პრინცი ჰარი უსეინ ბოლტს სარბენ ბილიკზე იწვევს

ბრიტანეთის პრინცი ჰარი სამგზის ოლიმპიურ და მსოფლიოს ხუთგზის ჩემპიონს, იამაიკელ უსეინ ბოლტთან შეხვედრას მოუთმენლად ელის.

24 საათი 04.02.12

უსეინ ბოლტთან შესახვედრად პრინცი ჰარი ემზადება

ბრიტანეთის სამეფო კარის რიგით მესამე მემკვიდრე ტიტულოვან მძლეოსანს მარტში, იამაიკაზე სტუმრობისას უნდა შეხვდეს.

ბრიტანელ ჟურნალისტებთან საუბარში მისი აღმატებულების პირად მდივანს განუმარტავს, რომ პრინცი ჰარი, როგორც დიდი ბრიტანეთის ნაკრების ოლიმპიური ელჩი, კინგსტონში იმ სპორტული ბაზის მონახულებას აპირებს, რომელშიც სამგზის ოლიმპიური ჩემპიონი ვარჯიშობს. უსეინ ბოლტს ლონდონის ოლიმპიურ თამაშებზე პეკინში მოპოვებული ტიტულების დაცვა განუზრახავს (პეკინის სარბენ ბილიკებზე იამაიკელმა 100, 200 და 4X100 ესტაფეტაში მოიპოვა ოქროს მედლები. სამივე დისციპლინაში ის მსოფლიოს რეკორდების მფლობელიცაა).

პლანეტის უსწრაფესი ადამიანი პრინცს ერთგვარ მასტერკლასს ჩაუტარებს - აუხსნის, თუ როგორი მდგომარეობიდანაა უმჯობესი სპრინტში სტარტის აღება და ბონუსად ოსტატობის რამდენიმე საიდუმლოსაც გაუმხელს. მართალია, პრინცი ჰარი უსეინ ბოლტის დიდი გულშემატკივარია, მაგრამ აფასებს თავის შესაძლებლობებსაც და ბოლტთან გაჯიბრებას არ აპირებს. თუმცა, არ არის გამორიცხული, რომ ტიტულოვან იამაიკელთან საჩვენებელ გარბენში მიიღოს მონაწილეობა. უთქვამს, ესეც მხოლოდ იმ შემთხვევაში, თუ ბოლტის სავარჯიშო გრაფიკს არ დავარღვევო.

მისი უდიდებულესობა კარიბის ზღვის აუზის ქვეყნებს - იამაიკას, ბაჰამის კუნძულებს და ბელიზს ეწვევა 2-8 მარტს - ელისაბედ მეორის ტახტზე ასვლის 60 წლის იუბილესადმი მიძღვნილი ღონისძიებების ფარგლებში.

იამაიკაზე, ბაჰამის კუნძულებსა და ბელიზში მოგზაურობის შემდეგ 27 წლის პრინცი ჰარი ბრაზილიაში გაემგზავრება და პოლოს საქველმოქმედო თამაშობაში მიიღებს მონაწილეობას. როგორც ამბობენ, რიო დე ჟანეიროს სანაპიროზე საპლაჟო სპორტის სახეობებში თავისი შესაძლებლობის მოსინჯვაზეც არ იტყვის უარს. ესეც ბებიის "ბრილიანტის იუბილესთან" იქნება დაკავშირებული.

პრინ­ცი ჰა­რი უსე­ინ ბოლტს სარ­ბენ ბი­ლიკ­ზე იწ­ვევს

პრინცი ჰარი უსეინ ბოლტს სარბენ ბილიკზე იწვევს