ფელპსის 22 მედალი

ლონდონის ოლიმპიურ თამაშებზე ასპარეზობა დაასრულა სიცოცხლეშივე ლეგენდად ქცეულმა მოცურავემ მაიკლ ფელპსმა.

24 საათი 06.08.12

ლეგენდარული მაიკლ ფელპსი

ათენსა და პეკინში მოგებულ 14 ოქროს მაიკლმა ლონდონში კიდევ ოთხი დაუმატა. მან ყველა შესაძლო რეკორდი მოხსნა. ოლიმპიური თამაშების ისტორიაში ის ყველაზე ტიტულოვანი სპორტსმენია. საერთო ჯამში ფელპსს 22 მედალი აქვს მოგებული, აქედან 18 ოქრო, 2-2 ვერცხლი და ბრინჯაო. საეჭვოა, რომ უახლოეს მომავალში ასეთი შედეგი ვინმემ აჩვენოს.

გავიხსენოთ მაიკლ ფელპსის კარიერის მნიშვნელოვანი ეპიზოდები და მის მიერ მოგებული ყველა მედალი.

2000 წელი, სიდნეის ოლიმპიური თამაშები, ლეგენდის დაბადება

სიდნეის ოლიმპიურ თამაშებზე ფელპსს მედალი არ მოუგია. მან მხოლოდ ერთ დისტანციაზე სცადა ბედი. 15 წლის ფელპსმა 200 მეტრზე ბატერფლაით ცურვაში მეხუთე ადგილი დაიკავა.

პირველი ოქრო - 2004 წელი. 400 მეტრზე კომპლექსური ცურვა

სანამ პირველ ოქროს მოიგებდა, მან ამ დისციპლინაში ოთხჯერ აჩვენა საუკეთესო დრო. მომავალში კი ფელპსი მხოლოდ საკუთარ რეკორდებს ამხობდა.

იან კროკერის დამარცხება - 2004 წელი

2004 წლის ოლიმპიურ თამაშებს იან კროკერი მსოფლიო რეკორდსმენის რანგში შეხვდა. სწორედ მას ეკუთვნოდა მსოფლიო რეკორდი 100 მეტრზე ბატერფლაით ცურვაში და ოლიმპიური თამაშების მთავარ ფავორიტადაც ითვლებოდა. კროკერი ცურვის ისტორიაში პირველი სპორტსმენია, რომელმაც ბატერფლაით 100-მეტრიანი დისტანცია 51 წამზე სწრაფად გაცურა. კროკერის რეკორდი 50.76 იყო. მაიკლ ფელპსმა ეს რეკორდი 4 მეათედი წამით გააუმჯობესა. 2009 წლის პირველ აგვისტოს მაიკლმა ერთი შეხედვით შეუძლებელი შეძლო - ბატერფლაით ასი მეტრი 50 წამზე უფრო სწრაფად გაცურა (49.82)

ლეჟაკის დახმარება

2008 წლის ოლიმპიური თამაშები სამუდამოდ შევიდა ისტორიაში. მაიკლ ფელპსმა პეკინის ოლიმპიადაზე რვა ოქრო მოიგო. გაიმარჯვა ყველა იმ დისციპლინაში, რომელშიც მონაწილეობდა. ეს წარმოუდგენელი რეკორდი არ შედეგბოდა, რომ არა ჯეისონ ლეჟაკი. 4x100 თავისუფალი სტილით ესტაფეტაში ფელპსმა თავისი ეტაპი შესანიშნავად გაცურა, თუმცა, მეოთხე ეტაპის წინ აშშ-ის ნაკრები საფრანგეთის ნაკრებს თითქმის მთელი კორპუსით ჩამორჩებოდა. ასეთი ჰანდიკაპის ას მეტრზე აღმოფხვრა თითქმის წარმოუდგენელია, თუმცა, ლეჟაკმა შეუსრულებელი მისია შეასრულა. ამერიკელმა მოცურავემ თავისი ეტაპი 46.06 წამში გაცურა, ფრანგები უკან ჩამოიტოვა, აშშ-ის ნაკრებს ოქრო მოუტანა და ფელპსს უნიკალური რეკორდის დამყარების შანსი მისცა.

200 მეტრი ბატერფლაით

ეს არის დისტანცია, რომელიც ფელპსს ყველაზე მეტად უყვარს. სწორედ ამ დისტანციაზე იცურავა მაიკლმა პირველ ოლიმპიადაზე. მაშინ ის 15 წლის იყო. ათენსა და პეკინში კი მაიკლი ამ დისტანციაზე მხოლოდ დროს ებრძოდა. ცოტა არ იყოს, მოულოდნელიცაა, რომ მან ლონდონში ეს დისტანცია დათმო.

ერთი შეხება

დრამატული გამოდგა პეკინის ოლიმპიურ თამაშებზე 100 მეტრზე ბატერფლაით ცურვა. კვალიფიკაციაში საუკეთესო დრო აჩვენა სერბმა მილორად ჩავიჩმა, რომელმაც ფინალური გაცურვა იდეალურად დაიწყო და 50 მეტრის შემდეგ თითქმის ნახევარ კორპუსს უგებდა ფელპსს. მაიკლმა დისტანციის ბოლო მეტრებზე სასწაული აჩვენა, სიჩქარეს მოუმატა და ერთი შეხებით აჯობა სერბს.

8-დან 8

2008 წლის ოლიმპიურ თამაშებზე აშშ-ის ნაკრებმა 4x100 მეტრზე კომბინირებული ესტაფეტა მოიგო და ეს მაიკლ ფელპსისთვის პეკინის ოლიმპიადაზე მოგებული მერვე ოქრო იყო. ამით ფელპსმა დაამხო მარკ სპიცის რეკორდი, რომელსაც ერთ ოლიმპიადაზე შვიდი ოქრო ჰქონდა მოგებული.

ლატინინას რეკორდის გამეორება

ლონდონის ოლიმპიური თამაშების დაწყებამდე მაიკლ ფელპსს 16 მედალი ჰქონდა და მოგებული ოლიმპიური მედლების მხრივ ჩამორჩებოდა მხოლოდ ლარისა ლატინინას, რომელმაც თავის დროზე 18 მედალი მოიგო. თავის საყვარელ 200 მეტრზე ბატერფლაით ცურვაში მაიკლმა მხოლოდ ვერცხლი მოიგო, თუმცა, სწორედ ამ ვერცხლის მედლის წყალობით გაუთანაბრდა ლარისა ლატინინას.

ყველა დროის საუკეთესო

მაიკლმა ლატინინას რეკორდი გაიმეორა და, ცხადია, ამაზე არ გაჩერებულა. ლონდონის ოლიმპიურ თამაშებზე საერთო ჯამში მაიკლმა ექვსი მედალი მოიგო და მთლიანობაში 22 მოგებული ოლიმპიური მედალი დააგროვა.

ფელპსის ყველა მედალი

2004 ათენი

ოქრო - 400 მეტრი, კოპლექსური ცურვა

ბრინჯაო - ესტაფეტა 4x100 მეტრი, თავისუფალი სტილი

ბრინჯაო - 200 მეტრი, თავისუფალი სტილი

ოქრო - 100 მეტრი, ბატერფლაი

ოქრო - ესტაფეტა 4x200 მეტრი თავისუფალი სტილი

ოქრო - 200 მეტრი, კოპლექსური ცურვა

ოქრო - 200 მეტრი, ბატერფლაი

ოქრო - 4x100 მეტრზე კომბინირებული ესტაფეტა

2008 პეკინი

ოქრო - 400 მეტრი, კოპლექსური ცურვა