ფეხბურთის ჯაგერები

ზურაბ თალაკვაძე

ზურა თალაკვაძე

24 საათი 26.04.12

კრიშტიანო რონალდუ

ზურაბ თალაკვაძე

როკი როლინგებია. როლინგები ჯაგერია. დღეს ფეხბურთის, ჩვენი გენერაციის ჯაგერებზე ვთქვათ სათქმელი.

მანუელ ნოიერი (ბაიერნი)

ჯანლუიჯი ბუფონი ყველაზე სექსუალურ "სეივებს" აკეთებს, იტალიურად ცელქობს კარის ხაზზე, ლამაზი აბადოკი" უკეთია და ალექს დელ პიეროს უკანალზე რბილად უთათუნებს ხელს. ჯიჯი ფეხბურთის პიკასოა, მაგრამ, ერთფეროვნების თავიდან აცილების მიზნით, მეკარეებიდან ჰერ ნოიერი ავიყვანოთ.

შალკედან" ბაიერნში" გადასვლა რთული თემაა. იქ სხვა დონეზე სხვა გარჩევები მიდიოდა და მიუნხენში სხვა დონეა. ნოიერი გრძნობს, სად და რა ტრაექტორიით წამოვა ბურთი, ზედმეტ მოძრაობას ერიდება, ენერგიას გერმანულად ანაწილებს.

ნოიერმა ოლივერ კანის რეკორდი გადატეხა. აგვისტოდან, ამ სეზონის პირველი ბუნდესგარჩევიდან 23 ოქტომბრამდე, ნოიერმა 10 ტესტში გოლი არ გაუშვა. სერიოზული სერიაა. ნოიერისთვის, ბუფონისთვის, დინო ძოფისთვის - ყველასთვის სერიოზული სერიაა.

უეინ რუნი (მანჩესტერ იუნაიტედი)

უეინ რუნი ბორდელებში არ დარბის და რამდენიმე ათას ევროს არასრულწლოვან, ფასიან გოგონებში არ იხდის. რუნი კანონმორჩილი მოქალაქე და წესიერი ბიჭი გახდა. ძირითადად, ოჯახში რჩება, უყურებს როჯერ მურის კლასიკას და ფროდიჯიზე" არ ზის. მისტერ რუნი გამოსწორდა.

ადრე რუნი გოლებს და გაფრთხილებებს აგროვებდა. დღეს უფრო გოლების კოლექციონერია. ოქტომბერში, ინგლისისა და მონტენეგროს მატჩის დროს, რუნის წითელი ბარათი მიარტყეს. ცუდი ჟესტი იყო. იმ გარჩევაში რუნიც ცუდი იყო.

იმ ამბების შემდეგ, უეინი მშვიდი პერსონაჟია. პრემიერ ლიგის სრულ სეზონში რუნის მხოლოდ ერთი ყვითელი ბარათი აქვს - პირადი რეკორდი, სერ.

უეინი სერ ალექს ფერგიუსონის ჯოკერია. რუნი ამ გენერაციის გარი ლინეკერია. თითქმის იმ დონეზეა.

რობინ ვან პერსი (არსენალი)

ჰოლანდიელმა აკრიფა, ვან პერსი გაიშალა. პრემიერ ლიგაში პირველი 25 გოლი 17 გუნდზე გადაანაწილა, სტაბილურად სტაბილური და აგრესიული იყო. ვან პერსი არსენალში" თავის არსენალს ბოლომდე იყენებს, არსენ ვენგერი ვალოკორდინის დიეტიდან ჩამოსვა.

არსენალის" პრობლემებს ვან პერსი და სენიორ ვენგერი აგვარებენ.

ანდრეი არშავინი უმოტივაციო, ჩიფსების რუსი ბიჭი იყო და არშავინი უკვე წარსულია. ვან პერსი მომავალია.

