ყველაფერი წინასწარ იყო გათვლილი და განსაზღვრული.
24 საათი 09.07.12

ყველაფერი წინასწარ იყო გათვლილი და განსაზღვრული.
ბუკმეკერებმა ვლადიმირ კლიჩკოს ტონი ტომპსონზე გამარჯვებისთვის სიმბოლური ფსონი - 1.06 გაიღეს, ტიტულის მოცილე ამერიკელის შესაძლო წარმატებისთვის კი - 8.5. ფაქტობრივად იმთავითვე დასამარცხებლად განწირულმა ტონიმ საბუკმეკერო კანტორები არ დააღალატა - კრივის მსოფლიო ორგანიზაციის (WBO), ასოციაციის (WBA), საერთაშორისო ფედერაციისა (IBF) და საერთაშორისო ორგანიზაციის (IBO) უკრაინელ ჩემპიონს ბერნის Stade de Suisse არენაზე ექვს რაუნდში დანებდა.
ორთაბრძოლისთვის მზადება ბევრად უფრო სანახაობრივი გამოდგა, ვიდრე თავად მატჩი.
ვლადიმირ კლიჩკომ ტრადიციულად აღნიშნა მეტოქის ძალა და იქვე იწინასწარმეტყველა, ადვილი ბრძოლა არ იქნებაო. ვლადიმირის ძმამ, კრივის მსოფლიო საბჭოს ჩემპიონმა ვიტალიმ კი "ფეისბუქზე" დაწერა, დიდი ბრძოლა იქნებაო. ძმები კლიჩკოების ვარაუდი არ გამართლდა. პირველივე რაუნდში გამოიკვეთა ვლადიმირის უდავო უპირატესობა. მან ამერიკელს არავითარი შანსი არ მისცა. მხოლოდ ის იყო გასარკვევი, რომელ რაუნდში გაუსწორდებოდა 36 წლის უკრაინელი 40 წლის ამერიკელს.
პირველი ოთხი რაუნდი დასამახსოვრებელი ეპიზოდებით არ გამოირჩეოდა. სიტუაცია მეხუთე რაუნდის დასრულებამდე წუთ-ნახევრით ადრე დაიძაბა, როდესაც უკრაინელმა ჩემპიონმა ტიტულის მოცილე ამერიკელი ბაგირებთან მიამწყვდია და მარჯვენა ძლიერი დარტყმით მძიმე ნოკდაუნში ჩააგდო. მართალია, ტომპსონი წამოდგა და რაუნდი დაასრულა, მაგრამ იგივე მდგომარეობაში აღმოჩნდა მეექვსე რაუნდის მიწურულსაც - უკრაინელის მუშტებთან უძლური ტონი ტომპსონი რინგზე დაეცა. ახლაც, ისევე როგორც პირველ შემთხვევაში, წამოდგომა შეძლო, მაგრამ რეფერიმ ბრძოლის შეწყვეტა ითხოვა. ვლადიმირ კლიჩკომ (58 მოგება, აქედან 51 ნოკაუტით და 3 წაგება) ტონი ტომპსონზე მეექვსე რაუნდში ტექნიკური ნოკაუტით გაიმარჯვა.
კლიჩკოსა და ტომპსონის (36 მოგება, აქედან 24 ნოკაუტით და 3 წაგება) გზები პირველად ოთხი წლის წინათ გადაიკვეთა. მაშინ უკრაინელმა ამერიკელი მეთერთმეტე რაუნდში ჩააგდო ნოკაუტში.