ბანეგა და სხვები

ნებისმიერი მწვრთნელი და ფეხბურთელი გეტყვით, რომ ტრავმები ფეხბურთის განუყოფელი ნაწილია.

24 საათი 22.02.12

ევერ ბანეგა

ბედნიერია ის ფეხბურთელი, რომელიც კარიერის მანძილზე სერიოზულ ტრავმას არ მიიღებს, მაგრამ ასეთები თითქმის არ არსებობენ. ვარჯიშზე და მატჩის დროს ტრავმის მიღება სრულიად ბუნებრივია, მაგრამ არსებობს შემთხვევები, რომლებიც ღიმილს იწვევს - ტრავმები, რომლებიც ფეხბურთელებმა მინდორს მიღმა, გაუფრთხილებლობის გამო, კურიოზულ ვითარებაში მიიღეს.

მოკლედ, თუ ტრავმის მიღება გიწერია და მინდორზე გადარჩი, სადმე სხვაგან, სრულიად არასაფეხბურთო ვითარებაში შეიძლება დაზიანდე. ამის ნათელი მაგალითია "ვალენსიას" 23 წლის ნახევარმცველი ევერ ბანეგა, რომელმაც ბენზინგასამართ სადგურზე ტერფი დაიზიანა. ბანეგას მანქანის ხელის მუხრუჭზე დაყენება დაავიწყდა და ავტომობილიდან გადმოსულ ფეხბურთელს საკუთარმა მანქანამ ტერფზე გადაუარა. არგენტინელი ალბათ ხუთ თვეს ვერ ითამაშებს ფეხბურთს.

ბანეგას კიდევ რა უჭირს, ინგლისის 21 წლამდელთა ნაკრების ყოფილმა ფეხბურთელმა ლეროი ლიტამ ლოგინში მოახერხა ტრავმის მიღება. დილას გაღვიძებული ლიტა ისე მაგრად გაიზმორა, რომ მყესები გაუწყდა.

ფეხბურთელებს აბაზანაში შესვლისასაც სიფრთხილე მართებთ. სანტიაგო კანისარესმა სწორედ აბაზანაში მიღებული ტრავმის გამო გამოტოვა 2002 წლის მუნდიალი. ესპანელ მეკარეს ოდეკოლონის ბოთლი ხელიდან გაუვარდა, ნამსხვრევზე კი ისე გაიჭრა ფეხი, რომ მსოფლიო ჩემპიონატს მიღმა დარჩა.

ადამიანის საუკეთესო მეგობარი?

ცნობილია, რომ ძაღლი ადამიანის საუკეთესო მეგობარია. ზოგიერთი ფეხბურთელი კი ასე არ ფიქრობს. ამის დასტურად რამდენიმე საინტერესო შემთხვევას გავიხსენებთ.

უელსელ დარენ ბერნარს სახლში პატარა პუდელი ჰყავდა, რომელმაც სამზარეულოში მოისაქმა. დარენმა გუბე ვერ შეამჩნია, ფეხი დაუსრიალდა და მუხლი იმდენად დაიზიანა, რომ ხუთი თვე გაუცდა. "სტოკ სიტის" ნახევარმცველმა ლაიმ ლოურენსმა კი ძაღლის გასეირნებისას მიიღო ტრავმა. ანალოგიური ტრავმებით "თავს იწონებენ" კარლო კუდიჩინი და ჟულიენ ესკუდეც. ძაღლებთან ყველაზე რთული ურთიერთობა კი "ბრენტფორდის" ყოფილ მეკარე ჩიკ ბროდის ჰქონდა. მინდორზე გამოვარდნილი გერმანული ნაგაზი ბროდის დაეტაკა და ისეთი ტრავმა მიაყენა, რომ მეკარე იძულებული გახდა კარიერა დაესრულებინა.

ფეხბურთელებს ცხოველებთან და ბავშვებთან ურთიერთობის არც ისე სასიამოვნო გამოცდილება აქვთ. ნორვეგიელმა სვენ გრონდალენმა სანაკრებო კარიერა 1970 წელს დაასრულა. ამის მიზეზია მძიმე ტრავმა, რომელიც ფეხბურთელმა ძუნძულით სირბილისას მიიღო. საბრალო სვენი ხარირემს დაეჯახა. საინტერესოა, როგორ ვერ შეამჩნია ნორვეგიელმა ფეხბურთელმა ამხელა ცხოველი.

