ალეპო გადამწყვეტი ბრძოლის მოლოდინში

სირიაში დაპირისპირებული მხარეები გადამწყვეტი ბრძოლისთვის ემზადებიან.

ივა შილაკაძე

24 საათი 06.08.12

ირანელი მომლოცველები ამბოხებულების ხელში

სირიაში დაპირისპირებული მხარეები გადამწყვეტი ბრძოლისთვის ემზადებიან.

უფრო ზუსტად, ბრძოლა უკვე მიმდინარეობს, მაგრამ ყველა ელოდება, რომ ის უფრო ფართომასშტაბიანი და სისხლისმღვრელი იქნება.გაეროს გენერალურმა ასამბლეამ სირიის თაობაზე "სარეკომენდაციო" რეზოლუცია მიიღო, რომლითაც ცდილობს, უშიშროების საბჭოს უფრო გადამჭრელი მოქმედებებისკენ უბიძგოს.

თუმცა ორი ძლიერი და ჯიუტი სახელმწიფოს (მათი დასახელება ჩვენი მკითხველისთვის საჭირო არ არის) წყალობით, ერთიანი პოზიციის შემუშავება ვერ ხერხდება. სამოქალაქო ომი კი ბოლო პერიოდში სულ უფრო ხშირად ეხებათ სირიაში მოხვედრილ სხვა სახელმწიფოების მოქალაქეებს. ამჯერად, დამასკოსთან ახლოს, ამბოხებულებმა ირანელი მომლოცველები გაიტაცეს.

გაეროს გენერალურმა ასამბლეამ პარასკევს (ჩვენი დროით, უკვე შაბათს), მიიღო საუდის არაბეთის მიერ წარდგენილი რეზოლუცია, რომელშიც არის მოწოდება სირიაში ხელისუფლების ცვლილებისა და ძალადობის შეწყვეტის თაობაზე. რეზოლუციაში დაგმობილია სირიის ხელისუფლების მიერ მძიმე შეიარაღების გამოყენება, აგრეთვე, ოფიციალური დამასკოს უარი, გაიყვანოს საარმიო შენაერთები ქალაქებიდან, რაც კოფი ანანის მიერ წარმოდგენილი სამშვიდობო გეგმის ერთ-ერთი პირობა იყო. ტექსტი ხმის მიცემის წინ ცოტა შერბილდა, იქიდან ამოიღეს მოთხოვნა პრეზიდენტ ასადის გადადგომის თაობაზე, რათა რეზოლუციისთვის მხარი რაც შეიძლება მეტ სახელმწიფოს დაეჭირა. თუმცა რუსეთის წარმომადგენელმა ვიტალი ჩურკინმა ის მაინც გააკრიტიკა და მას "ცალმხრივი" უწოდა. საფრანგეთის წარმომადგენლის გაეროში ჟერარ არომ სიტყვებით კი, რეზოლუცია მოწოდებულია აჩვენოს, რომ რუსეთი და ჩინეთი გაეროს გენერალურ ასამბლეაში "უმნიშვნელო უმცირესობას" წარმოადგენენ.

რეზოლუციას ხმა მისცა 133-მა სახელმწიფომ, 12 წინააღმდეგი იყო და 31-მა თავი შეიკავა. ამ დოკუმენტს, უშიშროების საბჭოს მიერ მიღებული რეზოლუციებისგან განსხვავებით, იურიდიული ძალა არ აქვს, მაგრამ ის ქვეყნების უმრავლესობის განწყობას აჩვენებს და უშიშროების საბჭოს უფრო აქტიური მოქმედებებისკენ მოუწოდებს.

კოფი ანანის მწვავე განცხადებების შემდეგ, რაც მან გადადგომისას გააკეთა (ამის შესახებ უკვე წერდა "24 საათი"), დიპლომატისთვის საკმაოდ პირდაპირი იყო გაეროს ამჟამინდელი გენერალური მდივანი ბან კი მუნიც. ასამბლეის გახსნისას მან განაცხადა, რომ კონფლიქტი სირიაში "სხვისი ხელებით წარმოებულ ომად" იქცა. მან მსოფლიოს წამყვან სახელმწიფოებს მოუწოდა, თავი დაანებონ ქიშპს და ბოლო მოუღონ ძალადობას. "სიმხეცე, რომლის თაობაზეც ჩვენამდე ინფორმაცია მოდის, შეიძლება იყოს დანაშაული კაცობრიობის წინააღმდეგ ან სამხედრო დანაშაული."

