შვეიცარია ბრიტანეთის გზას დაადგა

ბლატერს ძველი ცოდვები გაუხსენეს

ვასილ უდუმაშვილი

24 საათი 09.12.10

ფიფას საქმიანობით შვეიცარიის მთავრობა დაინტერესდა

ბლატერს ძველი ცოდვები გაუხსენეს

შვეიცარიის მთავრობა იმ სპორტული ორგანიზაციების საქმიანობის შემოწმებას აპირებს, რომელთა შტაბბინები შვეიცარიაში მდებარეობს. შვეიცარიულ სააგენტო ATS-ის ინფორმაციით, ქვეყნის მთავრობა ფიფას, უეფას და საერთაშორისო ოლიმპიური კომიტეტის საქმიანობას შეამოწმებს.

იქმნება შთაბეჭდილება, რომ ზემოხსენებული სამი ორგანიზაცია კანონზე მაღალა დგას. ფიფა, უეფა და სოკი არავის ექვემდებარებიან, ისინი საკუთარი კანონებით ცხოვრობენ, ფიფასა და უეფასთვის ევროკავშირის კანონებიც კი არაფერს ნიშნავს. ვის აქვს ამ სამეულის გაკონტროლების საშუალება, ძნელი სათქმელია. თუმცა, სამივე ორგანიზაციას შტაბბინა შვეიცარიაში აქვს და, წესით, შვეიცარიის კანონებს მაინც უნდა დაემორჩილონ.

ინგლისელი ჟურნალისტების მიერ ატეხილმა აჟიოტაჟმა, რომელიც ფიფაში არსებულ კორუფციას ეხება, შვეიცარიის პარლამენტის დეპუტატის რონალდ ბიუხელის ყურადღებაც მიიპყრო. შვეიცარიის სახალხო პარტიის წევრმა მიმართვა გაგზავნა შვეიცარიის მთავრობაში, რათა ამ სამი ორგანიზაციის საქმიანობა იქნას შესწავლილი. დეპუტატის მოთხოვნის განხილვის შემდეგ, შვეიცარიის აღმასრულებელი ხელისუფლების გადაწყვეტილებით, სამივე ორგანიზაციის საქმიანობის შესწავლა დაიწყება. შვეიცარიის მთავრობის განცხადებით, გაკეთდება ყველაფერი, რათა ქვეყნის ტერიტორიაზე უკანონო ქმედებები აილაგმოს.

ATS-ს ინფორმაციით, შეიქმნება სპეციალური კომისია, რომელიც ხსენებული სამი ორგანიზაციის შტაბბინების საქმიანობას შეისწავლის. ამის შემდეგ შვეიცარიის სპორტის ფედერალური სამსახური მოამზადებს სპეციალურ მოხსენებას, რომელშიც მითითებული იქნება ის მეთოდები, რითაც უნდა აღმოიფხვრას კანონდარღვევები.

ეს პირველი შემთხვევაა, როდესაც ამ სამი ორგანიზაციის საქმიანობით სამთავრობო დონეზე დაინტერესდნენ და ფიფას, უეფას და სოკის საქმიანობას რომელიმე ქვეყნის მთავრობა შეისწავლის. თუ აქამდე ფიფასა და უეფაში არსებულ კორუფციაზე მხოლოდ ჟურნალისტები საუბრობდნენ, ახლა ამ სკანდალური თემით შვეიცარიის მთავრობაც დაინტერესდა.

სავარაუდოდ, შვეიცარიის მთავრობა ევრო 2012-ის მასპინძლის არჩევის პროცესითაც დაინტერესდება. კვიპროსელი საფეხბურთო ჩინოვნიკი სპირანს მარანგოსი კარგა ხანია ამტიკიცებს, რომ მას აქვს უეფას მაღალი რანგის ჩინოვნიკების კორუმპირებულობის მამხილებელი საბუთები. კერძოდ, ის ამბობს, რომ 2012 წლის ევროპის ჩემპიონატი გაიყიდა და ამის დამადასტურებელი საბუთები მას ხელთ აქვს.

"კვიპროსზე 3.15 მილიონი დოლარი ქრთამი დიდ ტომარაში იყო მოთავსებული და ისე გადასცეს ერთ პიროვნებას. მე ამის დამადასტურებელი სამი დოკუმენტი მაქვს", - აცხადებს მარანგოსი.

თუ კვიპროსელი ჩინოვნიკის ბრალდება ჯერ არაფრით არ არის დასაბუთებული, ფიფას აღმასკომის წევრები ამოს ადამუ და რეინოლდ ტემერი ქრთამის აღების მცდელობაში ბრიტანელმა ჟურნალისტებმა ამხილეს და, წესით, შვეიცარიის მთავრობა ამ საქმითაც უნდა დაინტერესდეს.

ფიფაში არსებულ მექრთამეობაზე ბევრს საუბრობენ, მაგრამ ჯერჯერობით ამ ორგანიზაციაში რადიკალურ ცვლილებებს მაინც არ უნდა ველოდეთ, რადგან, როგორც ვთქვით, კორუფციაზე მხოლოდ ჟურნალისტები ამახვილებენ ყურადღებას. შესაძლოა, შვეიცარიის მთავრობამ თავისი გამოძიებით რაიმე უფრო კონკრეტულ შედეგსაც მიაღწიოს.

