ფეხბურთიდან წასული ვარსკვლავები

2011 წელს ფეხბურთიდან სამი მსოფლიო ჩემპიონი წავიდა, რომლებიც დიდ ფეხბურთში გასული საუკუნის დასასრულს გამოჩნდნენ.

24 საათი 30.12.11

"ელ ფენომენომ" კარიერა ბრაზილიურ "კორინთიანსში" დაასრულა

ბრაზილიელი ფორვარდი რონალდო, ფრანგი ნახევარმცველი პატრიკ ვიეირა და იტალიელი მცველი ფაბიო კანავარო. ამ სამეულმა თავისი წარმატებული კარიერა სწორედ 2011 წელს დაასრულა.

უნდა ითქვას, რომ ამ ტრიოს გარდა მიმდინარე წელს ფეხბურთი რამდენიმე საკმაოდ ცნობილმა და წარმატებულმა ფეხბურთელმაც დაასრულა და ქვემოთ სწორედ იმ ფეხბურთელებზე გესაუბრებით, რომლებიც პენსიონერთა ბანაკში წლეულს გადაბარგდნენ.

"ელ ფენომენო"

პენსიაზე გასული ფეხბურთელებიდან ყველაზე წარმატებული და გამორჩული ცხადია ბრაზილიელი რონალდო გახლავთ. ბრაზილიის ნაკრებში გამართულ 98 მატჩში მას 62 გოლი აქვს გატანილი და ამ მხრივ, მხოლოდ ფეხბურთის მეფე პელეს ჩამორჩება. მუნდიალის ფინალურ ეტაპებზე გატანილი 15 გოლით კი მსოფლიო ჩემპიონატების ისტორიაში საუკეთესო ბომბარდირი გახლავთ. "ელ ფენომენოს" კარიერის მანძილზე 531 მატჩი აქვს გამართული და 367 გოლი გაიტანა. აქედან 104 მადრიდის "რეალის" შემადგენლობაში გამართულ 177 მატჩში. მსოფლიო ჩემპიონის ტიტული მან ორჯერ მოიგო 1994 და 2002 წლებში. 1998 წელს მსოფლიო ჩემპიონატის ფინალისტი იყო. ამრიგად, მას მუნდიალის ფინალი ზედიზედ სამჯერ აქვს ნათამაშები, რასაც ბევრი ფეხბურთელი ვერ დაიკვეხნის. მსოფლიოს საუკეთესო ფეხბურთელად კი სამჯერ დასახელდა 1996, 1997 და 2002 წლებში.

ეს მხოლოდ სტატისტიკური მონაცემებია, ვისაც რონალდოს თამაში ნანახი არ აქვს ბევრი დაუკარგავს. "ელ ფენომენო" მართლაც ფენომენალური იყო, ვინ იცის, რომ არა გაუთავებელი ტრავმები, რომლებიც რონალდოს მთელი კარიერის განმავლობაში თან სდევდა შესაძლოა იგი ყველა დროის საუკეთესო ფეხბურთელის ტიტულსაც შესწვდომოდა. კარიერის მიწურულს კი რონალდომ წონაში მოიმატა და ამის მიუხედავად, პერიოდულად ისეთ ფეხბურთს აჩვენებდა, რომ ნებისმიერ ახალგაზრდას შეშურდებოდა: "ვიცი წონის გამო ხშირად დამცინიან, თუმცა ამას ყურადღებას არ ვაქცევ, - თქვა რონალდომ პენსიაზე გასვლის განცხადების გაკეთებისას, - ჩემთვის ფეხბურთიდან წასვლის განცხადების გაკეთება სიკვდილის ტოლფასია, რთულია თავი დაანებო იმას, რამაც ამდენი სიხარული მოგანიჭა". რონალდოს წასვლასთან ერთად ბრაზილიურ ფეხბურთში გარკვეულწილად ეპოქა დასრულდა.

ნაციის გმირები

ხუთი წელი გავიდა მას შემდეგ, რაც 2006 წელს გერმანიაში მსოფლიო ჩემპიონატის ფინალში იტალიის ნაკრებმა საფრანგეთი დაამარცხა. მაშინ იტალიელებს ფაბიო კანავარო კაპიტნობდა. 37 წლის მცველმა პენსიაზე გასვლის გადაწყვეტილება ტრავმის გამო მიიღო. კანავარომ 19 წლიანი კარიერიდან 16 იტალიურ ფეხბურთში გაატარა. რაოდენ პარადოქსულიც არ უნდა იყოს ფაბიოს იტალიის ჩემპიონის ტიტული არასდროს მოუგია, არადა თამაშობდა ისეთ გუნდებში, როგორებიც "პარმა", "ნაპოლი", "ინტერი" და "იუვენტუსია".

საფრანგეთის ნაკრების ყოფილმა ნახევარმცველმა პატრიკ ვიეირამ ერთი ფინალი კანავაროსთან წააგო, სამაგიეროდ მეორე ფინალი რონალდოს მოუგო. ვიეირამ კარიერა ზაფხულში 35 წლის ასაკში დაასრულა. პატრიკმა 1998 წელს მსოფლიო ჩემპიონატი მოიგო, ორ წელიწადში კი ევროპის ჩემპიონიც გახდა. იმ ფორმაციის საფრანგეთის ნაკრებში ვიეირა ისეთივე შეუცვლელი იყო, როგორც ზიდანი.

