რუსეთში "ბალოტნაიაის საქმე" გააპროტესტეს

მოსკოვში, ასევე რუსეთის სხვა ქალაქებსა და მსოფლიოს რამდენიმე ქალაქშიც ხუთშაბათს ჩატარდა აქცია, რომელიც მიზნად ე.წ. "ბალოტნაიას საქმეზე" დაკავებული ადამიანების დაცვას ისახავდა.

სალომე ჯანიაშვილი

24 საათი 28.07.12

მათ 6 მაისს გამართული "მილიონების მარშის" დროს არეულობაში მონაწილეობას აბრალებენ. ოპოზიციონერები და ადამიანის უფლებათა დამცველები გამოძიებას უკანონოს უწოდებენ.

"ნოვოპუშინსკის" მოედანზე, მოსკოვის ცენტრში, ხუთშაბათს გაიმართა საპროტესტო აქცია, რომელიც ორგანიზებული იყო "6 მაისის კომიტეტის" მიერ. დამოუკიდებელი მედიის შეფასებით, მოედანზე დაახლოებით 3000 ადამიანი შეიკრება.

მიტინგის რეზოლუციაში ნათქვამია, რომ 6 მაისს "ბალოტნაიაზე" მიმდინარე მოვლენები არ მიეკუთვნება "მასობრივ არეულობას" და, აქედან გამომდინარე, სისხლის სამართლის საქმის აღძვრა ამ მუხლით უკანონოა. მიტინგის მონაწილეებმა მოითხოვეს, რომ ყველა დაკავებული დაუყოვნებლივ გაათავისუფლონ. ამის შესახებ აქციაზე განცხადება "სოლიდარობის" აქტივისტმა და "6 მაისის კომიტეტის" წევრმა სერგეი დავიდსმა გააკეთა. მისი სიტყვებით, შეიარაღებული ძალადობა მოქალაქეების მხრიდან, რომლის საფუძველზეც შესაძლოა ყოფილიყო აღძრული სისხლის სამართლის საქმე, არ მომხდარა.

"დგება ისეთი პერიოდები, როდესაც ხელისუფლება ომს უცხადებს საზოგადოებას. და ახლა ჩვენ დაგვიდგა ეს პერიოდი. ხელისუფლება მოქმედებს ომის კანონებით, უფრო ზუსტად კი, უკანონოდ." - განაცხადა ადამიანის უფლებათა დამცველმა ვალერი ბორშევმა.

ამ დროისთვის საქმეა აღძრული 16 ადამიანზე, რომელთაც ბრალად ედებათ პოლიციასთან შეტაკებაში მონაწილეობა "ბალოტნაიაზე". მათგან 11 - ივნისში დააპატიმრეს, ხოლო კიდევ ორის დაპატიმრების თაობაზე განცხადება საგამოძიებო კომისიამ აქციის დაწყების წინ, 26 ივლისსვე გააკეთა. ერთ-ერთი მათგანი, ნიკოლოზ კავკაზსკი დააპატიმრეს ხუთშაბათს, აქციის შემდეგ.

"ესენი ქალაქელი ახალგაზრდები არიან, სტუდენტები. ეს არის ხალხი, რომელიც ხვალ გამოუტანს გარდაუვალ ისტორიულ განაჩენს ძველ ხელისუფლებას. სამწუხაროა, რომ ხელისუფლებას ეს არ ესმის," - განაცხადა რუსმა მწერალმა სერგეი შარგუნოვმა.

აქციის ყველა გამომსვლელი განსხვავებულ პოლიტიკურ მოძრაობებს სოლიდარობისა და კრემლთან ბრძოლაში ჩართვისკენ მოუწოდებდა. "ჩვენი ერთადერთი იარაღი - სოლიდარობაა. წინააღმდეგ შემთხვევაში ხვალ ნებისმიერ ჩვენგანს მოაკითხავენ," - განაცხადა "მემარცხენე ფრონტის" აქტივისტმა ალექსეი სახნინმა.

