არაბიძეს წარმატება მიულოცეს
ბრაზილიის ქალაქ კალდას ნოვასში დასრულებულ ახალგაზრდულ მსოფლიოს ჩემპიონატზე ჭადრაკში, 18-წლამდელთა შორის შესანიშნავი შედეგი აჩვენა მერი არაბიძემ. ახალგაზრდა ქართველმა მოჭადრაკემ 9 ტურში 8 პარტია მოიგო და მსოფლიოს ჩემპიონის ტიტული მოიპოვა.
24 საათი 30.11.11
ბრაზილიის ქალაქ კალდას ნოვასში დასრულებულ ახალგაზრდულ მსოფლიოს ჩემპიონატზე ჭადრაკში, 18-წლამდელთა შორის შესანიშნავი შედეგი აჩვენა მერი არაბიძემ. ახალგაზრდა ქართველმა მოჭადრაკემ 9 ტურში 8 პარტია მოიგო და მსოფლიოს ჩემპიონის ტიტული მოიპოვა.
ბოლო ტურში არაბიძემ აზერბაიჯანელი ნარმინ კაზიმოვა დაამარცხა და რუსეთის წარმომადგენელ ალინა კაშლინსკაიას ნახევარი ქულით გაუსწრო. ბრინჯაო კი, მონღოლ ალტანულზი ენხტუულს ერგო. მოფლიოს ასაკობრივ ჩემპიონატზე, საქართველოს კიდევ ერთი წარმომადგენელი 14 წლამდელთა შორის ჰყავდა, თუმცა ამ ასაკობრივ კატეგორიაში მოთამაშე ნინო ხომერიკი ლიდერებს ბევრად ჩამორჩა.
ქართველი მოჭადრაკეები თბილისში დღეს გამთენიისას დაბრუნდნენ, ტურნირის შემაჯამებელი პრესკონფერენცია კი სპორტისა და ახალგაზრდობის საქმეთა სამინისტროში გაიმართა. არაბიძეს წარმატება მინისტრმა ლადო ვარძელაშვილმა მიულოცა, შეხვედრას კი ჭადრაკის ფედერაციის პრეზიდენტი გია გიორგაძეც ეწრებოდა.
ლადო ვარძელაშვილი: “მინდა ეს წარმატება მოგილოცოთ. ჭადრაკში გამარჯვებებით ყოველთვის განებივრებულები ვიყავით და სასიამოვნოა, რომ ეს ტრადიცია გრძელდება. მერი არაბიძემ მსოფლიოს ჩემპიონატზე ძალიან დამაჯერებელი თამაში აჩვენა და დაამტკიცა, რომ ღირსეული თაობა მოდის, რომელიც ეროვნულ ნაკრებს სათანადოდ გააძლირებს”.
გია გიორგაძე: “მერის გამორჩეული სეზონი ჰქონდა, მთელი წელი დამაჯერებლად თამაშობდა და ეს ყველაფერი მსოფლიოს ჩემპიონატზე ღირსეულად დააგვირგვინა”.
მერი არაბიძე: “ამ გამარჯვებით ძალიან გახარებული ვარ. დიდი მადლობა სპორტისა და ახალაგზრდობის საქმეთა სამინისტროს მიღებისთვის და მოლოცვისთვის, ეს ყველაფერი დამატებით სტიმულს მომცემს და სამომავლო გამარჯვებებში დამეხმარება”.
სპორტისა და ახალგაზრდობის საქმეთა სამინისტროს პრეს-სამსახური