ასათიანი დაბრუნებას არ გეგმავს

უკანასკნელი ათწლეულის ერთ-ერთი საუკეთესო ფეხბურთელი მალხაზ ასათიანი კარგა ხანია ჩრდილშია მოქცეული.

24 საათი 01.05.12

"ასკა" დაბრუნებას არ აპირებს

"ასკა" პრაქტიკულად ფეხბურთიდანაა წასული. მოგეხსენებათ, ქართველმა მცველმა კარიერის საუკეთესო წლები მოსკოვის "ლოკომოტივში" გაატარა, სწორედ რუსულ გამოცემა "სოვეტსკი სპორტის" ჟურნალისტმა მიაგნო "ასკას" ქუთაისში.

"ერთი წლის განმავლობაში პირველ ინტერვიუს ვიძლევი", - უთხრა მალხაზმა რუს ჟურნალისტს.

- რას საქმიანობთ, თქვენს შესახებ თითქმის არაფერი ისმის?

- არაფერს არ ვაკეთებ. თავისუფლება, ურთიერთობა, დასვენება. მშობლიური სახლი, ლამაზი ბუნება. იმდენად ხშირი ურთიერთობა მაქვს ახლობლებთან, რომ ნელ-ნელა რუსულიც მავიწყდება. ახლა კი ქუთაისში განსაკუთრებულად კარგი პერიოდია. ბრწყინვალე საგაზაფხულო ამინდი. მოკლედ, ვსეირნობ და ვისვენებ. მომავალზე ფიქრით ვცდილობ თავი არ შევიწუხო.

- თქვენი ოჯახური მდგომარეობა ხომ არ შეცვლილა?

- არა კვლავაც დასაოჯახებელი ვარ.

- ასეთი შესაშური სასიძო და უცოლოდ?

- ყველაფერი სტატისტიკის ბრალია. სტატისტიკით ვიღაცა აუცილებლად უნდა იყოს უცოლო.

- სპორტული ფორმის შენაჩრუნებას თუ ცდილობთ?

- პერიოდულად ვთამაშობ ხოლმე ფეხბურთს.

- ალბათ, ზედმეტი წონაც აკრიფეთ არა?

- იცით გასაოცარი რამ მოხდა. ამ ერთი წლის განმავლობაში წონაში საგრძნობლად მოვიკელი. როდესაც ვთამაშობდი წონის პრობლემა მუდმივად მქონდა, ახლა კი დავიკელი.

- თქვენი აზრით, რატომ ხდება ასე?

- ალბათ, ყველაფერზე პროდუქტების ხარისხმა იმოქმედა. აქ ქუთაისში ეკოლოგიურად სუფთა პროდუქტებს ვხმარობ, რომლებიც სხვადასხვა ქიმიურ დამატებებს არ შეიცავს.

- მზად ხართ იმისთვის, რომ კარიერის დასრულების თაობაზე საჯარო განცხადება გააკეთოთ?

- ამისთვის ვემზადები. ალბათობა იმისა, რომ კარიერას დავასრულებ ძალიან დიდია. დაახლოებით 90-95 პროცენტი. თუმცა, რომ განვაახლო კარიერა ეს ტოპ დონე უკვე ვეღარ იქნება. აგერ უკვე წელიწადია უთამაშებელი ვარ და უწინდელი ფორმის დაბრუნება საოცრად რთული იქნება.

- რა უნდა მოხდეს, რომ ფეხბურთში დაბრუნდეთ?

- ჩემით ამბიციური კლუბი უნდა დაინტერესდეს. რათა თავად მეც დავინტერესდე დაბრუნებით, ახლა მინდორზე გასვლის სურვილიც კი არ მაქვს.

- "ლოკომოტივიდან" წასვლის შემდეგ, რატომ ვერ ნახეთ გუნდი?

- მინდა ხაზგასმით აღვნიშნო, რომ "ლოკომოტივიდან" კარგად წავედი. ეს მოხდა 2010 წლის ბოლოს, როდესაც კლუბთან კონტრაქტის ვადა ამოიწურა. იმედი მქონდა, რომ შეთავაზებას რომელიმე ამბიციური რუსული კლუბიდან მივიღებდი, უცხოურ კლუბებს და რუსეთის პირველი ლიგის კლუბებს უარი ვუთხარი. შესაძლოა ეს არასწორიც იყო. ველოდე, ველოდე შეთავაზება კი არ მოვიდა.

- საქართველოს ჩემპიონატში დაბრუნებაზე არ გიფიქრიათ?

- ფეხბურთელებს ერთი ლამაზი ტრადიცია აქვთ - კარიერას სამშობლოში ასრულებენ. მე საქართველოში სათამაშოდ მზად არ ვარ. ასეთი სურვილი არ გამაჩნია. ადგილობრივ კლუბებს ჩემდამი ინტერესი ჰქონდათ, თუმცა ქართულ კლუბებს საკმაო პრობლემები აქვთ, მათ შორის ფინანსურიც.

- მიგაჩნიათ თუ არა, რომ ქართული ფეხბურთი წინ მიდის?

- დიახ ასეა. ნაკრები პროგრესირებს. ხორვატიისა და შოტლანდიის დამარცხება შეგვიძლია. თუმცა ეს მაინც ეპიზოდური წარმატებებია. ნაკრებს სტაბილურობა აკლია. სამაგიეროდ, გამოჩნდა საკმაოდ პერსპექტიული თაობა. თუნდაც ჯანო ანანიძე. თუმცა ჯანოც ისევე, როგორც საქართველოს ნაკრები არასტაბილურად თამაშობს.

სტატიის მისამართი: http://24saati.ge/index.php/category/sport/2012-05-01/28159.html