ფაჩულიას დრო შეუმცირეს

შაბათს საქართველოს ლეგიონერმა კალათბურთელებმა მორიგი ტურების მატჩები გამართეს.

24 საათი 08.02.10

NBA-ში ჩვენთვის სასიამოვნო არაფერი მომხდარა. ზაზა ფაჩულიას "ატლანტა" დამაჯერებლად თამაშობს, მაგრამ თავად ფაჩულიას ყოველდღიურად უმცირდება სათამაშო დრო.

გუშინ, გამთენიისას, "ქორებმა" ჩიკაგოელ "ხარებს" უმასპინძლეს და ანგარიშით 91:81 გაიმარჯვეს. მატჩის გმირი გახდა ჯოშ სმიტი, რომელმაც ამ სეზონში პირველი ტრიპლი შეასრულა (18 ქულა, 14 მოხსნა, 10 შედეგიანი გადაცემა). სმიტს ძირითადი ხუთეულის დანარჩენმა კალათბურთელებმაც აუბეს მხარი. ალ ჰარფორდმა თამაში 15 ქულით და 5 მოხსნით დაასრულა, ჯო ჯონსონმა საკუთარ აქტივში 18 ქულა და 5 მოხსნა ჩაიწერა, მარვინ უილიამსის ანგარიშზე 11 ქულა და 8 მოხსნა იყო, მაიკ ბიბიმ კი 8 ქულითა და 5 შედეგიანი გადაცემით დაასრულა თამაში. ძირითადი ხუთეულის კალათბურთელებს არაფრით ჩამორჩა ჯამალ კროუფორდი, რომელმაც საკუთარ აქტივში 17 ქულა ჩაიწერა. რაც შეეხება ზაზა ფაჩულიას, მან მხოლოდ 5 წუთი გაატარა მოედანზე და თავის გუნდს 3 მოხსნა შეაწია. ამ გამარჯვების შემდეგ "ატლანტა" აღმოსავლეთ კონფერენციაში მეოთხე ადგილზეა და სულ ცოტათი ჩამორჩება მეორე-მესამე ადგილზე მყოფ "ბოსტონსა" და "ორლანდოს".

ამ კვირაში შედგა გიორგი ცინცაძის დებიუტი პოლონურ "სოპოტში". პირველი პოლონური მატჩი წარმატებული გამოდგა - ქვეყნის ჩემპიონატის მე-19 ტურში მისმა გუნდმა აუტსაიდერთა შორის მყოფი "პოლონია" დამაჯერებელი ანგარიშით - 106:78 დაამარცხა.

ქართველმა გამთამაშებელმა მოედანზე 22 წუთი დაჰყო და თითო სამქულიანი და ორქულიანი ჩააგდო. 5 ქულასთან ერთად, მან ამდენივე შედეგიანი გადაცემა, 2 მოხსნა და 1 ჩაჭრა მიითვალა.

ზედიზედ სამი წაგებული თამაშის შემდეგ იოლი გამარჯვება მოიპოვა ვოვა ბოისას "ზადარმა". ადრიატიკის ლიგის მორიგ ტურში ხორვატიულმა გუნდმა სტუმრად სლოვენიური "ჰელიოსი" დაამარცხა - 111:65. "ზადარის" წარმატებაში საკუთარი წვლილი შეიტანა საქართველოს ნაკრების ფორვარდმაც. ბოისამ მატჩი სასტარტო ხუთეულში დაიწყო და მოედანზე გატარებულ 20.15 წუთში პირად აქტივში 9 ქულა, 2 შედეგიანი გადაცემა და თითო მოხსნა-ჩაჭრა გაიფორმა.

ამ ტურის შემდეგ "ზადარი" 11 გამარჯვებით ადრიატიკის ლიგაში მე-7 ადგილზეა და მხოლოდ 1 მოგებით ჩამორჩება სამ გუნდს. რეგულარულის დასრულებამდე 6 ტური დარჩა.

წარმატებებით ვერ დაიკვეხნის გიორგი გამყრელიძის "მიტელდოიჩერი". მგლებმა" უკანასკნელი 5 მატჩიდან მხოლოდ ერთი მოიგეს. გუშინ ქართველის გუნდი საპლეიოფო ზონაში მოხვედრისთვის ბრძოლაში უშუალო კონკურენტთან - "ბროზესთან" 19 ქულის სხვაობით დამარცხდა (55:74).

გამყრელიძემ მოედანზე გატარებულ 19.07 წუთში მხოლოდ 2 ქულა მოაგროვა, რასაც 4 პასი, 3 ჩაჭრა და 1 მოხსნა დაუმატა.

სტატიის მისამართი: http://24saati.ge/index.php/category/sport/basketball/2010-02-08/3352.html