1998 წლის მუნდიალზე რონალდო, შესაძლოა, მომკვდარიყო
სენსაციურ ინფორმაციას ავრცელებს ფრანგული გამოცემა L'Equipe-ი, რომლის მტკიცებით, 1998 წლის მუნდიალის ფინალური მატჩისას რონალდო, შესაძლოა, მომკვდარიყო.
24 საათი 04.02.12
1998 წლის მუნდიალის ფინალის შემდეგ
სენსაციურ ინფორმაციას ავრცელებს ფრანგული გამოცემა L'Equipe-ი, რომლის მტკიცებით, 1998 წლის მუნდიალის ფინალური მატჩისას რონალდო, შესაძლოა, მომკვდარიყო.
ერთ-ერთმა ყველაზე გავლენიანმა ფრანგულმა სპორტულმა გამოცემამ თავის ახალ ნომერში ცნობილი იტალიელი ექიმ-კარდიოლოგის, ბრუნო ჩარუს კომენტარი გამოაქვეყნა. როგორც ირკვევა, მას საფუძვლიანად შეუსწავლია 1998 წლის მსოფლიო ჩემპიონატის ფინალური მატჩის წინ განვითარებული მოვლენები.
ცნობილია, რომ საფრანგეთ-ბრაზილიის მატჩის წინ რონალდომ ექიმებს მიმართა და ფეხბურთელს ეპილეფსიური შეტევის დიაგნოზი დაუსვეს. იმხანად "ელ ფენომენოს" გვერდით იყო ექიმი ვოლპი, რომელიც მილანის "ინტერში" მუშაობდა. სწორედ მისი დახმარებით აღადიგნეს ექიმებმა იმ დღეს განვითარებული მოვლენების სრული სურათი.
"რონალდო იწვა და ტელევიზორში ფორმულა 1-ის რეპორტაჟს უყურებდა. უცებ წამოდგა, თავი დახარა და დაეცა. მასთან ერთად ოთახში იყო რობერტო კარლოსი. სწორედ მან იფიქრა, რომ ეს ეპილეფსიური შეტევაა. რონალდო მაშინვე კლინიკაში გადაიყვანეს. საავადმყოფოში მისვლისას გულისცემა წუთში 18 დარტყმა იყო. ეს იმას ნიშნავს, რომ მანამდე გული გარკვეული პერიოდით გაჩერდა კიდეც. ფრანგი ექიმები კი რობერტო კარლოსის სიტყვას ენდნენ და ჩათვალეს, რომ ეს მართლაც ეპილეფსიური შეტევაა. რონალდოს მისცეს ძალიან ძლიერი პრეპარატი, რომელიც ეპილეფსიის დროს ინიშნება, მაგრამ ცუდად მოქმედებს გულზე. ამ პრეპარატს გარდენალი ჰქვია. ერთ-ერთი ვერსიით, სწორედ ამ წამლით მოიკლა თავი მერილინ მონრომ. ეს წამალი ადამიანის აზროვნებასაც ამუხრუჭებს. სწორედ ეს არის იმის მიზეზი, რომ ფინალში რონალდომ სუსტად ითამაშა," - ასეთ დასკვნას აკეთებს იტალიელ კარდიოლოგთა კავშირის ხელმძღვანელი ბრუნო ჩარუ. ყველა დოკუმენტის შესწავლის შემდეგ იტალიელი კარდიოლოგი დაასკვნის, რომ მინდორზე გასვლით რონალდოს სიცოცხლეს საფრთხე ემუქრებოდა. მაშინ მას გულის შეტევა ჰქონდა. წამალი, რომელიც მისცეს, იმდენად ძლიერი იყო, რომ ფეხბურთელის მოკვლაც შეეძლო.