ქალებს ვერცხლი გუნდურად ერგოთ

მოჭადრაკეთა გუნდური ევროპის ჩემპიონატი, რომელიც საქართველოს ქალთა ნაკრებმა წაუგებლად განვლო.

24 საათი 02.11.09

საბოლოოდ, ქართველი მანდილოსანი მოჭადრაკეებისთვის ვერცხლის მედლებით (მესამედ) დასრულდა ქართველებს 9 შეხვედრაში 7 გამარჯვება და 2 ყაიმი მოუგროვდათ, მაგრამ მოხდა ისე, რომ მათ დარად, 16 ქულა აღმოაჩნდა ევროპის ჩემპიონ რუსეთის ნაკრებსაც, რომელმაც დამატებითი მაჩვენებლების წყალობით პირველობა ირგუნა. არადა ნოვი სადში დასრულებულ კონტინენტის პირველობაზე ჩრდილოელებმა ერთადერთი შეხვედრა სწორედ საქართველოს ნაკრებთან დათმეს.

საქართველოს ნაკრები ნოვი სადში ნინო გურიელის კაპიტნობითა და ხუთი მოთამაშით - ნანა ძაგნიძე (4 ქულა 8 პარტიაში), ლელა ჯავახიშვილი (5.5-7), სოფიკო ხუხაშვილი (5-7), ნინო ხურციძე (3-6), ბელა ხოტენაშვილი (6.5-8) წარსდგა. მათ შორის საყურადღებოა ნაკრების დებიუტანტის ხოტენაშვილის თამაში, რომელმაც გარდა იმისა, რომ ბევრ სახელოვან მეტოქეს აჯობა და იმავდროულად 6,5 ქულას მოუყარა თავი, საერთო ჩათვლაში, მხოლოდ რუსეთის ნაკრების ლიდერ ნადეჟდა კოსინცევას ჩამორჩა. კოსინცევამ კი თავის მხრივ 9 ტურში 8 ქულა მიითვალა, რაც უდიდესი შედეგია. მესამე ადგილი უკრაინელებმა დაისაკუთრეს.

ქალებისგან განსხვავებით თავი ვერ გამოიჩინა საქართველოს ჭადრაკის ფედერაციის პრეზიდენტის გია გიორგაძეს კაპიტნობით მოთამაშე ვაჟთა ნაკრებმა. არადა 4 ტურის შემდეგ ქულათა მაქსიმალური რაოდენობით პირველ საფეხურზე იმყოფებოდნენ, მაგრამ დარჩენილ ხუთ ტურში გამარჯვება ვეღარ შეძლეს. დასკვნით შეხვედრაში ქართველები რეიტინგში გაცილებით დაბლა მდგომ ნორვეგიას დაუზავდნენ და საბოლოოდ 10 ქულით მე-13 საფეხურზე აღმოჩნდნენ.

მოთამაშეთა მონაგარი კი ასეთი იყო: ბაადურ ჯობავა (5-9), მიხეილ მჭედლიშვილი (2.5-6), ლევან ფანცულაია (4-7), მერაბ გაგუნაშვილი (3.5-7), თორნიკე სანიკიძე (4-7). ვაჟთა ჩემპიონატში ოქროს მედლები აზერბაიჯანის ნაკრებმა მოიპოვა, რომელმაც რუსებს ბოლო ტურში გადაასწრო. ბრინჯაო კი, ქალთა ტურნირის მსგავსად, უკრაინის გუნდმა დაისაკუთრა.

ევროპის გუნდური

ჩემპიონატი ჭადრაკში.

ნოვი სადი (სერბეთი).

ვაჟები

საბოლოო მდგომარეობა

15 - აზერბაიჯანი

14 - რუსეთი

13 - უკრაინა, სომხეთი

12 - გერმანია, ესპანეთი, პოლონეთი

11 - უნგრეთი, ჰოლანდია, სერბეთი 1, ისრაელი

10 - ინგლისი, საქართველო, რუმინეთი, შვეიცარია

9 - სლოვენია, საფრანგეთი, ბულგარეთი, ფინეთი, საბერძნეთი, ავსტრია, დანია, ჩეხეთი, ნორვეგია