Grande მარკოიშვილი

"კანტუ" კანტუში "ლეიკერსია". კანტუში დევიდ ბლატის "მაკაბი" ჩავიდა და ოთხივე მეოთხედი წააგო.

ზურა თალაკვაძე

24 საათი 04.02.12

ვლადიმირ მიცოვმა 17 ქულა და 9 პასი აკრიფა

ბლატის მილიონერები მთელი თამაში უკან იყვნენ. "კანტუ" სიღრმით იგებდა და "მაკაბი" ბლატის ინტელექტით დისტანციაზე რჩებოდა. "კანტუს" ორი გაქცევა ბლატმა დროული წუთშესვენებებით და სწორი შეცვლებით გააჩერა. ბლატმა მანუჩარ მარკოიშვილი ვერ გააჩერა. ადრე, ევროპის ჩემპიონატზე, მანუმ რუსეთის მძიმე, ცივ ნაკრებს 21 ქულა დაუტოვა, 7/4 სამიანი გაუშვა. ბლატმა მარკოიშვილისგან რამდენიმე საჩუქარი "კანტუსთან" თამაშის დროს მიიღო. მარკოიშვილი პირველი იყო.

ბოლო მეოთხედში "კანტუში" სხვებს მანუზე მსუყე სტატისტიკა აქვთ. მარკოიშვილი ბოლო 10 წუთში 2 ქულას და 3 მოხსნას იღებს. უბრალოდ, საქართველოს ნაკრების ყველაზე სანდო წევრმა "კანტუს" დაცვაში ააღებინა ასაღები და "მაკაბის" ულტრასწრაფი შეტევა დადგა, ადვილად გასაშიფრი გახდა. მარკოიშვილმა 4 სამიანიდან სამი ვერ ჩასვა. მანუმ ცუდი პროცენტი მაგარი დაცვით და მანამდე აღებული 9 ქულით, 4 მოხსნით გადაფარა. მარკოიშვილი "კანტუს" ჯოკერი იყო.

ისრაელიდან წაუგებლად წამოსვლა ძნელია. "მაკაბის" დარბაზი "მაკაბისთან" ერთად სუნთქავს, ცოცხლდება, არ ჩერდება. "მაკაბი" თელ ავივში "სან ანტონიოა", თითქმის არ აგებს. თელ ავივში მოიგო "ბარსელონამ" და ნავაროს ძმაკაცები სხვა ლიგაში არიან. ცსკასთან ერთად ოთხთა ფინალს ელოდებიან და იციან, რომ ფინალამდე ცსკას არ გაესაუბრებიან. "კანტუ" არ არის "ბარსელონა" და მაინც უნდა გაძლოს.

"მაკაბისთან" გასვლა 9 თებერვალს იქნება. მერე, ორ კვირაში ბარსელონაში უნდა ჩავიდნენ. იქ არ უნდა დაიძაბო, მშვიდად დაელოდო ბოლო მეოთხედის ბოლო წამს და ბოლო ტურში კაუნასშიც მოსაგებია.

"კანტუ" უნდა დაიძაბოს. "კანტუში" მანუჩარ მარკოიშვილია.

"კანტუ" მოუმატებს.

H ჯგუფი

კანტუ (2:1)-მაკაბი (1:2) 82:74, 23:20, 26:24, 17:16, 16:14 (მიცოვი 17+9 პ; ბაზილე 14+4 მ; შერმადინი 25 წუთი, 13 ქულა, 5 მოხსნა, 3 ჩაჭრა, 2 პასი, 2 დაფარება, 1 შეცდომა, 2 ფოლი; მარკოიშვილი 28 წუთი, 11 ქულა, 7 მოხსნა, 2 ჩაჭრა, 1 პასი, 2 შეცდომა, 1 ფოლი; მაძარინო 7; ლოინენი 6+4 პ; მარკონატო 6; ბრუნერი 4; ჩინჩარინი 4 - ლენგფორდი 16+5 მ; ჰენდრიქსი 15+7 მ+3 დ; შორცანიდისი 8+4 მ; მალეტი 8; ბლიუ 7+5 მ; ელიაჰუ 6; სმიტი 6; ბერშტაინი 4; ოჰაიონი 4).