როდესაც საუბარია ფიფასა და უეფას საქმიანობის გამოძიებაზე, ყველაფერი ნათელია. ცოტა გასაკვირია შვეიცარიის ხელისუფლების დაინტერესება საერთაშორისო ოლიმპიური კომიტეტის საქმიანობით. ამ ორგანიზაციაში ჟაკ როგის მისვლის შემდეგ ბევრი რამ შეიცვალა. ყველაფერი კი 2002 წლის ზამთრის ოლიმპიური თამაშებით დაიწყო, როდესაც ოლიმპიური კომიტეტის წევრები ქრთამის აღებაში ამხილეს. მექრთამე ჩინოსნებს მაშინვე დაატოვებინეს საერთაშორისო ოლიმპიური კომიტეტი და სოკში დიდი წმენდა დაიწყო. 2004 წელს კი, საერთაშორისო ოლიმპიური კომიტეტის ეთიკის კომისიის ინიციატივით, სოკის ვიცე-პრეზიდენტის კიმ იუნ ენის საქმიანობის გამოძიება დაიწყო. აღსანიშნავია, რომ უცხოურ მედიაში ჟაკ როგის შესახებ არავითარი სკანდალური ინფორმაცია არ გავრცელებულა და ესეც მრავლისმეტყველია. ასე რომ, სოკის საქმიანობით დაინტერესება, ცოტა არ იყოს, უცნაურია, თუმცა, მეორე მხრივ, თუ შვეიცარიის მთავრობა ფიფასა და უეფას საქმიანობის გამოძიებას აპირებს, ამ ქვეყნის ტერიტორიაზე არსებული მესამე სოლიდური სპორტული ორგანიზაციის საქმიანობაც უნდა შეისწავლოს.

თუ შვეიცარიამ ფიფას სამთავრობო დონეზე შეუტია, ამერიკელებმა შეტევა პირადად ზეპ ბლატერზე მიიტანეს, ოღონდ ამ შემთხვევაშიც, ისევე როგორც ბრიტანულ ვარიანტში, საქმე მხოლოდ ჟურნალისტურ გამოძიებებს და ბრალდებებს ეხება.

ამერიკელებმა, რომლებიც ფიფას გადაწყვეტილებით ასევე უკმაყოფილონი არიან (შეგახსენებთ, აშშ 2022 წლის მუნდიალის ფინალური ეტაპის მასპინძლობის მთავარ ფავორიტად ითვლებოდა, ფიფამ კი არჩევანი შეაჩერა ყატარზე, სადაც ზაფხულში ჰაერის ტემპერატურა 45-50 გრადუსამდე ადის), ბლატერს ძველი ცოდვები გაუხსენეს.

ცნობილმა ამერიკელმა ჟურნალისტმა ჯეიმი ენტონიმ მოიძია ფოტომასალა, რომელზეც ახალგაზრდა იოზეფ ბლატერი, საბჭოთა კავშირის კალათბურთის ფედერაციის ჩინოვნიკებთან ერთად, მიუნხენის ერთ-ერთ რესტორანშია.

1972 წლის ზაფხულის ოლიმპიადაზე ვაჟ კალათბურთელთა ფინალში ბლატერი დროს აკონტროლებდა. დაგ კოლინზმა ორი ზუსტი საჯარიმოთი ამერიკელები 50:49 დააწინაურა. მერე დრო წავიდა, გაჩერდა, სსრკ-ს ნაკრებმა წუთშესვენება მოითხოვა და ქაოსი იმით დასრულდა, რომ ოლიმპიური ჩემპიონის ტიტული საბჭოთა კავშირის ნაკრებმა მოიპოვა. ბოლო წამზე ივან ედეშკოს პასით ალექსანდრ ბელოვმა ჩააგდო ბურთი და მატჩი დამთავრდა 51:50.

FIBA-ს გენერალური მდივანი არ.უილიამ ჯოუნსი და ბლატერი წინა დღეს შეხვდნენ რუსებს სასტუმროში. ცხადია, ძალიან ძნელია ბოლო წამებზე ამ სპექტაკლის დადგმა, მაგრამ ჯეიმი ენტონი ამტკიცებს, რომ ბლატერი "ზედმეტად აჟიტირებული" იყო, როდესაც ბელოვმა ბოლო წამზე სამწამიანიდან ჩააგდო.

ამერიკელების ბრალდებას ბლატერის გუნდმა არ უპასუხა, მაგრამ მისმა მეგობარმა, ვინმე რუდი კელერმა აღნიშნა, მეცინება, როდესაც უსაქმური და დილეტანტი საზოგადოება ასეთ ფაქტებზე ამახვილებს ყურადღებასო.

ახლა ძნელია იმის პროგნოზირება, თუ როგორ დასრულდება ყველაფერი, თუმცა, ერთი რამ აშკარაა: თუ აქამდე ფიფაში არსებულ კორუფიცაზე მხოლოდ ინგლისელები საუბრობდნენ, ახლა ვითარება შეიცვალა - ფიფას რამდენიმე მიმართულებით უტევენ.

სტატიის მისამართი: http://24saati.ge/index.php/category/sport/2010-12-09/12254.html