რონ არტესტის დისკვალიფიკაცია

რონ არტესტი ცუდი ბიჭია. კარგი სპორტსმენი, პოპულარული რეპერი, ნორმალური როლერი და ცუდი ბიჭი.

ზურა თალაკვაძე

24 საათი 26.04.12

რონ არტესტი (15) და ჯეიმს ჰარდენი

არტესტს ადრე (2004, 19 ნოემბერი) დეტროიტში კიკბოქსინგის მერე 86 (73 რეგულარულში, 13 ფლეი-ოფში) თამაში გამოატოვებინეს, საბანკო ანგარიში 11 მილიონი დოლარით შეუმსუბუქეს. რონთან ერთად იმ გარჩევაში დეტროიტის" და ინდიანას" სხვა სერიოზული ტიპებიც მოხვდნენ - სტივენ ჯექსონი, ბენ უოლასი და ჯერმეინ ონილი. დეტროიტის" და ინდიანას" თამაში ცუდად დამთავრდა. არტესტი იმ ინდიანაში" ბოსი იყო. სოლიდური დისკვალიფიკაციის შემდეგ, რონი აზრზე მოდის, გულშემატკივრებში აღარ გადადის და რამდენიმე საქველმოქმედო აქციაში იღებს მონაწილეობას. დიდი ბიჭი გაიზარდა, კანონმორჩილი ამერიკელი გახდა. რონმა შეიცვალა სახელი, გვარი და ძველი არტესტი გადაფარა სამმა სიტყვამ - Metta World Peace.

რონის კაიბიჭობა ოკლაჰომასთან" ცუდმა ეპიზოდმა გადაფარა. არტესტმა, ლეიკერსის" ერთ-ერთმა ლიდერმა, ოკლაჰომას" ჯეიმს ჰარდენს ყურში გაარტყა, დააგდო. მისტერ ჰარდენს ტვინის შერყევა აქვს. ჯეიმსი ოკლაჰომას" ჯოკერია. მშვიდი, friendly პერსონა. სახიფათო ეპიზოდი იყო. თავის არეში დარტყმა ყოველთვის სახიფათოა. არტესტისგან - ორმაგად.

რონი, იგივე Metta World Peace, 7 თამაშს გამოტოვებს. ლიგის ბოსებმა და კომისარმა, მისტერ დევიდ სტერნმა, არტესტს დისკვალიფიკაცია გამოუწერეს. საჭირო დისკვალიფიკაცია.

არტესტი რეგულარულში ლეიკერსის" შემდეგ მატჩს - საკრამენტოსთან"თამაშს გამოტოვებს და ფლეი-ოფის პირველ 6 ტესტში ვერ მიიღებს მონაწილეობას. დასავლეთის კონფერენციის პირველ წრეში კალიფორნიული ბენდი დენვერზე" გავიდა. ალბათ, ნაგეთსი" კობი ბრაიანტის, პო გასოლის და ენდრიუ ბაინუმის გუნდს 5 და ნაკლებ თამაშში ვერ გააგდებს. ალბათ (თუნდაც, უარტესტოდ) საერთოდ ვერ გააგდებს. რონი დაისვენებს, ყველაფერს გადახარშავს და კარგი ბიჭი გახდება. მანამდე მისტერ ბრაიანტი ნაგეთსის" პრობლემას მოაგვარებს. მერე რონიც მოვა.

დევიდ სტერნი: ჯეიმს ჰარდენის ეპიზოდი სახიფათო იყო. ლიგამ ერთადერთი მისაღები გადაწყვეტილება მიიღო. ჩვენი ოჯახის, NBA-ს ყველა წევრი თავს უსაფრთხოდ უნდა გრძნობდეს. ყველა დამნაშავე დაისჯება. თავის არეში ნებისმიერი დარტყმა შეიძლება ლეტალური იყოს. ნუ ჩხუბობთ, ითამაშეთ კალათბურთი". მოწესრიგებული ფისოს, მისტერ ლეოპოლდის ამერიკული და ცოტა გამკაცრებული ვარიანტია.

არტესტმა ჯეიმს ჰარდენს ლეიკერსის" და ოკლაჰომას" მეორე მეოთხედში მიარტყა. ჯეიმსი გაიყვანეს, არტესტი გააგდეს და ის თამაში ორ ოვერტაიმში ლეიკერსმა" წამოიღო. საინტერესო, თითქმის ფლეი-ოფის გარჩევა წამოვიდა. კობიმ მეორე ოვერტაიმში 6 ქულა აკრიფა. კობი იყო.

დეტროიტის" და ინდიანას" გარჩევის შემდეგ, არტესტის ეს დისკვალიფიკაცია ლიგის დისციპლინარების ჰაილაითებში ზის. კიდევ რამდენიმე, დაახლოებით იგივე ყურის აწევა იყო.

1995/96. ჩიკაგო ბულზის" ფორვარდმა დენის როდმანმა მსაჯს, ტედ ბერნჰარდტს, თავი სახეში დაარტყა. დასვენება 5 თამაშით.