H ჯგუფი

ბარსელონა (3:0)-ჟალგირისი (0:3) 94:80, 23:18, 19:25, 21:16, 31:21 (ლორბეკი 19+5 მ+2 +2 ჩ; ნავარო 16+3 მ+3 პ; უერტასი 14+6 პ; ვასკესი 11+6 მ; მიკეალი 11; ეიდსონი 8+2 მ+2 პ; უოლასი 5; ინგლესი 5; ნდონგი 4; პეროვიჩი 1 - უიმსი 17+2 მ+2 პ; იავტოკასი 13; იანკუნასი 12+4 მ; რაკოვიჩი 12+2 მ; დელინინკაიტისი 11+4 მ; კალნიეტისი 9+9 მ+4 პ; კოლინზი 6).

"პანათინაიკოსი" გუნდია, "ფენერბახჩე" - ნორმალური მოთამაშეების ჯგუფი, რომელიც ასაწყობი, დასალაგებელია. თურქეთში ჟეიკო ობრადოვიჩმა თავიდან მაიკ ბატისტი დატვირთა და ცენტრმა პირველ მეოთხედში 11 ქულა აიღო. ბატისტმა გახსნა "ფენერბახჩეს" დაცვა და "პანათინაიკოსმა" თავის ტერიტორიაზე ზონა დააყენა. ობრადოვიჩის ზონა დარჩა, არ დაშლილა. "პაომ" კომფორტულად, თავისი კალათბურთით მოიგო.

როკო უკიჩი კარგი პირველი ნომერია. ადის მეორეზე, აკურატულად ისვრის სასროლს, ბევრ რაღაცას ამჩნევს. "პანათინაიკოსთან" უკიჩმა კალათბურთის პროფესორისგან, დიმიტრის დიამანტიდისისგან ბევრი ჩაიწერა, მოინიშნა. დიამანტიდისმა 8 პასი დატოვა, უკიჩს 7 სამიანიდან 6 არ ჩააგდებინა, დაცვაში ბრიუს ბოუენი იყო.

"პანათინაიკოსი" ჯგუფში ჯერ მეორეზეა. თუ "უნიქსი" ბოლო თამაშამდე არ წააგებს, მაშინ ობრადოვიჩის გუნდს ყაზანში მოსაგები აქვს. შვიდი ქულით მოსაგები აქვს და შეკვეთით "უნიქსის" ტერიტორიიდან +7-ის აღება ძნელია.

"უნიქსის" ლიდერი, ჰენრი დომერკანტი ევროლიგის იანვრის MVP გახდა. დომერკანტის გარდა, სხვებიც კარგ ფორმაში შევიდნენ.

G ჯგუფი

ფენერბახჩე (1:2)-პანათინაიკოსი (2:1) 56:77, 9:24, 13:12, 21:22, 13:19 (ჯერელსი 12+3 მ+3 ჩ; უკიჩი 11+3 პ; ფექერი 10+5 მ; გისტი 6+3 მ+2 პ; თურქანი 4+8 მ; აცური 3; ბოგდანოვიჩი; პრელდჟიჩი 3; ონანი 2; შავაში 2 - ქაიმაქოღლუ 19+6 მ; ბატისტე 15+5 მ+3 პ; სატო 12+10 მ; ლოგანი 8+2 ჩ; დიამანტიდისი 7+8 პ; ცარცარისი 7; ვუგიუკასი 3; ნ.კალატესი 3; იასიკიავიჩუსი 3).

მალაგაში პირველი მეოთხედი ბო მაკალების იყო. პატარა, მოძრავმა ამერიკელმა 11 ქულა აკრიფა, თამაშიდან ყველაფერი (3/3 საშუალო, 1/1 სამიანი) ჩასვა და "მონტეპასკიმ" წაიყვანა. ფავორიტმა ფავორიტის კალათბურთით მოიგო და ესპანეთიდან კიდევ ბევრი წამოიღო. "მონტეპასკი" ფავორიტების მეორე ეშელონში ზის და სახიფათოა.

მაკალები პირველი მეოთხედის კაცი იყო და მეორე ათ წუთში კშიშტოფ ლავრინოვიჩი (F) გაიხსნა. ლიტვის ნაკრების ფორვარდმა "უნიკახას" ამ პერიოდში 13 ქულა დაუტოვა.

მესამე მეოთხედში ცოტას იგორ რაკოჩევიჩი იღებს, რაკოჩევიჩზე ცოტა მეტს - დევიდ მოსი. "უნიკახა" ჩანაწერებს აკეთებს. "მონტეპასკიმ" წინა გარჩევაში, ესპანეთში, "რეალს" 88:69 მოუგო. იტალიურ-არაიტალიური შემადგენლობით "მონტეპასკის" მეორე ეტაპზე სამივე თამაში აქვს მოგებული.

