ვან დერ სარმა კონტრაქტი გააგრძელა

“მანჩესტერ იუნაიტედის” მეკარემ ედვინ ვან დერ სარმა, რომელსაც კლუბთან კონტრაქტი მიმდინარე სეზონის ბოლოს უმთავრდებოდა, “ოლდ ტრაფორდზე” დარჩენა კიდევ ერთი წლით გადაწყვიტა.

24 საათი 01.03.10

“პროფესიონალიზმი და საქმისადმი სათანადო მიდგომა ვან დერ სარს ძველებურად მაღალ დონეზე თამაშის საშუალებას აძლევს”, - განაცხადა მანჩესტერელთა დამრიგებელმა ალექს ფერგიუსონმა. “თავს ადრინდელივით კარგად ვგრძნობ და ფეხბურთისგან სიამოვნებას ვიღებ. ეს დიადი კლუბია, რომლის მადლობელი ვარ ჩემთვის არცთუ კარგ პერიოდში მხარდაჭერისთვის. მასთან ერთად კიდევ რამდენიმე ტიტულის მოგებას ვაპირებ”, - თქვა ვან დერ სარმა, რომელმაც 2005 წლიდან დღემდე “მანჩესტერში” 207 მატჩი ჩაატარა. უკვე რამდენიმე წელია, შოტლანდიელი სპეციალისტი ეძებს ვან დერ სარის ღირსეულ შემცვლელს, თუმცა, სერ ალექსს არ უმართლებს. მან ვერა და ვერ იპოვა ნორმალური მეკარე თავისი გუნდისთვის. სწორედ ეს არის იმის მიზეზი, რომ ჰოლანდიელ მეკარეს ყოველწლიურად სთხოვენ კიდევ ერთი სეზონით კონტრაქტის გახანგრძლივებას. ისიც ცნობილია, რომ ედვინს კარიერის დასრულება სურს.

სტატიის მისამართი: http://24saati.ge/index.php/category/sport/2010-03-01/4018.html