1996/97 - მისტერ როდმანმა ოპერატორს კამერა წაართვა, იქვე დაამტვრია. დენისის დისკვალიფიკაცია - 11 თამაში.

შარშან - ენდრიუ ბაინუმმა ფლეი-ოფის, დასავლეთის კონფერენციის მეორე წრის დროს, დალასის" ხოსე ხუან ბარეა დაკუჭა, გადატეხა, გადააგდო. ბაინუმსაც ხუთთამაშიანი მიარტყეს.

რონ არტესტი (Metta World Peace) ლეიკერსისთვის" საჭირო პერსონაა. ამ სეზონში რონი 7.7 ქულას, 3.4 მოხსნას, 2.2 პასს იღებს. არტესტის პერსონალური დაცვა ლიგაში ერთ-ერთი საუკეთესოა. რონს 1.1 ჩაჭრა მოაქვს და ყველას აწუხებს. მისტერ არტესტი ლეიკერსამდე" ჩიკაგოში" (1999/2000-2001/2002), ინდიანაში" (2001/02-2005/06), საკრამენტოში" (2005/06-2007/08), ჰიუსტონში" (2008/09) იყო. რონი კარიერით - (რეგულარულის 827 ტესტში) 14.2 (11 757) ქულა, 4.7 (3 908) მოხსნა, 3.0 (2 463) პასი, 1.9 (1 544) ჩაჭრა. სოლიდურია. არტესტი ორი წლის წინ ჩემპიონი გახდა. ლეიკერსი" ფინალში სელტიქსს" უგებს. რონი იმ სერიაში პოლ პირსს უქმნიდა დისკომფორტს.

ჯეიმს ჰარდენი ოკლაჰომაში" შეუცვლელი პერსონაჟია. კევინ დიურანი იქ პრობლემებს აგვარებს, რასელ უესთბრუქი პრობლემებს ქმნის და ჯეიმსი ოკლაჰომას" კრავს. ჰარდენი არ დგას პირველ ხუთეულში და 31.2 წუთში 16.8 ქულას, 4.1 მოხსნას, 3.7 პასს იღებს. ჯეიმსს აგრესია და ინტელექტი მოაქვს. ჰარდენი აკურატულია დაცვაში და თუ უესთბრუქი იჭრება, პირველ ნომერზე დგება. ჯეიმსმა მოუმატა და უჰარდენო ოკლაჰომას" ფლეი-ოფში ბევრი რამ აქვს გადასაწყობი.

თუ (და, სავარაუდოდ,) ლეიკერსი" დენვერს" გაივლის და ოკლაჰომას" მოქმედ (და უმუღამო) ჩემპიონთან, დალასთან" სერიაში პრობლემა არა აქვს, მეორე წრეში კარგი მატჩი იქნება. ლეიკერსი" და ოკლაჰომა" პოტენციურად კონფერენციის ფინალია, მაგრამ პარალელურად აკრიფა პენსიონერების ცირკმა, სან ანტონიომ" და უკვე მოიგო wild, wild west. "სან ანტონიო" კონფერენციის ფინალში ერთ-ერთს, ოკლაჰომას" ან ლეიკერსს" დაელოდება.

ჰარდენთან ერთად ოკლაჰომა" შთამბეჭდავი გუნდია. უჰარდენოდ ბევრი რამ იშიფრება.

რონ არტესტთან (Metta World Peace) ერთად ლეიკერსი" სერიოზული გუნდია. უარტესტოდ ბევრი რაღაც უფრო მშვიდია.

დასავლეთში თითქმის ყველაფერი გარკვეულია. ტიმ დანკანის და ემანუელ ჯინობილის სან ანტონიო" პირველ წრეში იუტას" დაამშვიდებს. ლეიკერსი" გავიდა დანილო გალინარის და ანდრე მილერის დენვერზე", ოკლაჰომა" - დალასზე". თითო თამაში დარჩათ კლიპერსს" (40:25) და მემფისს" (40:25). ამ ორში უკეთესი გუნდი სერიას თავის ტერიტორიაზე დაიწყებს. დასავლეთში ყველაფერი საინტერესოა. როგორც ყოველთვის.

რონ არტესტი პოპულარული პერსონაა. ნორმალურად თამაშობს კალათბურთს, კარგად თამაშობს ლას ვეგასის აპარატებზე და ორჯერ ჯეკპოტი აქვს მოხსნილი. ლას ვეგასში. კალათბურთში რონი პოლიციელი, სხვა გუნდის ლიდერის ამყვანი კიბორგია. არტესტი დაცვაში მაგრად ზის, ბევრს აწუხებს, დისკომფორტს უქმნის. ჰარდენის ეპიზოდი სხვა თემაა. რონი ამას ხვდება. რონმა ოკლაჰომას", ჯეიმს ჰარდენს Sorry მიუმესიჯა.

ბოდიში მიღებულია. ტვინის შერყევაც.

სტატიის მისამართი: http://24saati.ge/index.php/category/sport/basketball/2012-04-26/28004.html