რობინ ვან პერსი არსენალში" თითქმის სესკ ფაბრეგასია (მნიშვნელობის თვალსაზრისით). ჰოლანდიელი მარკო ვან ბასტენის ელეგანტური სირბილის და რუუდ ვან ნისტელროის აგრესიის საინტერესო მიქსტია. ვენგერი ვან პერსისთან ერთად ისვენებს.

ხავი (ბარსელონა)

ესპანეთი ფეხბურთის ნეოკლასიკოსით, ყველაზე თამამი იმპროვიზატორით ქაჩავს. ხავი ხატავს, დროდადრო ისვენებს, ხერესის უმნიშვნელო დოზას იღებს და ისევ ხატავს. ხავიმ მოსაგები მოიგო. ხავი სხვის მოსაგებს იგებს. ხავი სხვის მოსაგებს კიდევ მოიგებს. სხვა ვარიანტი არ რჩება.

ამ სეზონში 12 გოლი და 10 საგოლე ასისტი აკრიფა.

ხავი გრძნობს, რას იგრძნობს ბარსელონას" ის არანორმალური არგენტინელი და ბარსელონა" არ იღლება.

გვარდიოლას ვუდსტოკზე ხავი პირველი სოლოისტია. ზინედინ ზიდანის შემდეგ, ნუმერო უნო ფლეიმეიქერებში და ყველაზე გემოვნებიანი ინდივიდუალისტი, რომელიც გუნდურად აზროვნებს.

სერიოზული ტიპია.

კრიშტიანო რონალდუ (რეალი)

პორტუგალია ფეხბურთში გახუნებული ბრაზილია, მეორე ეშელონის ფავორიტია. კოლუნას, ეუსებიოს, ტორესის, შალანას, ორპირი (და მხეცი, უმაგრესი) ლუიშის, ლამაზი ნუნუ გომეშის და მოროდმანო აბელ შავიერის ნაკრები ბოლომდე ვერ მიდის, სადღაც ვიღაცასთან დგება და პორტუგალია დიდი ბიჭების ფესტივალზე ზედმეტია.

კრიშტიანო საქმეს მაინც აკეთებს. რეალში" უფრო უკომპლექსო სიტუაციაა, ვიდრე პორტუგალიის ნაკრებში და რონალდუ ბევრს ასწრებს.

სტანდარტულებიდან ბიჭი სტანდარტულად ლეტალურია. რონალდუმ რეალს" ბევრი ჯეკპოტი დაუტოვა. კრიშტიანო კრუპიეს არ ამჩნევს და ყველა შემთხვევაში მოგებულია. ხდება ხოლმე. ადრე, რეალმა" ბიჭი მანჩესტერ იუნაიტედიდან" 80 მილიონ გირვანქა სტერლინგად დაითრია.

კრიშტიანო რონალდუმ ჩელიაბინსკიდან შეიკიც დაითრია და პერიზ ჰილტონს სამახსოვროდ პორტუგალიური კოცნა დაუტოვა. ყველაფერს ასწრებს. ფეხბურთს ცოტა პიჟონურად, მაგრამ სერიოზულად თამაშობს.

ლეო მესი (ბარსელონა)

პელე შურიანი მოხუცია. არ მოსწონს დიეგო, არ მოსწონს ის, რაც უნდა მოსწონდეს და ამ დღეებში წაიჭორავა, პირველი ნეიმარია და მერე სხვები მოდიანო. ასაკობრივია. ხდება ხოლმე.

პელემ - ლეო მესი ჯერ პატარაა და ჩემამდე რომ მოვიდეს, 1 000 გოლი გაიფორმოს და მერე ვილაპარაკოთო. მესის რიოს უბნების ჩემპიონატებში გატანილ გოლებს არ უთვლიან, მაგრამ ათასამდე მაინც მივა.

ლეო საკუთარ რეკორდებს ამტვრევს, მოტივაციის დეფიციტი არა აქვს და პირველია.

პელე რიოს უბნებში იღლებოდა, მესი ფეხბურთის ქუჩაზე სეირნობს.

პირველია.

სტატიის მისამართი: http://24saati.ge/index.php/category/sport/2012-04-26/28009.html