კიდევ ერთი ფრანგი, რომელმაც კარიერა წელს დაასრულა კლოდ მაკელელეა. მართალია საფრანგეთის ნაკრებთან ერთად მაკელელეს არაფერი მოუგია, მაგრამ მას საოცრად წარმატებული საკლუბო კარიერა ჰქონდა. იგი საფრანგეთის, ინგლისის და ესპანეთის ჩემპიონის ტიტულებს ფლობს.

მანკუნიანური ტრიო

2011 წელს კარიერა სამმა მანკუნიანელმა დაასრულა. 31 მაისს ფეხბურთიდან წასვლის განცხადება 36 წლის პოლ სქოულზმა გააკეთა. პოლის უაღრესად წარმატებულ კარიერაში ყველა საკლუბო ტიტულია. ნაკრებში მას 66 მატჩი ჰქონდა გამართული და 14 გოლი გატანილი. სქოულზი იმ ლეგენდარული გუნდის ნაწილი იყო, რომლის მშენებლობაც სერ ალექს ფერგიუსონმა გასული საუკუნის 90-იანი წლების შუაში წამოიწყო. მაშინ შოტლანდიელმა სპეციალისტმა "მანჩესტერში" ახალგაზრდა და უაღრესად ნიჭიერი ფეხბურთელები მიიყვანა. ძმები ნევილები, სქოულზი, გიგზი, ბექჰემი, ნიკი ბატი.

სქოულზთან ერთად კარიერა გარი ნევილმაც დაასრულა. 36 წლის მცველს ტრავმებმა თამაშის გაგრძელების საშუალება არ მისცა. "კარიერა ფანტასტიკურ კლუბში გავატარე, ჩემს გვერდით გენიალური ფეხბურთელები თამაშობდნენ. ბედნიერი ვარ, რომ ამ ისტორიული კლუბის წევრი ვიყავი", - განაცხადა გარიმ, რომლის ძმა ფილი "ევერტონში" ახლაც თამაშობს.

რაღა თქმა უნდა, გვერდს ვერც ედვინ ვან დერ საარს ავუვლით. ჰოლანდიის ნაკრებში მას 130 მატჩი აქვს გამართული იგი ოთხჯერ დასახელდა ევროპის საუკეთესო მეკარედ. ედვინს ხანგრძლივი კარიერის განმავლობაში თითქმის ყველაფერი აქვს მოგებული. კარიერა კი "ბარსელონასთან" წაგებული ჩემპიონთა ლიგის ფინალით დაასრულა, თუმცა იმედგაცრუებული მაინც არ ჩანდა. "ბრწყინვალე კარეირა მქონდა. ახლა უმჯობესია, თუ მეტ დროს ოჯახს დავუთმობ".

არგენტინელი პენსიონერები

2011 წელს ფეხბურთიდან ოთხი ცნობილი არგენტინელი წავიდა. მათ შორის ყველაზე გამორჩეული რობერტო აიალაა, რომელსაც არგენტინის ეროვნულ ნაკრებში 115 მატჩი აქვს გამართული. არანაკლებ წარმატებული კარიერა ჰქონდა მარტინ პალერმოს, რომელმაც კარიერის განმავლობაში 404 თამაში გამართა და 236 გოლიც გაიტანა. საყრდენი ნახევარმცველი მათიას ალმეიდა კარიერის მიწურულს "რივერ პლეიტში" თამაშობდა და ნამდვილად ვერ იტყვის, რომ კარიერის ბოლო წარმატებული ჰქონდა. "რივერმა" არგენტინის უმაღლესი დივიზიონი დატოვა. ალმეიდას ბედი გაიზიარა ერთ დროს არგენტინული ფეხბურთის იმედად შერაცხულმა მარსელო გალიარდომ, რომელმაც გარკვეული პერიოდი ევროპაში გაატარა, თუმცა მასზე გაცემული ავანსები აშკარად ვერ გაამართლა.

დანარჩენები

2011 წელს ფეხბურთიდან წასული კიდევ რამდენიმე ფეხბურთელის გამოყოფა ღირს. სწორედ წელს დაასრულა კარიერა დანიელმა ფორვარდმა იონ დალ ტომასონმა. დანიის ნაკრებში გამართულ 112 მატჩში მას 52 გოლი აქვს გატანილი. ტომასონი კარიერის განმავლობაში არაერთ ცნობილ კლუბში თამაშობდა, მათ შორის "მილანში". კარიერა კი მოკრძალებულ "ექსელსიორში" დაასრულა.

37 სემი ჰიიპია ფინური ფეხბურთის ლეგენდაა. მისი უკანასკნელი კლუბი ლევერკუზენის "ბაიერი" იყო. საუკეთესო წლები კი "ლივერპულში" აქვს გატარებული.

2011 წლის მაისში ფეხბურთიდან წასვლის განცხადება 35 წლის ივან დე ლა პენიამაც გააკეთა. "პატარა ბუდას" კარიერა "ბარსელონაში" იწყებოდა. მასზე თვით იოჰან კრუიფი ამყარებდა დიდ იმედებს, თუმცა დე ლა პენია ბოლომდე ვერ გაიხსნა და საბოლოოდ კარიერა "ესპანიოლში" დაასრულა.

სტატიის მისამართი: http://24saati.ge/index.php/category/sport/football/2011-12-30/23785.html