ნიკოლაი ნერუში: “საქართველოს ნაკრებთან თამაში დიდი გამოცდაა”

შაბათს, ერთა თასის გათამაშების მორიგი ტურის მატჩების შემდეგ, გაირკვა იმ ორი გუნდის ვინაობა, რომლებიც პირდაპირ მოხვდებიან 2011 წლის მსოფლიო თასზე. საქართველოს ნაკრებთან ერთად ეს საპატიო უფლება რუსეთის გუნდმაც მოიპოვა.

24 საათი 01.03.10

რუსებმა მსოფლიო თასის საგზური დაიბევეს

რუსეთის ნაკრები რუმინელებს მასპინძლობდა და იმისთვის, რომ მსოფლიო თასის საგზური მოეპოვებინა, ნიკოლაი ნერუშის გუნდს ფრეც ყოფნიდა. მატჩი დაძაბული გამოდგა და ანგარიშით 21:21 დასრულდა. რუმინელებს ვერც შემადგენლობის გაძლიერებამ უშველა და ახლა ამ გუნდის მთავარი მიზანი ჯგუფში მესამე ადგილის დაკავებაა. რაც შეეხება რუსეთისა და საქართველოს ნაკრებ გუნდებს, მათ ერთა თასის მოგებისთვის უნდა იბრძოლონ. ყველაფერს 20 მარტს ტრაბზონში გასამართი მატჩი გაარკვევს.

რუსეთის ნაკრები მარცხისგან წინასწარ იზღვევს თავს. რუსული მედია და ნაკრების მთავარი მწვრთნელი ნიკოლაი ნერუში აღნიშნავენ, რომ მიზანი უკვე მიღწეულია და 20 მარტის მატჩიდან რუსი გულშემატკივარი განსაკუთრებულს არაფერს არ უნდა ელოდეს.

აი, რა განაცხადა ნერუშმა რუმინეთის ნაკრებთან ფრედ დასრულებული მატჩის შემდეგ: “ყველას ვულოცავ ამ ისტორიულ გამარჯვებას. ვიცოდით, რომ ჩვენთვის სწორედ ეს შეხვედრა იქნებოდა გადამწყვეტი. გასულ წელს რუმინეთის რაგბის ფედერაცია ჩვენთან თამაშს ზერელედ მიუდგა და მეორე შემადგენლობით შეგვხვდა. ჩვენ გავიმარჯვეთ. ახლა კი საუკეთესო რუმინელი მორაგბეები გვეწვივნენ. ბევრს ეგონა, რომ უშანსოდ ვიყავით, თუმცა, საწადელს მივაღწიეთ და, რუსული რაგბის ისტორიაში პირველად, მსოფლიო თასზე ვითამაშებთ.

ახლა გერმანიისა და საქართველოს ნაკრებ გუნდებთან გვაქვს მატჩები გასამართი. გერმანელებთან ნაკრების უახლოეს რეზერვს მივცემ თავის გამოჩენის საშუალებას. რაც შეეხება საქართველოს, თავიდანვე მინდა გაგაფრთხილოთ, რომ ამ მატჩისგან საოცრებებს არ უნდა ველოდეთ. საქართველოს ნაკრები ჩვენი პრინციპული მეტოქეა. რა ხანია, ამ გუნდის დამარცხება გვინდა, მაგრამ ვერ ვახერხებთ. ჩვენ არც ისე ხშირად გვიწევს ისეთი მაღალი დონის გუნდების წინააღმდეგ თამაში, როგორიც საქართველოს ნაკრებია. მსოფლიო თასზე სწორედ ამ და უფრო მაღალი დონის გუნდებთან მოგვიწევს დაპირისპირება. ვფიქრობ, საინტერესო მატჩი გველის”.

სტატიის მისამართი: http://24saati.ge/index.php/category/sport/2010-03-01/4021.html