Ice Cube და დუაიტ ჰოვარდი
"ლეიკერსის" სამზარეულოში კიდევ ერთი სერიოზული ტიპი შევიდა. რეპერი ორი პიტბულით და "ლეიკერსის" შარფით.
24 საათი 27.07.12
აის ქიუბი
"ლეიკერსის" სამზარეულოში კიდევ ერთი სერიოზული ტიპი შევიდა. რეპერი ორი პიტბულით და "ლეიკერსის" შარფით.
კალიფორნიაში აის ქიუბი კარგი ბიჭია. აის ქიუბი ყველგან კარგი ბიჭია. ძველი რეპერი, ძველი კრიმინალი, ძველი განგსტერი, ძველი ბიჭი - აის ქიუბმა ბევრი რაღაც მოასწრო და მისტერ AngryMachine "ლეიკერსის" გულშემატკივარია. ჯეკ ნიკოლსონთან, სტივენ სპილბერგთან, პამელა ანდერსონთან, ადამ სენდლერთან, დასტინ ჰოფმანთან, ბორატთან, ბორატის ასისტენტთან ერთად. აის ქიუბი ლოს ანჯელესში ახალი მუსიკალური პროექტის პრეზენტაციაზე მივიდა. ბევრზე იჭორავა, ბევრზე ჭორაობა დაეზარა და რამდენიმე წუთი "ლეიკერსს" დაუთმო. მისტერ ქიუბს გუნდში დუაიტ ჰოვარდის გადაყვანა არ უნდა. რაღაც თვალსაზრისით, ბუთხუზა რეპერი მართალია.
IceCube: "ლეიკერსს" ჰყავს ენდრიუ ბაინუმი და არ მესმის, რატომ უნდა გავუშვათ გუნდიდან მოთამაშე, რომელიც უკეთესი, უფრო სრულყოფილი, გუნდისთვის საჭირო გახდა. ჰოვარდი სერიოზული ტიპია, მაგრამ "ლეიკერსზე" მეტად უყვარს დოლარები. დოლარები მეც მიყვარს, ყველას გვიყვარს, მაგრამ ღირსება, ამ გუნდის დიდი ისტორია უფრო მეტია, ვიდრე მრავალწლიანი კონტრაქტი. ენდრიუმ მოუმატა და შარშან ჰოვარდზე ცუდი არ იყო. ენდრიუ ჩვენი კაცია, ელ-ეიში თავს კომფორტულად გრძნობს. დავიტოვოთ ბაინუმი და ამ შემადგენლობით კიდევ ერთხელ ვიქნებით ჩემპიონობის ფავორიტები. თან, კობი გვყავს."
ჰოვარდის ამბები არ მთავრდება. თქვა: ჯერ "ლეიკერსში" ვარ და კონტრაქტი გაამზადეთო. მერე ფულზე წუწუნი დაიწყო - მგზავრობის ხარჯი უნდა ამინაზღაუროთ, თორემ დამატება მიწევსო. "ორლანდოში" დარჩენით ჰოვარდი ერთ სეზონს დაკარგავს. შარშან, რეგულარულის დროს, დუაიტი ორჯერ დაელაპარაკა "მეჯიქის" ბოსებს ტრანსფერზე და თემა არ დაიხურა. "ლეიკერსი" ჰოვარდში ამ გენერაციის უილტ ჩემბერლენს, ჯორჯ მაიქენს, შაკს ხედავს. ფრენჩაიზი დუაიტს მომხიბლავ კონტრაქტს სთავაზობს. ის კი ჯერ ფიქრობს, უკეთეს ვარიანტს ეძებს. უკეთესი ვარიანტი კალათბურთის თამაში და ერთ სეზონში 27 მილიონი დოლარის აღებაა. ჰოვარდმა ვერ გაიგო, სად და რამდენი წლით უნდა წავიდეს. ან დარჩეს. ან კალათბურთი ითამაშოს. და IceCube უფრო ბაინუმთან ძმაკაცობს, ვიფრე დუაიტთან. კობი ბრაიანტის, ბაინუმის და პო გასოლის ბენდს კიდევ ერთი ლამაზი, მოქნილი პროგრამის დაკვრა შეუძლია. აის ქიუბთან ერთად. ბრუტალური მიქსტი. რეალურად ბრუტალური. აის ქიუბმა "ლეიკერსის" ახალი ამუნიცია შეუკვეთა. ზურგზე აწერია Bynum. აისი მაგარი ტიპია. სთრითბოლსაც მაგრად თამაშობს. ანაკონდებსაც მაგრად იჭერს. KeepTheirHeadRingin’.