მოსმა ბოლო მეოთხედში მოკლა "უნიკახა". ამერიკელმა 6/4 სამიანი გამოიყენა, დაცვაში რამდენიმე აკურატულად იდგა (2 ფოლი 30 წუთში) და ორივე გუნდში მარგი ქმედების ყველაზე მაღალი კოეფიციენტი (20) ჰქონდა.

"უნიკახა" მეორე ეტაპის ბალასტია. 16 საუკეთესოში შესვლა კლუბისთვის უკვე შედეგია და შემდეგი სეზონისთვის უკეთესი შემადგენლობით მეტის გაკეთება შეიძლება. უბრალოდ, ჯერ ესპანეთის ჩემპიონატშია საქმეები დასალაგებელი. მოხუცი გარბახოსა და არასტაბილური ბერნი როდრიგეზი პრობლემებს ვერ მოაგვარებენ.

F ჯგუფი

უნიკახა (0:3)-მონტეპასკი (3:0) 68:91, 19:27, 21:23, 17:21, 11:20 (ფრილენდი 14+9 მ; ზორიჩი 11+7 მ+3 პ+3 დ; როულენდი 11+4 მ; ფიტჩი 6; გარბახოსა 5; პერიჩი 4; ბ.როდრიგეზი 4+4 პ - მოსი 20+7 მ+2 პ; კ.ლავრინოვიჩი 18; ანდერსენი 15+6 მ; მაკალები 13+3 პ; ტორნტონი 13; რაკოჩევიჩი 8; ზისისი 2; კარარეტო 2).

n n n

"გალათასარაი" მეოთხედფინალში გასვლის შანსს ინარჩუნებს. მოსკოვში ჩასვლა და ტურნირის საუკეთესო გუნდთან წაგება დაგეგმილი იყო. ეს "გალათასარაიმაც" იცოდა. ცსკამ მოიგო კომფორტული სხვაობით და უკვე ფლეი-ოფშია. გასავარდნ ეტაპზე ანდრეი კირილენკოს მეგობრები, ალბათ, "რეალზე" გავლენ. მერე კი ოთხთა ფინალში გავლენ. ეს "რეალი" ამ ცსკაზე სუსტია.

ანდრეი კირილენკომ ვერ ჩასვა სამიანი, ოდნავ პასიური იყო დაცვაში და ცსკამ მაინც უპრობლემოდ მოაგვარა ყველაფერი. ცსკა წელს ყველგან ყველაფერს აგვარებს.

ნენად კრსტიჩი "გალათასარაისთვის" ბილ რასელი იყო. სერბი ტრიალებდა სამწამიანში, თურქული მილიონებით შეკრულ გუნდს შლიდა და ამ პროცესში 10/8 სროლა გამოიყენა, ოთხივე საჯარიმო ათიანში გაუშვა, ძალიან კარგი იყო. კრსტიჩმა მარგი ქმედების კოეფიციენტში +31 ჩაიწერა. ვიქტორ ხრიაპამ ფლეიმეიქერის პასები არიგა. ხრიაპა მეოთხე ნომრიდან პერიმეტრზე ამოდიოდა, ალაგებდა სიტუაციას, ტემპს აკონტროლებდა. ხრიაპა და კირილენკო ისვენებდნენ. მეორე ტაიმში ფავორიტმა მეორე ხუთეული დატვირთა. მეორე ხუთეულმა "გალათასარაი" დატვირთა და მალე თამაში დამთავრდა. ცსკასთვის - თამაში და "გალათასარაისთვის" - მასტერკლასი გუნდისგან, რომელიც წელს ევროლიგაზე დიდია.

E ჯგუფი

ცსკა (3:0)-გალათასარაი (1:2) 85:70, 19:12, 25:25, 22:15, 19:18 (კრსტიჩი 20+9 მ; ტეოდოშიჩი 12; შიშკაუსკასი 11+3 პ; ხრიაპა 11+6 პ+4 მ; შვედი 10+3 მ+3 პ; კირილენკო 9+6 მ+3 დ+2 პ+2 ჩ; გორდონი 5+3 მ+3 პ+2 დ; კაუნი 5+2 დ; დ.ლავრინოვიჩი 2+2 დ - ლუკასი 15+5 მ+5 პ+3 ჩ; არსლანი 13+2 პ; ალდემირი 11+9 მ+2 ჩ; შიპი 10+3 მ; თოფალოღლუ 6+4 პ+2 მ+2 ჩ; შამპერტი 6+2 მ; ლაკოვიჩი 5; ანდრიჩი 4).

სტატიის მისამართი: http://24saati.ge/index.php/category/sport/basketball/2012-02-04/25029.html