ინგლისის ნაკრების ყოფილმა ნახევარმცველმა დევიდ ბეტიმ კი შვილის გამო რამდენიმე მატჩი გამოტოვა. ბავშვმა სამთვლიანი ველოსიპედით გადაუარა ბეტის ფეხზე. დანიელ ალან ლილსენს კი ქალიშვილის ოხუნჯობის გამო მოუხდა რამდენიმე თამაშის გამოტოვება. ალანს შვილმა თვალში თითი ატაკა და კინაღამ ცალი თვალით დააბრმავა.

ფეხბურთელები რემონტის კეთებას და საკუთარი სახლის წინ გაზონის გაკრეჭასაც უნდა მოერიდონ.

"არსენალის" ყოფილმა ვარსკვლავმა ჩარლი ჯორჯმა სწორედ მინდვრის საკრეჭი მანქანის გამო დაასრულა კარიერა. ფეხბურთელმა სახლის წინ გაზონის მოწესრიგება სცადა, მაგრამ ეს იმდენად უხეიროდ გააკეთა, რომ ფეხის თითი მოიჭრა. კინაღამ ხელის თითების გარეშე დარჩა საფრანგეთის ნაკრების მეკარე გრეგორი კუპე, რომელიც სახლში, კედელზე, თაროების მიჭედებას აპირებდა და ჩაქუჩი თითებში ჩაირტყა. "ლივერპულის" ყოფილმა მეკარემ მიხაელ სტენსგაარდმა კი საუთოებელი დაფის დაკეცვისას დაიზიანა მხარი და ამის გამო კარიერაც დაასრულა.

უცნაური და საოცარი ტრავმები

რაოდენ გასაკვირიც არ უნდა იყოს, ასეთ უცნაურ ტრავმებს რატომღაც ძირითადად მეკარეები იღებენ. გერმანელ მეკარეს ნორბერტ ნიგბურგს რესტორანში, მაგიდიდან წამოდგომისას მენისკი გაუწყდა და ამ მიზეზით კარიერაც დაასრულა. "მანჩესტერის" მეკარემ ალექს სტეპნიმ კი ისე ხმამაღლა დაუყვირა თავის მცველებს, რომ ყბა ამოუვარდა.

არსებობს იმდენად უცნაური ტრავმები, რომ მათი კლასიფიცირებაც კი შეუძლებელია. მაგალითად, "ჰაიდუკის" ფეხბურთელმა მილან რაპაიჩმა სეზონის სტარტი იმის გამო გამოტოვა, რომ აეროპორტში თვითმფრინავში ჩასაჯდომი ბილეთი თვალზე მიეკრა. პსჟ-ს ფეხბურთელმა ლიონელ ლეტიზიმ კი იატაკიდან ნამცხვრის ნაჭრის აღებისას მიიღო ზურგის ტრავმა.

უცნაურ ტრავმებს ფეხბურთელები მინდორზეც იღებენ, მაგალითად, გოლის აღნიშვნის დროს. ტიერი ანრიმ და მარკო ტრადელიმ სახე მაშინ დაიზიანეს, როდესაც გოლს კუთხურის ალამთან აღნიშნავდნენ. ორივეს ეს ალამი მოხვდა სახეში. "არსენალის" ყოფილმა ფეხბურთელმა პერი გროვსმა კი სათადარიგოთა სკამზე მიიღო ტრავმა. გატანილი გოლის შემდეგ ის ისე შეხტა, რომ სათადარიგოთა სკამის სახურავს მიარტყა თავი.

ამ მხრივ ყველაზე უცნაური რამ 2004 წლის დეკემბერში მოხდა. "სერვეტის" ნახევარმცველმა პაოლო დიეგომ ტრიბუნებზე გადახტომით მოინდომა გოლის აღნიშვნა და საქორწინო ბეჭედი დამცავ ჯებირს გამოსდო. საბრალო პაოლოს თითი მოსწყდა, მსაჯმა კი ეს უბედურება არ აკმარა და ყვითელი ბარათიც უჩვენა.

"ფერგი" და "ბექსი"

ბექჰემის წარბის ამბავი საქვეყნოდ არის ცნობილი. "მანჩესტერი"-"არსენალის" მატჩის შემდეგ გაბრაზებულმა სერ ალექსმა ბუცს ფეხი დაარტყა და დევიდს წარბში მოარტყა. "ბექსს" წარბზე ნაკერები დაადეს. ბრაზილიელ ემერსონს კი მასაჟის დროს დაუზიანეს მხარი.

სტატიის მისამართი: http://24saati.ge/index.php/category/sport/football/2012-02-22/25707.html