოჩნდა, რომელსაც გასულ წელს სიმბოლური ჯარიმის გადახდა მიესაჯა.

კიდევ ერთი სტატისტიკა - 1958 წლის შემდეგ, როდესაც საფრანგეთის მეხუთე რესპუბლიკა შეიქმნა, პირველად მოხდა, რომ ქვეყნის მოქმედი პრეზიდენტი არჩევნების პირველივე ტურში ლიდერის პოზიციაზე არ აღმოჩნდა. თუ ნიკოლა სარკოზი საპრეზიდენტო არჩევნების მეორე ტურში დამარცხდება, პირველი პრეზიდენტი იქნება ვალერი ჟისკარ დ’ესტენის შემდეგ, რომელმაც ქვეყნის უმაღლესი პოლიტიკური თანამდებობის მეორე ვადით მოპოვება ვერ მოახერხა (1981 წელს).

სოციალისტების ლიდერის გამარჯვების შემთხვევაში კი ფრანსუა ოლანდი პირველი სოციალისტი პრეზიდენტი გახდება ბოლო 17 წლის განმავლობაში. სოციოლოგიური გამოკითხვებით, ოლანდი ამ დრომდე ფავორიტად რჩება. გამარჯვების შემთხვევაში ფრანსუა ოლანდი ფრანსუა მიტერანის სამართალმემკვიდრე გახდება, რომელიც ქვეყანას 1981 წლიდან 1995 წლამდე მართავდა.

ფრანგი მოქალაქეების გარდა, საპრეზიდენტო არჩევნების მეორე ტურს მოუთმენლად ელის ევროპაც. ბრიტანულმა გავლენიანმა გამოცემა "ეკონომისტმა" სოციალისტების ლიდერს უკვე უწოდა სახიფათო პერსონა ევროპისა და საფრანგეთისთვის. დარჩენილი ორი კანდიდატის ბედსა და, ზოგადად, ქვეყნის განვითარების მომავალს საფრანგეთის საპრეზიდენტო არჩევნების მეორე ტური გადაწყვეტს, რომელიც 6 მაისს გაიმართება.

სტატიის მისამართი: http://24saati.ge/index.php/category/news/world/2012-04-28/28107.html