ბრიტანულ მედიაში გავრცელებული ინფორმაციის თანახმად, დევიდ ბექჰემი ლონდონის 2012 წლის ოლიმპიურ თამაშებში მონაწილეობას ვერ მიიღებს.
24 საათი 30.06.12

ბრიტანულ მედიაში გავრცელებული ინფორმაციის თანახმად, დევიდ ბექჰემი ლონდონის 2012 წლის ოლიმპიურ თამაშებში მონაწილეობას ვერ მიიღებს.
ბრიტანეთის საფეხბურთო ნაკრების მთავარმა მწვრთნელმა დევიდი ნაკრების 18-კაციან განაცხადში არ შეიყვანა. მართალია, პირსს ოფიციალურად ბრიტანეთის ნაკრების შემადგენლობა არ დაუსახელებია, მაგრამ ბრიტანული მედიისთვის ცნობილია, რომ პირსი ბექჰემს ოლიმპიადის მიღმა დატოვებს.
"როგორც რიგითი ლონდონელი, მოუთმენლად ველი ოლიმპიური თამაშების დაწყებას. ბედნიერი ვარ, რომ მცირე წვლილი მაინც შემაქვს ამ ოლიმპიურ თამაშებში. ოლიმპიურ საფეხბურთო ტურნირში მონაწილეობა ჩემი ოცნება იყო, მაგრამ, როგორც ჩანს, ოლიმპიადაზე მხოლოდ მაყურებლის როლში ვიქნები", - განაცხადა ბექჰემმა.
ოლიმპიურ საფეხბურთო ტურნირზე 23 წლამდე ასაკის ფეხბურთელები თამაშობენ და ყველა ნაკრებს სამი ასაკოვანი ფეხბურთელის დამატება შეუძლია. 37 წლის ბექჰემი სტიუარტ პირსის გაფართოებულ შემადგენლობაში იყო, მაგრამ ბრიტანეთის ნაკრების მთავარმა მწვრთნელმა საბოლოოდ სხვა სამი ასაკოვანი ფეხბურთელი არჩია. კერძოდ, ბრიტანეთის ნაკრებში ითამაშებენ 38 წლის რაიან გიგზი ("მანჩესტერი"), 32 წლის კრეიგ ბელამი ("ლივერპული") და 24 წლის მიკა რიჩარდსი ("სიტი").
ძნელია იმის თქმა, თუ რატომ დაიწუნა სტიუარტ პირსმა ბექჰემი. როგორც ამბობენ, ვეტერანი ფეხბურთელი მხოლოდ იმიტომ აგრძელებდა კარიერას, რომ ნაკრებში ეთამაშა. ამ მხრივ ბექსს ნამდვილად არ უმართლებს. შეგახსენებთ, რომ მას 2010 წლის მუნდიალზე მოხვედრის რეალური შანსი ჰქონდა. ამის გამო დევიდმა დასვენებაზე უარი თქვა და ამერიკული სეზონის დასრულების შემდეგ იტალიურ "მილანში" გადავიდა სათამაშოდ, მაგრამ სწორედ მილანურ კლუბში მიიღო ტრავმა და მსოფლიო ჩემპიონატს მიღმა დარჩა. მაშინ ბევრმა ჩათვალა, რომ ბექჰემი კარიერასაც დაასრულებდა, მაგრამ დევიდმა ტრავმა მოიშუშა და "გელექსიში" თამაში გააგრძელა. დევიდის მიზანი 2012 წლის ლონდონის ოლიმპიური თამაშები იყო, მაგრამ მას არც ამჯერად გაუმართლა".