მემარცხენე ფრონტის ლიდერმა სერგეი უდალცოვმა მომიტინგეებს მოუწოდა, რომ ყოველ ხუთშაბათს მოაწყონ აქცია საგამოძიებო კომიტეტის წინ. მან თავის გამოსვლაში ასევე მოუწოდა საზოგადოებას, მონაწილება მიიღონ კიდევ ერთ "მილიონების მარშში", რომელიც 15 სექტემბრისთვის იგეგმება.

"ნოვოპუშინსკის" პარკში ჩატარებული აქცია შეთანხმებული იყო ხელისუფლებასთან, თუმცა აქციის მონაწილეთა რაოდენობა უნდა ყოფილიყო არაუმეტეს 1,5 ათასი კაცისა. ორგანიზატორებს თავდაპირველად სურდათ, რომ მსვლელობა ბულვარში გაემართათ და მომიტინგეების რაოდენობა 5 ათასი ყოფილიყო, თუმცა ამაზე მათ უარი მიიღეს. მოსკოვის პოლიციის განცხადებით, პარკში სულ 800 ადამიანი შეიკრიბა, მათ შორის იყვნენ ჟურნალისტებიც.

აქციამ მშვიდობიანად ჩაიარა. პოლიციის ინფორმაციით, რომელიც პერიმეტრს იცავდა, მხოლოდ ერთი ადამიანი დააკავეს - ის მიტინგზე დანით, ტელესკოპური ჯოხითა და 5 ასაფეთქებელი რაკეტით ცდილობდა შესვლას.

დაპატიმრებულთა დასაცავად, მოსკოვის გარდა, ხუთშაბათს აქციები გაიმართა კიდევ ცამეტ ქალაქში, რუსეთში და მის ფარგლებს გარეთ. კერძოდ, აქციები გაიმართა სანკტ-პეტერბურგში, სამარაში, პენზაში, სარატოვში, როსტოვში, ვოლგოგრადში, ივანოვოში და ნიჟნი ნოვგოროდში. ოპოზიციის მომხრეებმა აქციები გამართეს ლონდონსა და თელავივში, რუსეთის საელჩოების წინ. ნიუ-იორკში და მიუნხენში - ცენტრალურ პარკებში, ხოლო პარიზში გაიმართა მსვლელობა სურათებით, რომელზეც გამოსახული იყო, როგორ ცემდა პოლიცია დაუცველ ადამიანებს.

ოპოზიციის ლიდერები ცდილობენ დაამტკიცონ, რომ 6 მაისის აქცია კანონების ფარგლებში ჯდებოდა. დიდია იმ ბრალდებულთა რიცხვი, რომლებიც აცხადებენ, რომ აქციაში მონაწილეობა საერთოდ არ მიუღიათ. ამის შესახებ განცხადება გააკეთა "დრუგაია როსიას" აქტივისტმა ალექსანდ კამენსკიმ, რომელიც ამტკიცებს, რომ იმ დღეს, სანამ "ბალოტნაიაზე" შეტაკება მოხდებოდა, რევოლუციის მოედანზე ის დააკავეს და შეტაკებაში მონაწილეობას ვერაფრით მოახერხებდა. მართალია, იგი დაკავებული არ არის, მაგრამ ეჭვიტანილთა სიაში მაინც რჩება.

"მემარცხენე ფრონტის" კოორდინატორმა სერგეი უდალცოვმა პროტესტის ნიშნად უარი განაცხადა, მონაწილეობა მიეღო "სელიგერ-2012"-ში, სადაც მას კრემლის მომხრე ახალგაზრდებთან მემარცხენე ოპოზიციის პროგრამაზე უნდა ესაუბრა. "შეაჩერეთ ჩვენი ახალგაზრდების დაპატიმრება და შემდეგ ვისაუბროთ!" - განაცხადა მან.

უდალცოვთან ერთად, "საგანმანათლებლო მისიით" "სელიგერში" მიემგზავრებოდნენ დემოკრატიული მოძრაობის "ჩვენ" ("Мы") ლიდერი, პოლიტიკური საბჭოს "სოლიდარობის" წევრი რომან დობროხოტოვი და "სპრავედლივაია როსიას" დეპუტატი ილია პონომარიოვი.

სტატიის მისამართი: http://24saati.ge/index.php/category/news/world/2012-07-28/30884.html