სირიის "ეკონომიკურ დედაქალაქში" - ორ მილიონიან ალეპოში კი ინტენსიური ბრძოლები მიმდინარეობს. ქალაქის დაახლოებით ნახევარი უკვე დაახლოებით ორი კვირაა ამბოხებულებს უკავიათ და ისინი საკუთარი კონტროლის ზონას ნელ-ნელა აფართოებენ. ამას ვერ ეგუება მმართველი რეჟიმი და ქალაქის გარშემო უზარმაზარ ძალებს მოუყარა თავი. ბრძოლებში უკვე მონაწილეობენ არტილერია, ვერტმფრენები და საბრძოლო თვითმფრინავები, მაგრამ სირიის ხელისუფლების წარმომადგენლები აცხადებენ, რომ ეს მხოლოდ "მოსამზადებელი სამუშაოებია" და შეტევა, ფაქტობრივად, ჯერ არ დაწყებულა. დამოუკიდებელი სამხედრო დამკვირვებლებიც აცხადებენ და სირიის ხელისუფლებამაც დაადასტურა, რომ ალეპოს გარშემო მობილიზებულია 20 ათასი სამხედრო მოსამსახურე. შეძლებისდაგვარად თავისი რიგები გააძლიერეს ამბოხებულებმაც. ასადის რეჟიმისთვის ალეპო, ფაქტობრივად, ბოლოსწინა ფორპოსტია, რადგან თუ ის "სირიის თავისუფალი არმიის" ხელში გადავიდა, ეს ამბოხებულებს ქვეყნის მთელი ჩრდილოეთი ნაწილის კონტროლის საშუალებას მისცემს. არ არის გამორიცხული, რომ ღამე ასადის არმიას შტურმი უკვე დაეწყო კიდეც.

დედაქალაქიდან კი აბოხებულებს გუშინ უკვე უკან დაახევინეს. კვირა დილისთვის ხელისუფლების ერთგულმა ძალებმა დაიკავეს რაიონი თადამუნი, რომელიც სირიის თავისუფალი არმიის ბოლო დასაყრდენი იყო დამასკოში. ეს მოსალოდნელიც იყო, რადგან ამბოხებულების ძირითადი ძალები ალეპოშია მობილიზებული.

შაბათს დამასკოს მახლობლად ავტობუსიდან ჩამოსვეს და გაურკვეველი მიმართულებით წაიყვანეს 48 ირანელი მომლოცველი, რომლებიც შიიტური სიწმინდის საიედა ზაინაბის მოსანახულებლად იყვნენ ჩასული სირიაში. შიიტი მომლოცველები სხვადასხვა სახელმწიფოდან სიწმინდეების მოსალოცად სისტემატიურად ჩადიან სირიაში. ცოტა ხნის წინ მსგავსი ინციდენტი შეემთხვათ ლიბანელ მომლოცველებს, თუმცა ისინი სამ დღეში უვნებლად გაუშვეს. ამჯერად ირანის საელჩოს წარმომადგენელმა მომლოცველების გატაცებაში "შეიარაღებული ჯგუფები" დაადანაშაულა და ისიც თქვა, რომ მისთვის ცნობილია გატაცებულ თანამემამულეთა ადგილსამყოფელი. მალევე იგივე ვერსია წარმოადგინა ოფიციალურმა დამასკომაც. საქმე ის არის, რომ მომლოცველთა გატაცება არც სირიელ ამბოხებულებს უარუყვიათ. პანარაბულმა ტელეკომპანია "ალ-არაბიამ" ვიდეოჩანაწერიც აჩვენა გატაცებული ირანელებით. ამ ჩანაწერში ამბოხებულების წარმომადგენელი აცხადებს, რომ მომლოცველებს შორის ირანული სპეცსამსახურის "ისლამური რევოლუციის გუშაგთა კორპუსის" წარმომადგენლები არიან. შიიტური ირანი ღიად უჭერს მხარს მონათესავე ალავიტების რეჟიმს სირიაში და სუნიტ ამბოხებულებს, ეტყობა, მიაჩნიათ, რომ მომლოცველების საფარქვეშ ირანი სირიაში კონსულტანტებსა და ინსტრუქტორებს გზავნის.

სტატიის მისამართი: http://24saati.ge/index.php/category/news/world/2012-08-06/31076.html